వంద రోజుల పెళ్లి సేవ.. ఇదో కొత్త కాన్సెప్ట్

ఏం వదినా.. మీ పాపకు పెళ్లికుదిరిందటగా..ఎదురింటావిడ పలకరింపు.. అవును వదినా, అన్నీ సరిగ్గా కుదిరాయి, అందుకే నిశ్చయించాం, మూడు నెలల్లో పెళ్లి పెట్టుకున్నాం.. ఇవతల ఆవిడ జవాబు.. అవునా వదినా, మూడు నెలల టైముందిగా, మరి నెక్ట్స్ ఏంటి..? ఆవిడ ప్రశ్న, ఈవిడకేమీ అర్థం కాలేదు. అదే వదినా.. ప్రీవెడ్డింగ్ షూటూ, గట్రా అలాంటివేవైనా ఉన్నాయా అని.. ఆవిడే క్లారిటీ ఇచ్చేసింది. ఇదీ ఇవాళ్టి తంతు, పెళ్లి అనగానే సంపన్న వర్గాల నుంచి మధ్యతరగతి జీవితాల వరకూ తాహతుకు మించి ఖర్చు చేయడం, ఆ తర్వాత చిక్కుల్లో పడటం. ఇప్పుడు పెళ్లికి తోడు ప్రీవెడ్డింగ్ షూట్ అంటూ ఇంకో తతంగం. బీచ్ ఒడ్డున, బురదలో, తోటల్లో, పెళ్లి తర్వాత జరగాల్సిన పనులను పెళ్లికి ముందే సగం వరకూ జరిపించేస్తున్న వైనం చూస్తునే ఉన్నాం.

అయితే వీటన్నింటికి మించి ఆలోచించిందో జంట. ప్రీవెడ్డింగ్ షూట్లలో.. మిగిలిన వారికంటే భిన్నంగా ఉండాలని నిర్ణయించుకుని ఓ మంచి కార్యక్రమానికి శ్రీకారం చుట్టింది. ఈ విధానం ఇప్పుడు అందరి చేతా ప్రశంసలు కురిపిస్తోంది. ఆంధ్రప్రదేశ్‌లోని అంబేద్కర్ కోనసీమ జిల్లా ఆత్రేయపురం మండలం ర్యాలికి చెందిన మోహిత్ సత్యకృష్ణ అనే యువకుడికి సాయి సీత అనే యువతితో వివాహం నిశ్చయమైంది. ఫేమస్ మెజిషీయన్ శ్యామ్ జాదూగర్ కుమారుడే ఈ మోహిత్ సత్యకృష్ణ. సత్య కృష్ణతో పాటు పెళ్లి కుమార్తె సీత కూడా లండన్‌లో డాక్టర్లుగా ఉన్నారు.

డిసెంబరు 6న వీరి నిశ్చితార్థం జరగ్గా.. మార్చి 12న పెళ్లి నిశ్చయించారు. అయితే పెళ్లి నిశ్చయం అయిన తర్వాత వీరు సరికొత్తగా ఆలోచించారు. ఎంగేజ్‌మెంట్‌ నుంచీ పెళ్లి వరకూ 100 రోజులకు పైగా సమయం ఉండటంతో ఏదైనా మంచిపని చేయాలని నిర్ణయించుకున్నారు. అయితే తమ కోసం కాకుండా సమాజానికి ఉపయోగపడే పనులు చేయాలని నిర్ణయించుకుని వందరోజుల సేవ పేరుతో ఓ కార్యక్రమానికి శ్రీకారం చుట్టారు. వందరోజుల సేవలో భాగంగా సహాయం అవసరమైన వారికి అండగా నిలబడాలని వీరిద్దరూ నిర్ణయించుకున్నారు.

అందులో భాగంగా ఆత్రేయపురం చుట్టుపక్కల గ్రామాల్లో మోహిత్ సత్యకృష్ణ, సాయి సీత మెడికల్ క్యాంపులు ఏర్పాటు చేశారు. పేదలకు కొత్తబట్టలు పంపిణీ చేశారు. విద్యార్థులకు అవసరమైన స్టేషనరీ, వలస కూలీలకు కావాల్సిన నిత్యావసర సరుకులు పంపిణీ చేశారు. మొక్కలు నాటడం, అన్నదానం, ఉచితంగా మందుల పంపిణీ ఇలా వివిధ సేవా కార్యక్రమాలు చేపడుతూ వస్తున్నారు. సామాజిక అవసరాలు తీర్చడమే కాకుండా సామాజిక చైతన్యం కల్పించే కార్యక్రమాలు కూడా చేపడుతున్నారు. మూఢ నమ్మకాలకు వ్యతిరేకంగా అవగాహన కార్యక్రమాలు చేపడుతున్నారు. అలాగే డ్రైవింగ్‌లో మెళకువలు నేర్పించడం వంటి పనులు చేస్తున్నారు. వంద రోజుల సేవ పేరుతో సుమారుగా 3 లక్షల రూపాయలు ఖర్చు పెట్టి రోజుకో మంచి పని చేస్తున్న వీరిని అందరూ అభినందిస్తున్నారు.