హమాస్‌తో సంబంధాలు.. అమెరికాలో భారతీయ విద్యార్థి అరెస్ట్

భారత దేశానికి చెందిన ఓ విద్యార్థిని అమెరికా పోలీసులు అరెస్ట్ చేశారు. ముఖ్యంగా హమాస్ ఉగ్రవాదులతో అతడికి సంబంధాలు ఉన్నాయనే ఆరోపణల నేపథ్యంలో అరెస్ట్ చేసినట్లు సమాచారం. అంతేకాకుండా అతడు తాను చదువుకుంటున్న యూనివర్సిటీలో హమాస్‌కు మద్దతుగా ప్రచారం చేస్తుండగా.. అతడి వీసాను కూడా రద్దు చేశారు. దీనిపై సదరు విద్యార్థి ఇమిగ్రేషన్ కోర్టులో సవాల్ కూడా చేశాడు. తనకు ఏ ఉగ్రవాదులతో సంబంధం లేదని, గతంలో ఎలాంటి నేర చరిత్ర లేదని చెప్పారు. అందుకు సంబంధించిన పూర్తి వివరాలు మీకోసం.

భారత దేశానికి చెందిన బదర్ ఖాన్ సూరి స్టూడెంట్ వీసాపై అమెరికాకు వెళ్లాడు. ముఖ్యంగా ఉన్నత చదువులు చదివేందుకు అక్కడకు వెళ్లిన సూరి.. వాషింగ్టన్ డీసీలోని జార్డ్ టౌన్ యూనివర్సిటీలో పోస్ట్ డాక్టోరల్‌గా ఉన్నారు. అయితే గత కొంత కాలంగా సూరి హమాస్‌కు మద్దతుగా ప్రచారం చేస్తున్నారని డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీలోని అసిస్టెంట్ సెక్యూరిటీ ట్రిసియా మెక్ లాఫ్లిన్ ఆరోపించారు.

అంతేకాకుండా ఉగ్రవాద సంస్థలోని పలువురితో సూరికి సన్నిహిత సంబంధాలు ఉన్నాయని ఆమె పేర్కొన్నారు. దీంతో అతడి వీసాను కూడా రద్దు చేసినట్లు వివరించారు. ఈక్రమంలోనే ఫెడరల్ ఏజెంట్లు సోమవారం వర్జీనియాలోని అతడి ఇంటి వెలుపల అరెస్టు చేసినట్లు వెల్లడించారు. అయితే దీనిపై బదర్ ఖాన్ సూరి ఇమిగ్రేషన్ కోర్టులో సవాల్ చేసినట్లు తెలుస్తోంది. తనకు ఎలాంటి నేర చరిత్ర లేదని.. తన భార్యకు పాలస్తీనా మూలాలు ఉన్న కారణంగానే తనను లక్ష్యంగా చేసుకున్నారని ఆయన చెబుతున్నారు.

ముఖ్యంగా ఈ ఘటనపై జార్జ్ టౌన్ యూనివర్సిటీ స్పందించింది. బదర్ ఖాన్ సూరి డాక్టోరల్ పరిశోధకుడిగా ఉన్నారని.. ఆయన ఎలాంటి చట్టవిరుద్ధమైన చర్యల్లో పాల్గొంటున్నారు, ఈ అరెస్టుకు అసలు కారణం ఏంటనేది కూడా తమకు తెలియదని చెప్పింది. ఈ కేసుకు సంబంధించి బహిరంగ విచారణకు తాము పూర్తిగా మద్దతిస్తామని పేర్కొంది. కోర్టు న్యాయబద్ధమైన తీర్పును ఇస్తుందని ఆశిస్తున్నట్లు ఓ ప్రకటనలో వెల్లడించింది.