విధులను బహిష్కరించిన ఉద్యోగులు.. రేపు బంద్..

మార్చి 10, 17, 24 తేదీల్లో మూడు సోమవారాలు.. రాష్ట్రవ్యాప్తంగా డాక్టర్ ఎన్టీఆర్ వైద్య సేవా పథకంలో పనిచేస్తున్న ఉద్యోగులు తమ సమస్యల పరిష్కారానికి విధులు బహిష్కరించనున్నట్లు ఏపీ వైద్య సేవ ఎంప్లాయిస్ యూనియన్ కేడర్ రాష్ట్ర అధ్యక్షుడు సీహెచ్ గోవింద్ ప్రకటించారు. ప్రస్తుతం ప్రభుత్వం ఎన్టీఆర్ వైద్య సేవా పథకాన్ని బీమా పరిధిలోకి చేర్చేందుకు.. ఆప్కాస్ వ్యవస్థను రద్దు చేసేందుకు చర్యలు తీసుకుంటోందని తెలిపారు. ఏప్రిల్ నెల నుండి బీమా ఆధారిత వైద్య సేవలు అమలులోకి వస్తాయని ప్రభుత్వం ప్రకటించడంతో.. వైద్య సేవా ఉద్యోగులలో తీవ్ర ఆందోళన నెలకొంది.

ఈ నిర్ణయం వల్ల ఉద్యోగుల భవితవ్యంపై అనేక అనుమానాలు వ్యక్తమవుతున్నాయని.. వారి ఉద్యోగ భద్రత, వేతన వ్యవస్థ, పనిభారంపై తీవ్ర ప్రభావం పడుతుందనే భయం వ్యక్తమవుతోందని గోవింద్ వివరించారు. ఉద్యోగుల అభిప్రాయాలను పట్టించుకోకుండా ప్రభుత్వం ఏకపక్షంగా నిర్ణయాలు తీసుకోవడం తగదని ఆయన విమర్శించారు. సమస్యలు పరిష్కరించడానికి ప్రభుత్వం చర్చలకు ముందుకు రాకపోతే.. ఈ విధుల బహిష్కరణ మొదటిదశ మాత్రమేనని.. భవిష్యత్తులో మరింత ఉధృతమైన పోరాటాలకు సిద్ధంగా ఉండాలని ఉద్యోగులకు గోవింద్ పిలుపునిచ్చారు. ప్రభుత్వ తీరును నిరసిస్తూ.. తమ హక్కుల కోసం పోరాడతామని స్పష్టం చేశారు.

వైద్య చికిత్సకు ఆమోదం..

ఇదిలా ఉండగా.. ఇటీవల ఏపీ ప్రభుత్వం.. ఉద్యోగుల ఆరోగ్య బీమా పథకం అమలులో భాగంగా.. తెలంగాణ డీఎంఈ గుర్తించిన ఆసుపత్రుల్లో ఏపీ ఉద్యోగులు చికిత్స పొందేందుకు అనుమతించింది. దీనిలో భాగంగానే రిఫరల్ ఆసుపత్రులను గుర్తించాలని వైద్యపేవ సీఈఓను ప్రభుత్వం ఆదేశించింది. ఏపీ ఉద్యోగులు, పింఛనర్లు తెలంగాణలో వైద్యం చేయించుకున్న తర్వాత రీయింబర్స్‌మెంట్ బిల్లులు రాక చాలా నష్టపోయారు. ఆంధ్రప్రదేశ్ విభజన తర్వాత అనేక మంది ఏపీ ఉద్యోగులు హైదరాబాద్ లోనే సెటిల్ అయ్యారు. విభజన చట్టంలోని షెడ్యూల్ 9 అండ్ 10 ప్రకారం ఉద్యోగులు హైదరాబాద్‌లోనే ఉంటున్నారు. అయితే తెలంగాణ డీఎంఈ గుర్తించిన ఆసుపత్రుల్లో ఏపీ ఉద్యోగులు చికిత్స చేయించుకునేందుకు ఆమోదం లభించింది. ఇక్కడ చికిత్స తర్వాత బిల్లులు సమర్పిస్తే రీయింబర్స్ మెంట్ వస్తుంది.