మారిషస్ అధ్యక్షుడికి నీళ్లను బహుమతిగా ఇచ్చిన ప్రధాని మోదీ

ప్రధాన మంత్రి నరేంద్ర మోదీ రెండ్రోజుల పర్యటనలో భాగంగా మినీ ఇండియాగా పిలుచుకునే మారిషస్ వెళ్లిన విషయం అందరికీ తెలిసిందే. అయితే ఈరోజు ఉదయమే మోదీ అక్కడకు చేరుకోగా.. ప్రవాస భారతీయులు ఘన స్వాగతం పలికారు. అనతంరం ప్రధాని ఆ దేశ అధ్యక్షుడు ధరమ్ గోకుల్‌తో భేటీ అయ్యారు. ఈక్రమంలోనే ప్రధాని ఇండియా నుంచి తీసుకువెళ్లిన ఓ అరుదైన బహుమతిని అందజేశారు. అయితే ఆ బహుమతి మరేంటో కాదు నీళ్లు. అసలు ప్రధాని మోదీ నీళ్లను ఎందుకు గిఫ్టుగా ఇచ్చారు, దాని ప్రత్యేకత ఏంటో మనం ఇప్పుడు తెలుసుకుందాం.

కుంభమేళా నీటిని బహుమతిగా అందజేసిన మోదీ

ప్రధాన మంత్రి నరేంద్ర మోదీ నేడు మారిషస్ వెళ్లారు. రెండ్రోజుల పర్యటన కోసం ఆ దేశం వెళ్లిన ఆయన.. ఆ దేశ అధ్యక్షుడు ధరమ్ గోకుల్‌తో భేటీ అయ్యారు. ఈక్రమంలోనే ఇద్దరు నేతలు అనేక విషయాలపై చర్చించారు. చాలాసేపు సరదాగా ముచ్చటించుకున్నారు. అనంతరం ప్రధాని మోదీ.. ఆయనకు భారత్ నుంచి తీసుకెళ్లిన ఓ అరుదైన బహుమతిని అందేజేశారు. ముఖ్యంగా ఉత్తర ప్రదేశ్‌లోని ప్రయాగ్‌రాజ్‌లో జరిగిన మహా కుంభమేళాకు సంబంధించిన నీటిని తీసుకెళ్లారు.

ఇది మాత్రమే కాకుండా మరికొన్ని కూడా..!

కుంభమేళా అయిపోనప్పటికీ.. అక్కడి గంగా, యమున, సరస్వతీ నదులు కలిసిన త్రివేణీ సంగమం నుంచి తీసుకు వచ్చిన పవిత్ర జలాన్ని బహుమతిగా అందజేశారు. ఈ విషయాన్ని ఆ దేశ అధ్యక్షుడికి చెప్పగా.. అరుదైన బహుమతి అందజేశారంటూ ఆయన హర్షం వ్యక్తం చేశారు. ఇది మాత్రమే కాకుండా ప్రధాని మోదీ మరికొన్ని బహుమతులను సైతం ధరమ్ గోకుల్‌కు అందజేశారు. ఆపై మారిషస్ అధ్యక్షుడు ఇచ్చిన ప్రత్యేక విందులో పాల్గొన్నారు.

అమ్మ పేరిట మొక్క కార్యక్రమంలో భాగంగా చెట్టు పెట్టిన మోదీ

అంతకు ముందే ప్రధాని మోదీ మారిషస్ దేశ ప్రధాని నవీన్ రామ్ గోలంను కలిశారు. వీరిద్దరూ కలిసి ఆ దేశ జాతిపిత సీవోసాగర్ రామ్ గోలం పేరు మీదుగా ఏర్పాటు చేసిన బొటానికల్ గార్డెన్‌ను సందర్శించారు. అక్కడే ఇరు దేశాల ప్రధాన మంత్రులు మొక్కలు నాటారు. ఇందుకు సంబంధించిన ఫొటోలను ప్రధాని మోదీ ఎక్స్ వేదికగా షేర్ చేశారు. అమ్మ పేరిట మొక్క (ఏక్ పేడ్ మా కే నామ్) కార్యక్రమంలో తన మిత్రుడు నవీన్ కూడా పాలుపంచుకోవడం చాలా సంతోషంగా ఉందని వివరించారు. అలాగే ప్రకృతి.. మాతృత్వం, స్థిరత్వానికి గుర్తుగా నిలుస్తుందన్నారు.