ఏడాదికి రూ.21 లక్షల ఉద్యోగం.. అయినా 10 రోజుల్లోనే రాజీనామా

ప్రస్తుత కాలంలో ఉద్యోగం దొరకడం అనేది చాలా గగనం అయిపోయింది. ప్రభుత్వ ఉద్యోగాల సంగతి పక్కనపెడితే.. ప్రైవేటు ఉద్యోగాలకు కూడా భారీగా పోటీ ఉంటోంది. ఏ చిన్న ఉద్యోగానికి నోటిఫికేషన్ వెలువడినా.. ఇంటర్వ్యూలకు పిలిచినా వేల సంఖ్యలో నిరుద్యోగులు వాలిపోతున్నారు. ఇక దేశంలోని పలు ప్రాంతాల్లో ఇలా వాక్ ఇన్ ఇంటర్వ్యూలకు వెళ్లి తోపులాట జరిగిన సంఘటనలు ఇటీవలి కాలంలో అనేకం చూస్తూనే ఉన్నాం. దేశంలో ప్రతీ సంవత్సరం.. కొత్తగా డిగ్రీ పట్టాలు పొందిన వారు ఉద్యోగాల కోసం బయటికి రావడం.. ఉన్న అవకాశాలు సరిపోకపోవడంతో నిరుద్యోగం తాండవిస్తోంది. దీనికి తోడు చదువుకున్న చదువుకు.. చేసే ఉద్యోగానికి అస్సలు పోలిక ఉండటం లేదు. దీంతో చాలా మంది పీజీలు, పీహెచ్‌డీలు చేసిన వారు కూడా.. చిన్న చిన్న ఉద్యోగాలతో కాలం వెళ్లదీస్తున్నారు.

అయితే నిరుద్యోగం ఈ స్థాయిలో ఉండి.. చిన్న చిన్న ఉద్యోగాలకు కూడా పెద్ద పెద్ద చదువులు చదివిన వారు ఎగబడుతుంటే.. ఓ వ్యక్తి మాత్రం ఏడాదికి రూ.21 లక్షల జీతం ఉన్న ఉద్యోగాన్ని వదిలిపెట్టాడు. ఉద్యోగంలో చేరిన 10 రోజుల్లోనే ఆ ఉద్యోగానికి రాజీనామా చేసి బయటికి వచ్చేశాడు. ఇన్ సైడ్ మార్కెటింగ్ కోసం అని చెప్పి.. తనను ఉద్యోగంలోకి తీసుకున్నారని.. అయితే ఉద్యోగంలో చేరిన తర్వాత సేల్స్ చేయమంటున్నారని తీవ్ర ఆవేదన వ్యక్తం చేసిన ఆ ఉద్యోగి.. తన ఉద్యోగానికి రాజీనామా చేశాడు. ఈ విషయాన్ని స్వయంగా ఆ వ్యక్తే రెడ్డిట్ అనే సోషల్ మీడియా ప్లాట్‌ఫామ్ వేదికగా వెల్లడించాడు. పైగా తాను ఇండియన్ ఇన్‌స్టిట్యూట్ ఆఫ్ మేనేజ్‌మెంట్ నుంచి గ్రాడ్యుయేషన్ పూర్తి చేసుకున్నట్లు వివరించాడు. ఇప్పుడు ఈ వార్త సోషల్ మీడియాలో నెటిజన్ల నుంచి భిన్నాభిప్రాయాలు వ్యక్తం అయ్యేలా చేస్తోంది.

తాజాగా ఇండియన్ ఇన్‌స్టిట్యూట్ ఆఫ్ మేనేజ్‌మెంట్ గ్రాడ్యుయేట్ అయిన ఓ రెడ్డిట్ యూజర్.. తాను ఓ ప్రముఖ కంపెనీలో చేరిన 10 రోజుల్లోనే రాజీనామా చేసినట్లు ఒక పోస్ట్ పెట్టడం తీవ్ర చర్చకు దారి తీసింది. అయితే అతడు గతంలో ఇన్‌సైడ్ సేల్స్ రిప్రెజెంటేటివ్‌గా ఉండగా.. కొత్త ఉద్యోగం వచ్చింది. ఏడాదికి రూ.21 లక్షల ప్యాకేజీతోపాటు జాయినింగ్ బోనస్ కింద మరో రూ.2 లక్షలు ఆఫర్ చేసినట్లు వివరించాడు. అయితే కొత్తగా చేరిన ఉద్యోగంలో అకౌంట్ ఎగ్జిక్యూటివ్ ట్రైనింగ్ ఇవ్వమని అడిగినట్లు పేర్కొన్నాడు. అయితే తాను మార్కెటింగ్ డిపార్ట్‌మెంట్‌లో ఉండాలని అనుకున్నట్లు చెప్పగా.. ఒక సంవత్సరం పాటు సేల్స్ డిపార్ట్‌మెంట్‌లో ఉండాలని సదరు కంపెనీ పేర్కొన్నట్లు వివరించాడు.

తనను మార్కెటింగ్‌లో కాకుండా సేల్స్‌లో ఉద్యోగం చేయమని చెప్పడంతో.. ఆ నిర్ణయం తనకు అంతగా నచ్చలేదని పేర్కొన్నాడు. సేల్స్ డిపార్ట్‌మెంట్‌లో వచ్చిన అవకాశం పట్ల తాను అసంతృప్తిగా ఉన్నానని.. అందుకే జాబ్‌లో చేరిన 10 రోజుల్లోనే ఉద్యోగం నుంచి వైదొలగాలని నిర్ణయించుకున్నట్లు తెలిపాడు.