తండ్రి మృతదేహాన్ని తీసుకెళ్తుండగా గుండెపోటుతో కుమారుడి మృతి

చిన్నప్పటి నుంచి తమ బాగు కోసం విపరీతంగా కష్టపడిన తండ్రిని బాగా చూసుకోవాలనుకున్నాడు. కానీ దురదృష్ట వశాత్తు పలు ఆరోగ్య సమస్యలతో ఆయన ఆస్పత్రిలో చేరాడు. చికిత్స పొందుతూ మృతి చెందాడు. విషయం తెలుసుకున్న కుమారుడు అది నమ్మలేక మరో ఆస్పత్రికి తీసుకెళ్లాడు. అక్కడ కూడా తండ్రి చనిపోయినట్లు వైద్యులు చెప్పగా.. అంత్యక్రియల కోసం మృతదేహాన్ని ఇంటికి తీసుకెళ్లాడు. అయితే మార్గమధ్యంలోనే కుమారుడు విపరీతంగా ఏడుస్తూ.. నాన్నా నాన్నా అంటూ ఒక్కసారిగా కుప్పకూలిపోయాడు. స్థానికులు వచ్చి చూసేలోపు అతడు గుండెపోటుతో మృతి చెందాడు. ఈ హృదయ విదారక ఘటన ఎక్కడ జరిగిందో మనం ఇప్పుడు తెలుసుకుందాం.

ఉత్తర ప్రదేశ్ కాన్పూర్‌కు చెందిన లైక్ అహ్మద్‌కు ఇద్దరు కుమారులు ఉన్నారు. ఇప్పటికే వారిద్దరికీ పెళ్లిళ్లు అయి పిల్లలు కూడా పుట్టారు. అయితే మనవళ్లు, మనవరాళ్లతో హాయిగా గడపాల్సిన ఈ సమయంలోనే లైక్ అహ్మద్‌కు అనారోగ్య సమస్యలు మొదలు అయ్యాయి. ముఖ్యంగా మార్చి 20వ తేదీన ఆయన ఆరోగ్యం మరింత క్షీణించగా కుమారులు స్థానికంగా ఉండే ఓ ప్రైవేట్ నర్సింగ్ హోమ్‌కు తరలించారు. చికిత్స పొందుతుండగానే లైక్ అహ్మద్ ప్రాణాలు కోల్పోయాడు. ఈ విషయాన్ని వైద్యులు ఆయన కుటుంబ సభ్యులకు తెలియజేశారు.

ముఖ్యంగా చిన్న కుమారుడు అతిక్ తండ్రి మృతిని తట్టుకోలేకపోయాడు. మా నాన్న చనిపోలేదని వైద్యులతో వాదిస్తూనే.. కార్డియాజీలో ప్రత్యేకత కల్గిన ఆసుపత్రికి తరలించారు. అక్కడి వైద్యులు సైతం లైక్ అహ్మద్ అప్పటికే ప్రాణాలు కోల్పోయాడని ధ్రువీకరించారు. దీంతో అతిక్ తీవ్ర నిరాశకు గురయ్యాడు. తండ్రి మరణాన్ని తట్టుకోలేక విపరతీంగా రోదించాడు. నాన్నా నాన్నా అంటూ కన్నీళ్లు కారుస్తూనే ఉన్నాడు. అయితే అంబులెన్సు ద్వారా ఆయన మృతదేహాన్ని గ్రామానికి తరలించాలని కుటుంబ సభ్యులు నిర్ణయించారు.

తల్లి, పెద్ద కుమారుడు లైక్ అహ్మద్ మృతదేహాన్ని అంబులెన్సులో ఉంచి తీసుకెళ్తుండగా.. చిన్న కుమారుడు అతిక్ మాత్రం ద్విచక్రవాహనంపై వారి వెనకాలే వస్తున్నాడు. మార్గమధ్యంలోకి రాగానే.. అతిక్ ఒక్కసారిగా కుప్పకూలిపోయాడు. విషయం గుర్తించిన స్థానికులు, కుటుంబ సభ్యులు వెంటనే అతడి వద్దకు పరుగులు పెట్టుకుంటూ వచ్చారు. ఏమైందని చూసేలోపే శ్వాస ఆగిపోవడం గుర్తించారు. దీంతో తండ్రి మృతదేహాన్ని తీసుకెళ్తున్న అంబులెన్సు ద్వారానే అతడిని మరో ఆస్పత్రికి తరలించారు. పరీక్షించిన వైద్యులు అతిక్ గుండెపోటుకు గురై ప్రాణాలు కోల్పోయినట్లు తెలిపారు.

దీంతో చేసేదేమీ లేక తండ్రీ, కొడుకుల ఇద్దరు మృతదేహాలను గ్రామానికి తీసుకెళ్లి అంత్యక్రియలు నిర్వహించారు. ఒకసారి వీరిద్దరూ చనిపోవడంతో.. గ్రామస్థులతో పాటు బంధువులంతా కన్నీరు పెడుతున్నారు. చిన్నప్పటి నుంచి అతిక్‌కు తండ్రి అంటే అమితమైన ప్రేమ ఉండేదని.. ఆయన మరణ వార్త తట్టుకోలేక గుండెపోటుకు గురయ్యాడని కుటుంబ సభ్యులు వివరిస్తున్నారు. అతిక్‌కు ఇప్పటికే పెళ్లి కాగా.. ఓ కుమార్తె కూడా ఉంది.