ప్రపంచంలోనే అత్యధిక ధనికుడిని నేనే.. ప్రధాని మోదీ

అంతర్జాతీయ మహిళా దినోత్సవం సందర్భంగా ప్రధానమంత్రి నరేంద్ర మోదీ తన సొంత రాష్ట్రం గుజరాత్‌లో పర్యటించారు. నవ్‌సరి జిల్లాలో ఏర్పాటు చేసిన ఓ బహిరంగ సభలో పాల్గొన్న ప్రధాని మోదీ.. కీలక వ్యాఖ్యలు చేశారు. ప్రపంచంలో తానే అత్యంత ధనవంతుడినని పేర్కొన్నారు. అయితే అందుకు ఆయన కారణాన్ని కూడా వివరించారు. తాను ప్రధానమంత్రిగా బాధ్యతలు చేపట్టినప్పటి నుంచి గత 10 ఏళ్లుగా దేశంలో మహిళల భద్రత కోసం తమ ప్రభుత్వం ఎంతో ప్రాధాన్యం ఇచ్చిందని వెల్లడించారు.

మహిళల కోసం సరికొత్త చట్టాలను తీసుకువచ్చినట్లు తెలిపారు. త్రిపుల్‌ తలాక్‌కు వ్యతిరేకంగా ముస్లిం మహిళల కోసం చట్టం తీసుకువచ్చినట్లు తెలిపిన మోదీ.. దీని వల్ల లక్షల మంది ముస్లిం మహిళల జీవితాలను కాపాడినట్లు చెప్పారు. మహిళల సారథ్యంలోని ఎన్నో కంపెనీలు ఇప్పుడు విజయవంతంగా నడుస్తున్నాయని పేర్కొన్నారు. కోట్లాది మంది తల్లులు, సోదరీమణుల ఆశీర్వాదం కలిగిన తాను.. ఈ ప్రపంచంలోనే అత్యంత ధనవంతుడిని అని ప్రధానమంత్రి మోదీ చెప్పుకున్నారు.

అంతేకాకుండా మహిళలపై అత్యాచారం వంటి క్రూరమైన నేరాలకు పాల్పడేవారికి మరణశిక్ష విధించేలా చట్టాలను కూడా సవరించినట్లు తెలిపారు. ఇక అంతర్జాతీయ మహిళా దినోత్సవం సందర్భంగా నవ్‌సరి జిల్లాలో ఏర్పాటు చేసిన బహిరంగ సభలో ప్రసంగించిన ప్రధాని మోదీ.. మహిళల నేతృత్వంలో భారత్ అభివృద్ధి పథంలో పయనిస్తోందని తెలిపారు. అయితే ఇంటికి ఒక అమ్మాయి ఆలస్యంగా వస్తే.. తల్లిదండ్రులు ఆమెను ప్రశ్నిస్తారని తెలిపిన ప్రధాని.. అదే అబ్బాయిల విషయంలో మాత్రం అలా జరగదని.. కానీ వారిని కూడా ప్రశ్నించాలని సూచించారు.

గత 10 ఏళ్లలో మహిళల భద్రత, మహిళలపై జరుగుతోన్న నేరాలను అరికట్టేందుకు అధిక ప్రాధాన్యతను ఇచ్చినట్లు వివరించారు. అందుకోసం నిబంధనలను, చట్టాలను కూడా మార్చినట్లు తెలిపారు. రేప్ సహా ఇతర అలాంటి తీవ్రమైన నేరాల్లో మరణశిక్ష విధించేలా చట్టాలను పటిష్ఠం చేసినట్లు ప్రధాని వెల్లడించారు. ఈ సందర్భంగా గ్రామీణ ప్రాంతాల్లో ఉండే మహిళలకు మరింత సాధికారత కల్పించాల్సిన అవసరం ఉందని గుర్తు చేశారు. దేశ ఆత్మ గ్రామాల్లో ఉందని జాతిపిత మహాత్మాగాంధీ చెప్పిన మాటను గుర్తు చేసుకున్న ప్రధాని.. మహిళలు మన గ్రామీణ ప్రాంతాలకు ఆత్మగా దానికి జోడించాలని అనుకుంటున్నట్లు చెప్పారు.