తిరుపతి తొక్కిసలాట ఘటనపై విచారణ.. ఎక్కడి వరకూ వచ్చిందంటే

తిరుమల వైకుంఠ ద్వార దర్శన టోకెన్లు జారీ సందర్భంగా తిరుపతిలో తొక్కిసలాట జరిగిన సంగతి తెలిసిందే.ఈ ఘటనలో ఆరుగురు చనిపోగా.. 40 మంది వరకూ గాయపడ్డారు. ఈ ఘటనపై ఏపీ ప్రభుత్వం న్యాయ విచారణకు ఆదేశించింది. విశ్రాంత న్యాయమూర్తి జస్టిస్ సత్యనారాయణమూర్తి నేతృత్వంలో ఏక సభ్య న్యాయ విచారణ కమిషన్ ఏర్పాటు చేసిన సంగతి తెలిసిందే. ఈ క్రమంలో జస్టిస్‌ సత్యనారాయణమూర్తి తిరుపతిలో శనివారం పలు చోట్ల పరిశీలన జరిపారు. వైకుంఠ క్యూ కాంప్లెక్స్, నారాయణగిరి ఉద్యానవనంలో కమిటీ ఛైర్మన్‌ను జస్టిస్ సత్యనారాయణమూర్తి విచారించారు. క్యూ లైన్లలోకి భక్తులను ఏ విధంగా అనుమతిస్తున్నారనే అంశాలను జస్టిస్ సత్యనారాయణమూర్తి అడిగి తెలుసుకున్నారు.

మరోవైపు తొక్కిసలాట ఘటనపై జస్టిస్ సత్యనారాయణమూర్తి ఫిబ్రవరిలో విజయవాడ నుంచి వర్చువల్‌ విధానంలో బాధితులను విచారించారు. అలాగే తిరుపతి కలెక్టరేట్‌ వేదికగానూ 11 మందిని విచారించారు. తొక్కిసలాట ఘటనలో బాధితులు ఇతర రాష్ట్రాలకు చెందినవారు ఉండటంతో వర్చువల్‌ పద్ధతిలోనూ విచారణ కమిషన్‌ చైర్మన్‌ జస్టిస్‌ సత్యనారాయణమూర్తి విచారించారు. జనవరి 8న తిరుపతిలో తొక్కిసలాట జరగింది. ఈ ఘటనలో ఆరుగురు చనిపోయారు. 48 మంది వరకూ గాయపడ్డారు. ప్రమాద ఘటనపై చంద్రబాబు సీరియస్ అయ్యారు. ప్రమాదంపై వాస్తవాలను వెలుగులోకి తెచ్చేందుకు, ప్రమాదానికి కారణమైన వారిని గుర్తించడంతో సహా చర్యలు తీసుకునేందుకు ఏకసభ్య న్యాయ విచారణ కమిషన్‌ను నియమించారు.

హైకోర్టు విశ్రాంత న్యాయమూర్తి జస్టిస్‌ ఎం.సత్యనారాయణమూర్తి నేతృత్వంలో ఏకసభ్య విచారణ కమిషన్‌ను ఏపీ ప్రభుత్వం నియమించింది. సివిల్‌ కోర్టుకు ఉన్న అధికారాల్ని కమిషన్‌కు దఖలుపరిచింది. అలాగే విచారణలో భాగంగా ఎవరికైనా సమన్లు జారీచేసే అధికారాన్ని ఇచ్చింది. ఆరు నెలల్లోగా విచారణ పూర్తి చేసి నివేదిక సమర్పించాలని ప్రభుత్వం ఉత్తర్వుల్లో స్పష్టం చేసింది. ఏకసభ్య కమిషన్ తొక్కిసలాట ఘటనపై విచారణ చేయడంతో పాటుగా మరోసారి ఇలాంటి ఘటనలు జరగకుండా ఎలాంటి చర్యలు తీసుకోవాలో సిఫార్చు చేయనుంది. శ్రీవారి భక్తుల రక్షణ, భద్రతపైనా ఏకసభ్య విచారణ కమిషన్ ప్రభుత్వానికి పలు సూచనలు చేయనుంది.