పవన్.. అది బలం కాదు, వాపు.. అంబటి రాంబాబు

పిఠాపురం వేదికగా జయకేతనం పేరుతో జనసేన పార్టీ ఆవిర్భావ దినోత్సవం నిర్వహించిన సంగతి తెలిసిందే. ఈ కార్యక్రమంలో పాల్గొన్న ఏపీ డిప్యూటీ సీఎం, జనసేన చీఫ్ పవన్ కళ్యాణ్ వివిధ అంశాలపై మాట్లాడారు. వైసీపీపైనా విమర్శలు చేశారు. ఈ క్రమంలో పవన్ కళ్యాణ్ వ్యాఖ్యలకు వైసీపీ నేత, మాజీ మంత్రి అంబటి రాంబాబు కౌంటర్ ఇచ్చారు. కేవలం 21 సీట్లలో పోటీ చేసి.. 21 చోట్ల గెలిచి వంద శాతం స్ట్రైక్ రేట్ అంటూ గొప్పలకు పోతున్నారని ఎద్దేవా చేశారు. పవన్ కళ్యాణ్ రెండు గంటల పాటు మాట్లాడితే.. ఆ ఉపన్యాసం కనీసం ఆయనకైనా అర్థమైందో లేదోనంటూ అంబటి రాంబాబు సెటైర్లు వేశారు.

నిలబడ్డాం, టీడీపీని నిలబెట్టామంటున్న పవన్ కళ్యాణ్.. జనసేనను తెలుగుదేశం పార్టీకి బీటీమ్‌గా మార్చారని అంబటి రాంబాబు విమర్శించారు. పవన్‌ను, జనసేనను అడ్డం పెట్టుకుని కాపులను ఆకర్షించాలనేదే చంద్రబాబు నాయుడు ప్లాన్ అంటూ అంబటి రాంబాబు చెప్పుకొచ్చారు. 21 సీట్లలో పోటీచేసి, 21 సీట్లు గెలిచి వందశాతం స్ట్రైక్ రేట్ అంటున్న పవన్ కళ్యాణ్.. జనసేన ఎమ్మెల్యేలలో ఎంతమంది తన వాళ్లో చెప్పాలన్నారు. జనసేన ఎమ్మెల్యేలు, జయకేతనం వేదిక మీద ఉన్న వాళ్లల్లో ఎక్కువమంది టీడీపీ పంపిన వాళ్లు, వైసీపీ తిరస్కరించిన వాళ్లే ఉన్నారని అంబటి రాంబాబు సైటెర్లు వేశారు. వందశాతం స్ట్రైక్ రేట్ అంటున్న పవన్ కళ్యాణ్.. తన ఎమ్మెల్యేలలో ఎంత మంది తమ వాళ్లో చెప్పాలన్నారు.

పవన్ కళ్యాణ్ రాజకీయాల్లోకి వచ్చి ఆరోగ్యం చెడగొట్టుకున్నానని అంటున్నారని.. ఆయనకేమైనా డబ్బులు లేవా అంటూ అంబటి ప్రశ్నించారు. జయకేతనం సభలో రెండు గంటలపాటు సుదీర్ఘంగా మాట్లాడిన పవన్ కళ్యాణ్.. సూపర్ సిక్స్ హామీల సంగతి ఏమైనా చెప్పారా అంటూ అంబటి రాంబాబు నిలదీశారు. గతంలో ఉత్తరాది వారి అహంకారం అని మాట్లాడిన పవన్.. ఇప్పుడు వారికి సహకారిగా ఎందుకు మారారన్నారు. పవన్ కళ్యాణ్ సిద్ధాంతం ఏంటో ఆయనకే తెలియదని.. ఊసరవెళ్లిలాగా పవన్ కళ్యాణ్ మారిపోతున్నారంటూ అంబటి రాంబాబు తీవ్ర వ్యాఖ్యలు చేశారు. జయకేతనం సభలో నాలుగు భాషల్లో మాట్లాడి, దక్షిణాది నాయకుడిగా చెప్పుకునే ప్రయత్నంలో పవన్ కళ్యాణ్ ఉన్నారని అంబటి విమర్శించారు.

ఇక వారసత్వ రాజకీయాలను విమర్శించే పవన్ కళ్యాణ్.. తన అన్నకు ఎమ్మెల్సీ సీటు ఎందుకు ఇచ్చారని అంబటి రాంబాబు ప్రశ్నించారు. పవన్ కళ్యాణ్ నిలకడలేని మాటలు మాట్లాడుతున్నారని, అవకాశవాద రాజకీయాలు చేస్తున్నారంటూ మాజీ మంత్రి అంబటి రాంబాబు స్ట్రాంగ్ కౌంటర్ ఇచ్చారు.