ఆ ప్రాంతాలకు మహర్దశ,,,ఏపీలో మరో రెండు ఇంటర్నేషనల్ ఎయిర్‌పోర్టులు

ఆంధ్రప్రదేశ్‌లో మరో రెండు గ్రీన్‌ఫీల్డ్ ఇంటర్నేషనల్ ఎయిర్‌పోర్టులు ఏర్పాటు చేసే దిశగా వేగంగా అడుగులు పడుతున్నాయి. రాష్ట్రంలో ఇప్పటికే ఏడు విమానాశ్రయాలు ఉండగా.. వాటి సంఖ్యను 14కు పెంచాలని ప్రభుత్వం భావిస్తోంది. ఆ దిశగా కసరత్తు చేస్తోంది. అందులో భాగంగా రాజధాని అమరావతిలో ఒక గ్రీన్‌ఫీల్డ్ ఎయిర్‌పోర్టు, శ్రీకాకుళం జిల్లాలో మరొక విమానాశ్రయం ఏర్పాటు చేయాలని భావిస్తున్నారు. ఈ ఎయిర్‌పోర్టుల ఏర్పాటుకు సంబంధించిన సాధ్యాసాధ్యాలను పరిశీలించేందుకు ప్రీ-ఫీజిబిలిటీ స్టడీ, టెక్నో, ఎకనమిక్ ఫీజబులిటీ రిపోర్టు తయారీ కోసం కన్సల్టెంట్లను నియమించనున్నారు. ఇందుకోసం ఆంధ్రప్రదేశ్ ఎయిర్‌పోర్ట్స్ డెవలప్‌మెంట్ కార్పొరేషన్ టెండర్లు ఆహ్వానిస్తోంది. టెండర్లు దాఖలు చేసేందుకు మార్చి 21 వరకూ గడువు ఇచ్చారు. ఆన్‌లైన్‌లో టెండర్లు దాఖలు చేయవచ్చు. మార్చి 24న టెక్నికల్ బిడ్లు, మార్చి 27న ఫైనాన్షియల్ బిడ్లు తెరవున్నారు.

శ్రీకాకుళం గ్రీన్‌ఫీల్డ్ ఎయిర్‌పోర్టుకు సంబంధించి జిల్లాకు ఈశాన్య దిశలో, శ్రీకాకుళానికి 70 కిలోమీటర్ల దూరంలో, బంగాళాఖాతానికి సమీపంలో ఎయిర్‌పోర్టును ప్రతిపాదించారు. అలాగే అమరావతి ప్రాంతంలో.. గ్రీన్‌ఫీల్డ్ ఎయిర్‌పోర్టు ఏర్పాటుకు ఏ ప్రదేశం అనుకూలమనే విషయాలను కన్సల్టెన్సీ సూచించనుంది. అలాగే ఈ గ్రీన్‌ఫీల్డ్ ఎయిర్‌పోర్టుల నిర్మాణం, నిర్వహణను ప్రభావితం చేసే ఆర్థిక, సాంకేతిక అంశాలను ఈ కన్సల్టెన్సీ గుర్తించనుంది. అలాగే ఏఏఐ నూతన గైడ్‌లైన్స్‌కు అనుగుణంగా ఎయిర్‌పోర్టుల నిర్మాణంపై కాన్సెప్ట్ మాస్టర్ ప్లాన్ తయారీ సిద్ధం చేయనుంది.

మరోవైపు రాజధాని అమరావతికి ఆంధ్రప్రదేశ్ ప్రభుత్వం అత్యధిక ప్రాధాన్యం ఇస్తోన్న సంగతి తెలిసిందే. అమరావతిని అన్ని ప్రధాన నగరాలతోనూ అనుసంధానం చేసేలా రోడ్డు, రైల్వే ప్రాజెక్టులకు సంకల్పించింది. ఈ క్రమంలోనే అమరావతిలో గ్రీన్‌ఫీల్డ్ ఎయిర్‌పోర్టును కూడా ఏర్పాటు చేయాలని నిర్ణయం తీసుకున్నట్లు తెలిసింది. మరోవైపు మూడేళ్లలో అమరావతి నిర్మాణాన్ని పూర్తి చేసేలా ప్రభుత్వం అడుగులు వేస్తోంది. ఈ క్రమంలోనే మార్చి 12 నుంచి అమరావతి నిర్మాణ పనులను కూడా ప్రారంభించనున్నారు. తొలి విడతలో 40 వేలకోట్ల రూపాయల విలువైన పనులను చేపడుతున్నారు. ఈ పనులకు సంబంధించిన టెండర్ల ప్రక్రియ ఇటీవల చేపట్టిన సంగతి తెలిసిందే.