సిరియాలో చెలరేగిన హింస.. రెండు రోజుల్లో 1000 మంది మృతి

పశ్చిమాసియా దేశం సిరియా మరోసారి అట్టుడుకుతోంది. మాజీ అధ్యక్షుడు బషర్‌ అల్ అసద్‌  మద్దతుదారుల తిరుగుబాటుతో స్థానికంగా హింస చెలరేగింది. ఈ క్రమంలో భద్రతా బలగాలు, అసద్‌ అనుకూలవాదుల మధ్య తీవ్ర ఘర్షణలు, ప్రతీకార దాడులు చోటుచేసుకున్నాయి. గత రెండు రోజులుగా జరుగుతున్న హింసాత్మక దాడుల్లో దాదాపు 1,000 మందికిపైగా ప్రాణాలు కోల్పోయినట్లు సిరియాలో మానవహక్కుల కోసం పనిచేస్తోన్న బ్రిటన్ సంస్థ వెల్లడించింది. 14 ఏళ్ల కిందట సిరియా అంతర్యుద్ధం మొదలైన తర్వాత అత్యంత ఘోరమైన హింసాత్మక ఘటన ఇదేనని పేర్కొంది.

గతేడాది డిసెంబరులో బషర్ అసద్ పదవి నుంచి తప్పుకుని రష్యాకు పారిపోయిన విషయం తెలిసిందే. మూడు నెలల అనంతరం మళ్లీ సిరియాలో ఘర్షణలు తలెత్తాయి. అసద్‌ మద్దతుదారుల దాడులకు తీవ్రంగా ప్రతిస్పందిస్తున్నట్టు సిరియా ప్రభుత్వం వెల్లడించింది. ఈ క్రమంలో ప్రభుత్వ అనుకూల ఫైటర్లు.. అసద్‌ విధేయులు అలవైట్‌ వర్గంపై ప్రతీకార దాడులకు దిగడం తీవ్ర హింసకు దారితీసింది. ఇరు వర్గాల దాడుల్లో వందలాది మంది ప్రాణాలు కోల్పోయారు. మృతుల్లో 745 మంది అమాయక పౌరులు, 125 మంది భద్రతా సిబ్బంది, 148 మంది బషర్ మద్దతుదారులు ప్రాణాలు కోల్పోయినట్టు హక్కుల సంస్థ తెలిపింది. వీరిలో చాలా మంది దగ్గర నుంచి కాల్పులు జరపడంతో చనిపోయారని వివరించింది.

బనీయాస్‌ పట్టణంలో పరిస్థితి దారుణంగా ఉందని, అక్కడ అనేక మంది చనిపోయారని పేర్కొంది. వీధులు, భవనాలపైనా మృతదేహాలు పడి ఉన్నట్లు స్థానికులు తెలిపారు. వాటిని ముట్టుకోడానికి కూడా ఎవ్వరూ సాహసం చేయడం లేదని, ఖననం చేయకుండా గన్‌మెన్‌లు అడ్డుకుంటున్నారని ఆవేదన వ్యక్తం చేశారు. అలాగే, లటాకియాలో విద్యుత్ సరఫరా.. తాగునీరు కూడా నిలిచిపోయింది. గురువారం నుంచి మొదలైన ఘర్షణలు అంతకంతూ తీవ్రమవుతున్నాయి. ప్రభుత్వానికి విధేయులైన సున్నీ ముస్లిం.. అసద్ వర్గం అలవైట్ వర్గంపై శుక్రవారం నుంచి ప్రతీకార హత్యలు ప్రారంభించాయి.

అలవైట్ వర్గం నివసించే గ్రామాలు, పట్టణాల్లోని ప్రజలు మాట్లాడుతూ.. అలవైట్‌లు ముఖ్యంగా పురుషులను వీధుల్లో లేదా వారి ఇళ్లవద్ద కాల్చి చంపారని చెప్పారు. అనేక ఇళ్లను దోచుకుని, ఆపై వివిధ ప్రాంతాలలో నిప్పంటించారని బాధితులు వాపోయారు. కాగా, సిరియాలో ఐదు దశాబ్దాలకుపైగా కొనసాగిన బషర్ కుటుంబ పాలనకు వ్యతిరేకంగా 2011లో మొదలైన తిరుగుబాటును తొలినాళ్లలో రష్యా, ఇరాన్ సహాకారం మాజీ అధ్యక్షుడు అణిచివేయగలిగారు. కానీ, మళ్లీ గతేడాది నవంబరులో అనూహ్యంగా తిరుగుబాటుదారులు పట్టుసాధించి.. సిరియాలోని ప్రధాన నగరాలను ఆక్రమించుకున్నారు. చివరకు డిసెంబరు రెండో వారంలో రాజధాని డమాస్కస్ దిశగా సాగడంతో బషర్ అధ్యక్ష పీఠం దిగి.. రష్యాకు పారిపోయారు.