ఒక్క ఏడాదిలోనే రూ.51 లక్షల కోట్లు,,,ప్రతీకార సుంకాల వల్ల అమెరికాకు భారీ ఆదాయం

అగ్రరాజ్యం అమెరకా అధ్యక్షుడు డొనాల్డ్ ట్రంప్ భారత్, చైనా సహా అనేక దేశాలపై నేటి నుంతే ప్రతీకార సుంకాలు వసూలు చేస్తున్నారు. అయితే అనేక దేశాలు తమపై అన్యాయంగా సుంకాలు వసూలు చేస్తున్నాయని.. ఇప్పుడు ఆయా దేశాలపై పగ తీర్చుకునే సమయం ఆసన్నమైందంటూ ఇటీవలే ప్రకటించారు. అయితే ఈ ప్రతీకార సుంకాల వల్ల అమెరికా భారీగా ఆదాయం లభించబోతుందని వైట్‌హౌస్ చెబుతోంది. ఒక్క సంవత్సరానికి రూ.51 లక్షల కోట్లు సమకూరే అవకాశం ఉందని అంచనా వేస్తోంది. మరి ఆ లెక్కలు నిజమేనా కాదా అనేది మనం ఇప్పుడు తెలుసుకుందాం.

అమెరికా అధ్యక్షుడిగా రెండోసారి పదవీ బాధ్యతలు చేపట్టిన తర్వాత తొలిసారి కాంగ్రెస్ సంయుక్త సెషన్‌లో ప్రసగించిన ట్రంప్.. షాకింగ్ కామెంట్లు చేశారు. ముఖ్యంగా భారత్, చైనా వంటి దేశాలపై విధించిన ప్రతీకార సుంకాలను ఏప్రిల్ 2వ తేదీ నుంచి అమలు చేస్తామని ప్రకటించారు. ఆయా దేశాలు తమపై ఏ స్థాయిలో సుంకాలు విధిస్తున్నాయో తాము కూడా అంతే విధిస్తామని వెల్లడించారు. దీని వల్ల అమెరికా సంపన్నంగా మారుతుందని స్పష్టం చేశారు. చెప్పినట్లుగానే ఈరోజు నుంచే ట్రంప్ ప్రతీకార సుంకాలను ఈరోజు నుంచే అమలు చేస్తున్నారు.

అయితే ఆయన ముందుగా చెప్పినట్లుగానే ప్రతీకార సుంకాల వల్ల అమెరికాకు భారీ ఆదాయం వస్తుందని వైట్‌హౌస్ వాణిజ్య సలహాదారు పీటర్ నవారో తెలిపారు. కొత్త టారిఫ్‌ల వల్ల ఏటా 600 బిలియన్ డాలర్ల ఆదాయం సమకూరే అవకాశం ఉందన్నారు. ఆటో టారిఫ్‌ల వల్ల మరో 100 బిలియన్ డాలర్లు ఎక్కువగా వస్తాయని చెప్పారు. ఇలా 10 సంవత్సరాల కాలంలో అమెరికాకు 6 ట్రిలియన్ డాలర్లు సమకూరనున్నట్లు పేర్కొన్నారు. అయితే దీనిపై ట్రెజరీ సెక్రటరీ స్కాట్ బెసెంట్ మాట్లాడుతూ.. భారీ ఆదాయం కష్టమేనన్నారు. ఈ సుంకాలపై పరిమితి ఉంటుందని.. ఆయా దేశాలతో చర్చల తర్వాత వీటిని తగ్గించే అవకాశం ఉంటుందని చెప్పుకొచ్చారు.

మరోవైపు ఆర్థిక నిపుణులు వైట్‌హౌస్ వర్గాలు భావిస్తున్నట్లుగా అంత పెద్ద మొత్తంలో ఆదాయం లభించదని అంటున్నారు. 100 బిలియన్ డాలర్ల నుంచి 200 బిలియన్ డాలర్లు వస్తే అదృష్టం అని మూడీ చీఫ్ ఎకానమిస్ట్ మార్క్ జాండీ వెల్లడించారు. మరోవైపు దిగుమతులపై సరాసరి 20 శాతం పన్ను విధిస్తే ఒక్కో కుటుంబంపై అదనంగా 3400 డాలర్ల నుంచి 4200 డాలర్ల భారం పడనున్నట్లు యేల్ యూనివర్సిటీ నిపుణులు అంచనా వేస్తున్నారు. చూడాలి మరి ఏం జరగనుంది అనేది.