ఏకంగా మస్క్ కంపెనీతోనే..ఎయిర్‌టెల్ అదిరిపోయే డీల్

దేశంలోని దిగ్గజ టెలికాం సంస్థ భారతీ ఎయిర్‌టెల్ కీలక ప్రకటన చేసింది. ప్రపంచంలోనే అత్యంత ధనవంతుడైన ఎలాన్ మస్క్‌కు చెందిన స్పేస్ ఎక్స్‌తో డీల్ కుదుర్చుకుంది. దీని ద్వారా స్టార్ లింక్ శాటిలైట్ ఆధారిత ఇంటర్నెట్ సేవల్ని.. భారత్‌లోని తన కస్టమర్లకు అందించేందుకు భాగస్వామ్యం ఏర్పరచుకున్నట్లు స్టాక్ ఎక్స్చేంజీ ఫైలింగ్‌లో ఎయిర్‌టెల్ మంగళవారం వెల్లడించింది. భారతదేశంలో.. స్టార్ లింక్‌కు ప్రస్తుతం ఉన్నటువంటి అనుమతులకు లోబడి ఈ ఒప్పందం ఉంటుందని ఒక ప్రకటనలో తెలిపింది ఎయిర్‌టెల్. ఈ నేపథ్యంలోనే.. స్పేస్ ఎక్స్, ఎయిర్‌టెల్ కలిసి పరస్పరం ఈ విషయంలో ఎలా సహకరించుకోవాలనే అంశాలపై రెండు సంస్థల మధ్య ఒప్పందం కుదిరింది.

భారతీ ఎయిర్‌టెల్ మేనేజింగ్ డైరెక్టర్ గోపాల్ మిట్టల్ కూడా దీనిపై మాట్లాడారు. మన దేశంలోని ఎయిర్‌టెల్ కస్టమర్లకు.. స్టార్ లింక్ సేవల్ని అందించేందుకు స్పేస్ ఎక్స్‌తో కలిసి పనిచేయడం కీలక మైలురాయిగా అభివర్ణించారు. అత్యాధునిక శాటిలైట్ కనెక్టివిటీ అందించేందుకు ఎయిర్‌టెల్ కట్టుబడి ఉన్నట్లు వెల్లడించారు. ఈ డీల్‌తో ప్రపంచస్థాయి హై స్పీడ్ బ్రాడ్‌బ్యాండ్ సేవల్ని మారుమూల గ్రామాలకు కూడా అందించడంలో సహాయపడుతుందని తెలిపారు. స్టార్ లింక్ కూడా.. ఎయిర్‌టెల్ నెట్‌వర్క్ విస్తరించడం, సామర్థ్యాల పెంపుపై పనిచేస్తుంది.

ఈ డీల్ నేపథ్యంలో.. భారతీ ఎయిర్‌టెల్ స్టాక్ బుధవారం ట్రేడింగ్ సెషన్లో ఫోకస్‌లోకి వచ్చే అవకాశాలు ఉన్నట్లు తెలుస్తోంది. దీని గురించి ముందుగానే ఊహాగానాలు వచ్చిన వేళ.. మంగళవారం సెషన్లో భారత స్టాక్ మార్కెట్ సూచీలు ఒడుదొడుకుల్లో కొనసాగినప్పటికీ.. ఎయిర్‌టెల్ షేర్ మాత్రం పుంజుకుందని చెప్పొచ్చు. కిందటి సెషన్లో రూ. 1630.95 వద్ద ముగిసిన ఎయిర్‌టెల్ షేర్ ధర .. మంగళవారం రోజు 2.03 శాతం పెరిగి రూ. 1664 వద్ద సెషన్ ముగించింది. ప్రస్తుతం కంపెనీ మార్కెట్ విలువ రూ. 9.94 లక్షల కోట్లుగా ఉంది.

ఇప్పటికే మస్క్‌కు చెందిన ఎలక్ట్రిక్ కార్ల తయారీ సంస్థ.. టెస్లా భారత్‌లోకి త్వరలోనే ఎంట్రీ ఇవ్వనుంది. ఇటీవల ప్రధాని నరేంద్ర మోదీ అమెరికా పర్యటనలో మస్క్ ఆయన్ను కలిశారు. ఈ క్రమంలోనే టెస్లా ఎంట్రీపై స్పష్టత వచ్చినట్లు తెలిసింది. ఇటీవల టెస్లాలో ఉద్యోగాల కోసం సంస్థ నోటిఫికేషన్ కూడా విడుదల చేసింది. మరోవైపు ముంబైలో టెస్లా షోరూం కోసం కొంత స్థలం కూడా అద్దెకు తీసుకున్నట్లు వార్తలొచ్చాయి. త్వరలోనే ఎంట్రీపై అధికారిక ప్రకటన కూడా వచ్చే అవకాశాలు ఉన్నాయి. అయితే మరోవైపు.. టెస్లా స్టాక్ సోమవారం రోజు ఏకంగా 15 శాతానికిపైగా పడిపోయింది.