బాత్రూంలో ఉండి వర్చువల్ హియరింగ్‌లో పాల్గొన్న వ్యక్తిపై గుజరాత్ హైకోర్టు ఫైర్!

వర్చువల్ కోర్టు విచారణ వ్యాజ్యాలకు ఎక్కడి నుంచి అయినా హాజరు కావడానికి అనుమతిస్తారనే విషయం అందరికీ తెలిసిందే. అయితే ఇద్దరు వ్యక్తులు మాత్రం దీన్ని అదునుగా చేసుకుని ఎవరూ ఊహించని విధంగా వర్చువల్ హియరింగ్‌లో పాల్గొన్నారు. ముఖ్యంగా ఒకరు బాత్రూంలో ఉండే హాజరు కాగా, మరొకరు మంచంపై పడుకుని దర్శనం ఇచ్చారు. దీంతో తీవ్ర ఆగ్రహానికి గురైన గుజరాత్ హైకోర్టు న్యాయమూర్తి ఇద్దరు వ్యక్తులకు భారీ ఎత్తున జరిమానాలు విధించారు. ఆ పూర్తి వివరాలు మీకోసం.

42 ఏళ్ల ధవల్ పటేల్ గుజరాత్ హైకోర్టులో ఓ వ్యాజ్యం వేశారు. అయితే ఈకేసు వర్చువల్ హియరింగ్ ఉండగా.. జస్టిస్ ఎంకే ఠక్కర్ నేతృత్వంలోని ధర్మాసనానికి ఆన్‌లైన్‌ వీడియో లింక్ ద్వారా విచారణలో చేరాడు. అసభ్యకర స్థితిలోనే హియరింగ్‌లో పాల్గొనగా.. కోర్టు అతడి ఫోన్‌ను కట్ చేసింది. ఆ తర్వాత మళ్లీ లింక్ పంపి కాల్ కనెక్ట్ చేయగా.. ఈసారి బాత్రూం నుంచి విచిరాణకు హాజరయ్యాడు. దీంతో మరోసారి లింక్‌ను డిస్‌కనెక్ట్ చేశారు. ఈక్రమంలోనే అతడు ఏం చేస్తాడు, తెలియక ఇలా చేస్తున్నాడేమో అనుకుని ఎంకే ఠక్కర్ విచారించగా.. అగ్ర కార్పొరేట్ సంస్థలో పని చేస్తున్న గ్రాడ్యుయేట్‌గా గుర్తించారు.

ఉన్నత చదువులు చదివిన వ్యక్తే ఇలా చేయడంతో.. జస్టిస్ ఎంకే ఠక్కర్ తీవ్ర ఆగ్రహానికి గురయ్యారు. మార్చి 5వ తేదీన ఈ విచారణ జరగ్గా.. ధవల్ పటేల్ అసభ్యకరమైన చర్య ఆమోద యోగ్యం కాదని, ఇది సిగ్గుచేటు అంటూ వ్యాఖ్యానించారు. దీన్ని తీవ్రంగా ఖండించాల్సిన అవసరం ఉందంటూనే.. ప్రజల దృష్టిలో కోర్టు గౌరవం కాపాడేందుకు అతడికి జరిమానా విధిస్తున్నట్లు ప్రకటించారు. వెయ్యి కాదు పదివేలు కాదు ఏకంగా 2 లక్షల రూపాయల జరిమానా విధించారు.

అయితే ఇందులో 50 వేల రూపాయలను గుజరాత్ హైకోర్టు లీగల్ ఎయిర్ అథారిటీలో జమ చేయాలని చెప్పగా.. మిగతా రూ.1.5 లక్షలను పాల్డిలోని అనాథ ఆశ్రమానికి విరాళంగా ఇవ్వాలని సూచించింది. అలాగే ధవల్ పటేల్ సోలాలోని హైకోర్టు ప్రాంగంలోని తోటలను రెండు వారాల పాటు శుభ్రం చేసి నీరు పెట్టాలని, ప్రతిరోజూ 8 గంటలు సమాజ సేవ చేయాలని ఆదేశాలు జారీ చేశారు. ఇదిలా ఉండగా... ఫిబ్రవరి 13న ఓ న్యాయవాది వామదేవ్ గధ్వి వర్చువల్ కోర్టు సెషన్‌లో చేరారు. ఆరోజు కూడా జస్టిస్ ఠక్కర్.. లాయర్ మంచంపై పడుకుని వర్చువల్ హియరింగ్ లో పాల్గొనడాన్ని గుర్తించారు. ఇది తప్పని చెబుతూనే.. రూ.25,000 జరిమానా విధించారు.