అమెరికా మద్యంపై 150 శాతం సుంకం విధిస్తోన్న భారత్.. వైట్‌హౌస్

అమెరికా వస్తువులపై పలు దేశాలు విధిస్తోన్న భారీ సుంకాలపై వైట్‌హౌస్ విచారం వ్యక్తం చేసింది. ఈ క్రమంలో అమెరికా మద్యం, వ్యవసాయ ఉత్పత్తులపై భారత్ భారీగా సుంకాలు విధిస్తోందని వైట్‌హౌస్ ప్రెస్ సెక్రటరీ కరోలిన్ లీవిట్ వ్యాఖ్యానించారు. ప్రతీకార సుంకాలతో అమెరికా అధ్యక్షుడు డొనాల్డ్ ట్రంప్ ప్రారంభించిన వాణిజ్య యుద్ధం ఎటు దారితీస్తుందోననే ఆందోళనలు వ్యక్తమవుతున్నాయి. అయితే, అధ్యక్షుడు ట్రంప్ పరస్పర సహకారాన్ని గౌరవిస్తారని, న్యాయమైన, పారదర్శకత వాణిజ్యాన్ని కోరుకుంటున్నారని లీవిట్ అన్నారు. మీడియా బ్రీఫింగ్‌లో ఆమె మాట్లాడుతూ.. దశాబ్దాలుగా అధిక సుంకాలతో అమెరికన్ల కష్టాన్ని కెనడా దోచుకుంటోందని ఆరోపించారు. సుంకాల తీరును పరిశీలిస్తే.. అమెరికన్లు, మా వర్కర్లపై కెనడా తీరు దారుణంగా ఉందని ఆమె మండిపడ్డారు.

అలాగే, జపాన్, భారత్‌లు విధిస్తోన్న సుంకాల గురించి లీవిట్ ప్రస్తావించారు. అమెరికన్లు వ్యాపారాలు, వర్కర్ల ప్రయోజనాల గురించి అధ్యక్షుడు ట్రంప్ ఆలోచిస్తున్నారని అన్నారు. ‘‘కేవలం కెనడా మాత్రమే కాదు అన్ని దేశాలూ అమెరికా వస్తువులపై అధిక సుంకాలు విధిస్తున్నాయి.. మన చీజ్, బటర్‌పై కెనడా 300 శాతం సుంకం వసూలు చేస్తోంది.. భారత్‌ విషయానికి వస్తే అమెరికా మద్యంపై 150 శాతం సుంకం విధిస్తోంది.. కెంటుకీ బోర్బన్‌ను భారత్‌కు ఎగుమతి చేయడానికి అది సహాయపడుతుందని మీరు భావిస్తున్నారా? నేను అలా అనుకోను.. భారత్ వ్యవసాయ ఉత్పత్తులపై 100 శాతం సుంకం వసూలు చేస్తోంది’’ అని లీవిట్ అన్నారు.

‘‘ఇక జపాన్‌ను తీసుకుంటే సుంకాల రేటు 700 శాతంగా ఉంది.. పరస్పర సహకారాన్ని అధ్యక్షుడు ట్రంప్ గౌరవిస్తారు.. అమెరికన్ల వ్యాపారాలు, వర్కర్ల ప్రయోజనాల కోసం ఆయన దృష్టిపెట్టారు.. న్యాయమైన, పారదర్శకమైన వాణిజ్యాన్ని కోరుకుంటున్నారు... కానీ, దురదృష్టవశాత్తు కెనడా దశాబ్దాలుగా అమెరికన్లను దోచుకుంటోంది’’ అని లీవిట్ వ్యాఖ్యానించారు.

ఇదిలా ఉండగా, పొరుగు దేశాలు కెనడా, మెక్సికోలపై భవిష్యత్తులో భారీగా సుంకాలు విధిస్తామని డొనాల్డ్ ట్రంప్ ఆదివారం ప్రకటించారు. అమెరికాను అంతర్జాతీయ సమాజం దోచుకుంటోందని ఆయన ఆరోపించారు. ‘అమెరికా నుంచి వాళ్లు డబ్బు తీసుకుంటున్నారు.. మనం చేస్తున్నదల్లా దానిలో కొంత తిరిగి పొందడం, మనం మన దేశాన్ని న్యాయంగా చూసుకోవడం’ అని వ్యాఖ్యానించారు.