ఎల్ఐసీకి ఒక్కరోజే వందల కోట్ల నష్టం.. దెబ్బకొట్టిన ఇండస్‌ఇండ్ బ్యాంక్

దేశీయ స్టాక్ మార్కెట్లు మంగళవారం రోజు.. సెషన్ ఆద్యంతం తీవ్ర ఒడుదొడుకుల్లో సాగగా చివరకు మాత్రం ఫ్లాట్‌గా ముగిశాయి. అమెరికాలో ఒక్కసారిగా ఆర్థిక మాంద్యం భయాలు చెలరేగగా.. అక్కడి స్టాక్ మార్కెట్ సూచీలు సోమవారం భారీగా పతనమయ్యాయి. నాస్‌డాక్ 4 శాతానికిపైగా పడిపోగా.. అక్కడి టెక్ స్టాక్స్ కుదేలయ్యాయని చెప్పొచ్చు. యాపిల్ కంపెనీ మార్కెట్ విలువ ఒక్కరోజులో రూ. 15 లక్షల కోట్లు పతనమైంది. ఇదే టెస్లా విషయానికి వస్తే స్టాక్ ధర 15 శాతం క్షీణించగా.. మార్కెట్ విలువ రూ. 11 లక్షల కోట్లు తగ్గింది. అమెరికా మార్కెట్ల ప్రభావం మంగళవారం రోజు ఆరంభంలో.. దేశీయ మార్కెట్లపైనా చూపింది.

ఆరంభంలో భారీగా నష్టపోయినప్పటికీ.. క్రమక్రమంగా కోలుకున్నాయని చెప్పొచ్చు. సెషన్ ముగిసేసరికి బొంబాయి స్టాక్ ఎక్స్చేంజి సూచీ సెన్సెక్స్ 12.85 పాయింట్ల నష్టంతో 74102.32 వద్ద ముగిసింది. నేషనల్ స్టాక్ ఎక్స్చేంజి సూచీ నిఫ్టీ 37 పాయింట్ల లాభంతో 22,497.90 వద్ద స్థిరపడింది.

అయితే ఇక్కడ ప్రధానంగా మంగళవారం రోజు దిగ్గజ ప్రైవేట్ రంగ బ్యాంకు.. ఇండస్‌ఇండ్ బ్యాంక్ స్టాక్ కుప్పకూలిపోయింది. గత కొద్ది రోజులుగా పడుతూనే వస్తున్న ఈ స్టాక్.. మంగళవారం ఇంకా ఎక్కువ పతనమైంది. బ్యాంకు డెరివేటివ్ పోర్ట్‌ఫోలియోలో అవకతవకలు ఉన్నట్లు ఇంటర్నల్ రివ్యూలో తేలింది. దీంతో బ్యాంక్ నికర లాభం దాదాపు రూ. 1500 కోట్లకుపైగా తగ్గుతుందని అంచనా వేశారు. ఇదే ప్రతికూల ప్రభావం చూపగా.. స్టాక్ ధర ఒక్కరోజే 27 శాతానికిపైగా పతనమైంది. ఆరంభంలో 5 శాతం, 10 శాతం, 15 శాతం, 20 శాతం ఇలా ఒక్కో బ్రేకింగ్ పాయింట్‌ను దాటుకుంటూ వచ్చి కుప్పకూలడం గమనార్హం. చివరకు 27.06 శాతం నష్టంతో రూ. 656.80 వద్ద సెషన్ ముగించింది.

అయితే ఇక్కడే ఇండస్‌ఇండ్ బ్యాంక్ షేర్లు పతనం అవడంతో.. దిగ్గజ జీవిత బీమా సంస్థ లైఫ్ ఇన్సూరెన్స్ కార్పొరేషన్ ఆప్ ఇండియాకు (LIC) భారీ నష్టాలు వచ్చాయి. ఎల్ఐసీ.. దేశీయ సంస్థాగత పెట్టుబడిదారుగా (DII) ఉంది. ఈ క్రమంలోనే స్టాక్ మార్కెట్లో పలు కంపెనీల్లో ఇన్వెస్ట్ చేస్తుంటుంది. ఈ క్రమంలోనే ఇండస్‌ఇండ్ బ్యాంకులో గతేడాది డిసెంబర్ 31 నాటికి.. ఎల్ఐసీకి 5.23 శాతం వాటాకు సమానమైన మొత్తం 3,77,37,210 షేర్లు ఉన్నాయి. మంగళవారం సెషన్ క్లోజింగ్ సమయానికి ఈ విలువ రూ. 2,50442 కోట్లుగా ఉంది. ఈ క్రమంలోనే ఒక్కరోజులో స్టాక్ ధర రూ. 243.70 పడిపోగా.. ఎల్ఐసీకి రూ. 919 కోట్లకుపైగా నష్టం వాటిల్లింది.