2 పెంపుడు కుక్కలను కిడ్నాప్ చేసి.. రూ.10 కోట్లు డిమాండ్

చాలా మంది పెంపుడు జంతువులను పెంచుకుంటూ ఉంటారు. అందులో చాలా వరకు శునకాలను పోషిస్తూ ఉంటారు. ఈ పెంపుడు శునకాలను వాటి యజమానులు ఎంతో ప్రేమగా చూసుకుంటూ ఉంటారు. వాటిని పెంపుడు శునకంలా కాకుండా ఇంట్లో ఒక మనిషిలాగా చూసుకుంటారు. దానికి అన్ని సపర్యలు చేస్తారు. మనిషి కంటే ఎక్కువగా దానికి ఖర్చు పెడుతుంటారు. భోజనం, వాటికి వేరుగా షాంపూలు, సబ్బులు, మందులు, ఇంజెక్షన్లు.. ఇలా రకరకాలుగా ఖర్చు చేస్తారు. అయితే ఆ పెంపుడు శునకాలు కూడా వాటి యజమానులను కంటికి రెప్పలాగా కాపాడుకుంటాయి. ఏదైనా అనుకోని ఆపద ఎదురైనా వాటి నుంచి.. యజమానులను రక్షిస్తూ ఉంటాయి. ఇక అలాంటి పెంపుడు శునకాలు కిడ్నాప్ కావడంతో ఓ యజమాని తల్లడిల్లిపోయాడు.

స్విట్జర్లాండ్‌లో జరిగిన ఈ సంఘటన ఇప్పుడు నెట్టింట తీవ్ర చర్చనీయాంశంగా మారింది. జ్యురిక్ సమీపంలోని ష్లీరెన్‌కు చెందిన ఓ 59 ఏళ్ల వృద్ధుడు పెంపుడు శునకాలను పెంచుకుంటున్నాడు. అతని వద్ద బోలోంకా జాతికి చెందిన రెండు పెంపుడు శునకాలు ఉన్నాయి. ఈ క్రమంలోనే ఇటీవల గతవారం ఆయన తన రెండు పెంపుడు కుక్కలను ఇంట్లోనే వదిలేసి బయటికి వెళ్లాడు. తన పని చూసుకుని తిరిగి ఇంటికి వచ్చాడు. అయితే ఇంట్లో చూసేసరికి తన రెండు శునకాలు కనిపించలేదు. అక్కడ మొత్తం వెతికాడు. తర్వాత బయటికి వచ్చి కూడా గాలించినా కనిపించలేదు.

అయితే తన ఇంటి ఆవరణలో ఆ వృద్ధుడు ఒక లెటర్ చూశాడు. అది చదవగా అసలు విషయం తెలిసింది. ఎవరో దుండగులు ఆ రెండు పెంపుడు శునకాలను ఎత్తుకెళ్లి కిడ్నాప్ చేసినట్లు తెలిసింది. ఇక ఆ రెండు కుక్కలను విడిచిపెట్టేందుకు ఆ కిడ్నాపర్లు అడిగిన డబ్బులు వింటే షాక్ అవ్వాల్సిందే. ఆ రెండు కుక్కలను విడిచిపెట్టేందుకు.. 1 మిలియన్ స్విస్ ఫ్రాంక్‌లు అంటే అమెరికా కరెన్సీలో ఏకంగా 1 మిలియన్ కంటే ఎక్కువ డాలర్లు.. ఇక భారత కరెన్సీలో అయితే దాదాపుగా రూ.9.88 కోట్లు ఇవ్వాలని డిమాండ్‌ చేశాడు.

అయితే అది చూసి ఆశ్చర్యపోయిన ఆ యజమాని.. అంత డబ్బులు తన వద్ద లేకపోవడంతో ఏం చేయాలో తెలియక దగ్గర్లో ఉన్న పోలీస్ స్టేషన్‌కు వెళ్లి ఫిర్యాదు చేశాడు. దీంతో కేసు నమోదు చేసుకుని దర్యాప్తు చేపట్టిన పోలీసులు ఆ ప్రాంతం మొత్తం ముమ్మరంగా గాలింపు చేపట్టారు. చివరికి ఆ పెంపుడు శునకాలను కిడ్నాప్ చేసిన నిందితుడిని పట్టుకున్నారు. అనంతరం అతని వద్ద ఉన్న రెండు శునకాలను గుర్తించి.. వాటిని సురక్షితంగా యజమానికి అప్పగించారు. దీంతో అంతా ఊపిరి పీల్చుకున్నారు. తాను ప్రాణంగా పెంచుకుంటున్న పెంపుడు శునకాలు తిరిగి దొరకడంతో ఆ వృద్ధుడి ఆనందానికి అవధుల్లేకుండా పోయాయి. ఇక ఆ నిందితుడిని అరెస్ట్ చేసి జైలుకు పంపించారు.