ఆ అనుమతులు రద్దు..,,,సీఎం చంద్రబాబు సంచలన నిర్ణయం

ఆంధ్రప్రదేశ్ ప్రభుత్వం మరో కీలక నిర్ణయం తీసుకుంది. తిరుమల ఏడుకొండలకు సమీపంలో తలపెట్టిన ముంతాజ్ హోటల్ ప్రాజెక్టు అనుమతులు రద్దు చేసింది. ఈ విషయాన్ని ఆంధ్రప్రదేశ్ ముఖ్యమంత్రి నారా చంద్రబాబు నాయుడు ప్రకటించారు. మనవడు నారా దేవాన్ష్ పుట్టినరోజు సందర్భంగా సీఎం చంద్రబాబు కుటుంబ సభ్యులతో కలిసి తిరుమల శ్రీవారిని దర్శించుకున్నారు. అనంతరం వెంగమాంబ అన్నదాన కేంద్రంలో దేవాన్ష్ పేరుతో అన్నదానం నిర్వహించారు. అనంతరం తిరుమల తిరుపతి దేవస్థానం అధికారులతో సమీక్ష జరిపారు చంద్రబాబు. ఈ సందర్బంగా పలు కీలక వివరాలు వెల్లడించారు.

కలియుగ ప్రత్యక్ష దైవం శ్రీనివాసుడు నెలవైన ఏడు కొండల్లో ఎలాంటి అపవిత్ర కార్యక్రమాలు జరగకూడదని చంద్రబాబు అభిప్రాయపడ్డారు. తిరుమలలో పరిశుభ్రతకు అధిక ప్రాధాన్యం ఇస్తున్నామన్నారు. ఈ క్రమంలోనే ఏడుకొండలకు సమీపంలో వాణిజ్య కార్యకలాపాల అంశం గురించి మాట్లాడిన చంద్రబాబు.. ఏడుకొండలకు ఆనుకుని ముంతాజ్ హోటల్ నిర్మాణానికి ప్రభుత్వం ఇచ్చిన అనుమతులు రద్దు చేస్తున్నట్లు ప్రకటించారు. 35.32 ఎకరాల విస్తీర్ణంలో ముంతాజ్ హోటల్ నిర్మించాలని తొలుత ప్రణాళికలు రచించారు. హోటల్ యాజమాన్యం కేవలం శాఖాహారం మాత్రమే అందించాలని నిర్ణయించింది.

అయితే ఏడుకొండలకు సమీపంలో ఎలాంటి ప్రైవేట్ కమర్షియల్ నిర్మాణాలకు అనుమతులు ఇవ్వకూడదని ఏపీ ప్రభుత్వం నిర్ణయించింది. ఈ విషయాన్ని ముఖ్యమంత్రి చంద్రబాబు నాయుడు తెలిపారు. ఏడుకొండల సమీపంలో ఎలాంటి కమర్షియలైజేషన్‌కు అనుమతులు ఇవ్వమని తెలిపారు. మరోవైపు పవిత్రమైన ఏడుకొండలకు సమీపంలో ఇలాంటి రిసార్ట్ నిర్మాణం ఏమిటంటూ ఇటీవల వ్యతిరేకత పెరుగుతోంది. తిరుపతిలో స్వామీజీలు కూడా ఆందోళన చేపట్టిన సంగతి తెలిసిందే. ఈ క్రమంలోనే ముంతాజ్ హోటల్ అనుమతులు రద్దు చేస్తున్నట్లు చంద్రబాబు నాయుడు ప్రకటించడం ప్రాధాన్యం సంతరించుకుంది.

మరోవైపు టీటీడీ ఉద్యోగుల విషయంలో చంద్రబాబు కీలక ప్రకటన చేశారు. తిరుమల శ్రీవారి ఆలయంలో కేవలం హిందువులను మాత్రమే ఉద్యోగాల్లో నియమిస్తామన్నారు. టీటీడీలో ఇతర మతస్థులు ఎవరైనా ఉద్యోగాలు చేస్తూ ఉంటే వారి మనోభావాలు దెబ్బతినకుండా.. ఇతర శాఖల్లోకి బదిలీలు చేస్తామని చంద్రబాబు ప్రకటించారు. ఇక దేశవ్యాప్తంగా అన్ని రాష్ట్రాల రాజధానుల్లోనూ శ్రీవారి ఆలయాలను నిర్మిస్తామని చంద్రబాబు తెలిపారు.