ఏకే-47 పట్టుకుని ప్రధాని మోదీని చంపేస్తానంటూ చిన్నారి బెదిరింపులు.. వీడియో వైరల్

ఏడెనిమిది సంవత్సరాల వయసున్న ఓ బాలిక ఏకే-47 చేత పట్టుకుని ప్రధాని నరేంద్ర మోదీకి హత్య బెదిరింపులు చేసింది. రెండు దెబ్బలతోనే మీ ప్రాణాలు తీసేస్తానంటూ హెచ్చరించింది. మీరు ఎంత పెద్ద స్థాయిలో ఉన్నా సరే.. మా దేశానికి చెందిన అమ్మ, నాన్న, పిల్లలను చంపితే నేను అస్సలే ఊరుకోనని.. కచ్చితంగా చంపేస్తానంటూ వెల్లడించింది. ప్రస్తుతం ఇందుకు సంబంధించిన వీడియో సోషల్ మీడియాలో తెగ వైరల్ అవుతుండగా.. అసలీ అమ్మాయి ఎవరు, ఎందుకు ప్రధాని మోదీపై ఇంత కోపం పెంచుకుందని, అసలు ఆమె చేతిలోకి ఏకే-47 ఎలా వచ్చిందని ప్రశ్నిస్తున్నారు. ఆ పూర్తి వివరాలు మీకోసం.

ఏకే-47 గన్ చేత పట్టుకున్న ఓ చిన్నారి.. మన దేశ ప్రధాన మంత్రి నరేంద్ర మోదీకి హెచ్చరికలు జారీ చేసింది. మిమ్మల్ని రెండే రెండు దెబ్బల్లో హత్య చేస్తానంటూ బెదిరించింది. ముఖ్యంగా "మిస్టర్ మోదీ.. నువ్వు ఎవరైనా కావొచ్చు, నువ్వు మరోసారి మా దేశాన్ని, అమ్మా, నాన్నలను, పిల్లలను చంపితే నీకు ఎదరుగా వచ్చి నేనే నిన్ను చంపేస్తాను" అంటూ వీడియోలో వివరించింది. అంతటితో ఆగకుండా నువ్వొక తెలివి తక్కువ వాడివి, నా తుపాకీ చూశావుగా.. ఇందులో చాలా బుల్లెట్లు ఉన్నాయి.. 50 ఉన్నాయని వెల్లడించింది. అలాగే ఇందులో రెండు రెండు బుల్లెట్లతో నిన్ను చంపేస్తానని వ్యాఖ్యానించింది.

నువ్వు ఎప్పటికీ బ్రతక్కుండా చేస్తాను.. కనీసం వైద్యుడు కూడా నిన్ను బతికించలేడు.. నువ్వు ఎప్పటికీ భూమిలోనే చనిపోయి ఉంటావు అంటూ చాలా దారుణంగా మాట్లాడింది. అలాగే అల్లా కూడా నీతో సంతోషంగా ఉండడు అని చెప్పి.. నువ్వెప్పటికీ దుర్వాసన వస్తుంటావని వీడియోను ముగించింది. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతుండగా అంతా షాక్ అవుతున్నారు. అసలు ఈ అమ్మాయి ఎవరు, ఆమె ఎక్కడ ఉందని ప్రశ్నిస్తున్నారు.

చిన్న పిల్లల చేతుల్లో మారణ ఆయుధాలు పెట్టి.. భారత ప్రధాని మోదీపై ఇంత కోపం పెంచుతున్నది ఎవరో తెలుసుకుని వారిని శిక్షించాలని ఓ నెటిజెన్ కామెంట్ చేశాడు. మరో నెటిజెన్ స్పందిస్తూ.. ఇది మన దేశానికి చెందిన వీడియోనే అయితే వెంటనే చిన్నారిని అదుపులోకి తీసుకోవాలని, ఆమెకిలా బ్రెయిన్ వాష్ చేసిన వారిని అరెస్ట్ చేసి శిక్షించాలని చెప్పుకొచ్చారు. చూడాలి మరి ఈ వ్యాఖ్యలు చేసిన అమ్మాయి ఎవరో, ఏ దేశానికి చెందినదో, అసలు ఆమె చేత ఇలా మాట్లాడించింది ఎవరనేది.