టీడీపీ ఎమ్మెల్యే రికార్డు పనులు.. దేశ చరిత్రలోనే అరుదైన ఘట్టమన్న లోకేష్..

కోటంరెడ్డి శ్రీధర్‌రెడ్డి అంటే ఏపీ రాజకీయాలపై అవగాహన ఉన్నవారికి కొత్తగా పరిచయం చేయాల్సిన పనిలేదు. వైసీపీ నుంచి టీడీపీలో చేరిన ఆయన.. గత ఎన్నికల్లో టీడీపీ తరుఫున నెల్లూరు రూరల్ ఎమ్మెల్యేగా పోటీ చేసి ఘన విజయం సాధించారు. అయితే కోటంరెడ్డి శ్రీధర్ రెడ్డి తాజాగా ఓ అరుదైన ఘనత అందుకున్నారు. ఒక్క రోజే వందకు పైగా పనులను ప్రారంభించి రికార్డు నెలకొల్పారు కోటంరెడ్డి. నెల్లూరు రూరల్ నియోజకవర్గ పరిధిలో ఆదివారం ఒక్కరోజే 105 అభివృద్ధి పనులకు కోటంరెడ్డి శంకుస్థాపనలు చేశారు. వీటి విలువ సుమారుగా రూ.40 కోట్ల వరకూ ఉండొచ్చని అంచనా.

ఉదయం నుంచి ఈ శంకుస్థాపన కార్యక్రమాలు మొదలయ్యాయి. ఇదే కాదు ఇంతకుమించిన సంఖ్యలో త్వరలోనే మరోసారి అభివృద్ధి పనులు ప్రారంభిస్తానని కోటంరెడ్డి చెప్తున్నారు. మార్చి17 లోపల మరో 198 అభివృద్ధి పనులకు శంకుస్థాపనలు చేస్తామని కోటంరెడ్డి శ్రీధర్‌రెడ్డి తెలిపారు. మొత్తంగా రెండు నెలల్లో ఈ 303 పనులను పూర్తిచేసి, మే 20న ప్రజలకు అంకితం చేస్తామని ప్రకటించారు. ఈ పనుల్లో సీసీ రోడ్లు, కల్వర్టులు, డ్రెయిన్లు వంటి నిర్మాణాలు ఉన్నాయి.

మరోవైపు నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డిని ఏపీ ఐటీ శాక మంత్రి నారా లోకేష్ అభినందించారు. ఒకేరోజు 105 అభివృద్ధి కార్యక్రమాలకు శ్రీకారం చుట్టి రికార్డు సృష్టించారని ఎక్స్ వేదికగా కొనియాడారు. బహుశా దేశ, రాష్ట్ర చరిత్రలో ఇదొక అరుదైన ఘట్టమన్న నారా లోకేష్.. ఆంధ్రప్రదేశ్‌లో చంద్రబాబు నేతృత్వంలోని ప్రగతిశీల ప్రభుత్వం అభివృద్ధికి అత్యంత ప్రాధాన్యతనిస్తోందనడానికి ఇదొక ఉదాహరణగా పేర్కొన్నారు. ప్రజాప్రతినిధులకు స్పూర్తిగా నిలిచారంటూ కోటంరెడ్డి శ్రీధర్‌రెడ్డికి నారా లోకేష్ అభినందనలు తెలిపారు.

మరోవైపు అభివృద్ధి అంటే ఏంటో చూపించేందుకే రికార్డు స్థాయి పనులు చేపట్టినట్లు కోటంరెడ్డి శ్రీధర్‌రెడ్డి వెల్లడించారు. నెల్లూరు రూరల్ నియోజకవర్గంలో 191 కోట్ల రూపాయలతో అభివృద్ధి పనులు చేస్తున్నామని వివరించారు. వైసీపీ హయాంలో ప్రజలు రోడ్లు లేక ఇబ్బందులు పడ్డారన్న కోటంరెడ్డి.. నెల్లూరు గ్రామీణంలోని ప్రతి కాలనీలోనూ రోడ్డు నిర్మాణం చేపట్టినట్లు తెలిపారు. ముఖ్యమంత్రి నారా చంద్రబాబు నాయుడు, మంత్రి నారా లోకేష్ ప్రోత్సాహంతో ఈ పనులు చేస్తున్నానని.. చంద్రబాబు నేతృత్వంలో అభివృద్ధి అంటే ఏంటో చూపించేందుకే ఇన్ని పనులు ఒకేసారి చేపట్టినట్లు తెలిపారు. శంకుస్థాపన చేసిన అన్ని పనులను 60 రోజుల్లో పూర్తి చేస్తామని కోటంరెడ్డి శ్రీధర్‌రెడ్డి ప్రకటించారు.