ఇంటర్ మ్యాథ్స్ పేపర్ లీక్.. మొత్తం పరీక్షలను రద్దుచేసిన ప్రభుత్వం

పరీక్షకు ఒక రోజు ముందు భద్రతా సీల్‌ను పగలగొట్టి పేపర్‌ను లీక్ చేశారు. దీంతో తర్వాత జరగాల్సిన మొత్తం 11వ తరగతి బోర్డు పరీక్షల్ని రద్దు చేస్తూ అసోం ప్రభుత్వం సంచలన నిర్ణయం తీసుకుంది. మార్చి 24 నుంచి 29 వరకు జరగాల్సి ఉన్న 36 సబ్జెక్టుల పరీక్షలను రద్దు చేస్తున్నట్లు అసోం విద్యాశాఖ మంత్రి రనోజ్‌ పేగు ప్రకటించారు. ఈ మేరకు ఆయన ఎక్స్‌ వేదికగా వెల్లడించారు. అసోంలో మార్చి 21న జరిగిన 11వ తరగతి మ్యాథ్స్ ప్రశ్నాపత్రం లీక్ కావడంతో 10 జిల్లాల్లోని 15 స్కూల్స్‌పై సస్పెన్షన్ విధించారు. ఇందులో మూడు ప్రభుత్వ పాఠశాలల పాత్ర ఉన్నట్టు గుర్తించామని మంత్రి తెలిపారు.

‘మార్చి 21న 11వ తరగతి మ్యాథమెటిక్స్ ప్రశ్నాపత్రం సీల్‌ను పరీక్షకు ఒకరోజు ముందుగానే తొలగించి లీక్ చేశారు.. ఈ వ్యవహారంలో ఇప్పటికే 10 జిల్లాలోని 15 ప్రైవేటు స్కూల్స్‌ గుర్తింపుపై సస్పెన్షన్‌ విధించాం. నిబంధనలు ఉల్లంఘించిన మరో మూడు ప్రభుత్వ పాఠశాలల పైనా చర్యలు చేపడతాం.. ఈ పాఠశాల్లో వచ్చే విద్యా సంవత్సరం (2025-26) లో ప్రవేశాలపై నిషేధం విధిస్తున్నాం.. 18 కేంద్రాల్లో పేపర్ లీకైంది.. మిగతా చోట్ల నిబంధనలు ప్రకారం జరిగాయి’’ అని మంత్రి రనోజ్ పేగు పేర్కొన్నారు. కాగా, మార్చి 6న అసోంలో ప్రారంభమైన 11వ తరగతి బోర్డు పరీక్షలు 29న పూర్తి కావాల్సి ఉంది. కానీ, పేపర్ లీక్‌తో అర్ధాంతరంగా మిగతా పరీక్షలను రద్దు చేశారు. కాగా, దీనిపై సమగ్ర దర్యాప్తు చేపట్టాలని, విద్యాశాఖ మంత్రి పేగు రాజీనామా చేయాలని విద్యార్థి సంఘాలు, ప్రతిపక్షాలు డిమాండ్‌ చేస్తున్నాయి.

కాగా, లీక్ అయిన పేపర్లు సోషల్ మీడియాలో వైరల్ కావడంతో తీవ్ర దుమారం రేగింది. అయితే, దీని వెనుక కుట్రదారులను గుర్తించి, కఠిన చర్యలు తీసుకుంటామని అసోం ప్రభుత్వం తెలిపింది. అయితే, అసోంలోని బర్పెట్ జిల్లాలో 9 వ తరగతి ఇంగ్లిష్ ప్రశ్నాపత్రం లీక్ కావడంతో ఆ పరీక్షను రద్దుచేశారు. వరుసగా ఈ ఘటనలపై విద్యార్ధి సంఘాలు భగ్గుమంటున్నాయి. విద్యా మంత్రి, స్టేట్ బోర్డు అధ్యక్షుడు ఆర్సీ జైన్‌ను తక్షణమే తొలగించాలని ఆందోళనలు కొనసాగిస్తున్నాయి. ఈ విషయంలో బీజేపీ ప్రభుత్వం పూర్తిగా విఫలమైందని ఆరోపిస్తున్నాయి.