ఆస్పత్రిలో చేరిన పాకిస్థాన్ అధ్యక్షుడు అసిఫ్ అలీ జర్దారీ.

పాకిస్థాన్ అధ్యక్షుడు అసిఫ్ అలీ జర్దారీ అనారోగ్యం పాలయ్యారు. దీంతో విషయం గుర్తించిన కుటుంబ సభ్యులు వెంటనే ఆయన్ను 300 కిలో మీటర్ల దూరంలో ఉన్న కరాచీలోని ఓ ఆస్పత్రిలో చేర్పించారు. ప్రస్తుతం ఆయనకు వైద్యులు మెరుగైన వైద్య సేవలు అందిస్తుండగా.. అసలేమైందో తెలుసుకోవాలని ప్రజలంతా ఆసక్తి కనబరుస్తున్నారు. 69 ఏళ్ల వయసు కల్గిన అసిఫ్ అలీ జర్దారీ ఈ మధ్య కాలంలో అనేక సార్లు అనారోగ్యానికి గురవుతున్నారు. మరి ఆయన ఏ సమస్యలతో బాధ పడుతున్నారు, ప్రస్తుతం ఆస్పత్రిలో ఎందుకు చేరాల్సి వచ్చిందో మనం ఇప్పుడు తెలుసుకుందాం.

69 ఏళ్ల వయసు కల్గిన పాకిస్థాన్ అధ్యక్షుడు అసిఫ్ అలీ జర్దారీ సోమవారం రోజు రంజాన్ పండుగ సందర్భంగా వేడుకలు చేసుకున్నారు. ముఖ్యంగా నవాబ్ షాలోని జర్దారీ హౌస్‌లో ఈద్-ఉల్-ఫితర్ ప్రార్థనల్లో పాల్గొన్నారు. అసిఫ్ అలీ జర్దారీతో పాటు జాతీయ అసెంబ్లీ డిప్యూటీ స్పీకర్ గులాం ముస్తఫా షా, ప్రావిన్షియల్ మంత్రి అలీ హసన్, జియా లంజార్ సహా.. అనేక మంది ప్రముఖులు హాజరయ్యారు. అంతా కలిసి దేవుడికి ప్రార్థనలు చేసుకుని.. ఆపై మిఠాయిలు పంచి పెట్టుకున్నారు. ఇలా అందరితో కలిసి రోజంతా హాయిగా గడిపిన పాకిస్థాన్ అధ్యక్షుడు మంగళ వారం రోజు అస్వస్థతకు గురయ్యారు. ముఖ్యంగా తీవ్ర జ్వరంతో బాధ పడుతూ.. పైకి లేవలేకపోయారు.

విషయం గుర్తించిన కుటుంబ సభ్యులు.. వెంటనే అసిఫ్ అలీ జర్దారీని 300 కిలో మీటర్ల దూరంలో ఉన్న కరాచీ ఆస్పత్రికి తరలించారు. ఈక్రమంలోనే వైద్యులు ఆయనకు పరీక్షల నిర్వహిస్తున్నారు. ఆస్పత్రి వద్ద భద్రతను పెంచి మరీ.. లోపలికి ఎవరినీ రానీయకుండా జాగ్రత్తలు తీసుకుంటున్నారు. అసిఫ్ అలీ జర్దారీ ప్రస్తుతం తీవ్ర జ్వరంతో పాటు ఇన్ఫెక్షన్ సమస్యలతో బాధ పడుతున్నారని.. 24 గంటలు అబ్జర్వేషన్‌లో ఉంచితే తప్ప అసలు విషయం తెలియదని వైద్యులు చెబుతున్నారు.

ఇదిలా ఉండగా.. ఈమధ్య కాలంలో పాకిస్థాన్ అధ్యక్షుడు అసిఫ్ అలీ జర్దారీ ఆరోగ్య పరిస్థితి అస్సలే బాగుండడం లేదు. పలుమార్లు అనారోగ్యానికి గురవుతూ ఆస్పత్రుల్లో చేరుతున్నారు. 2024వ సంవత్సరం చివర్లో.. అసిఫ్ అల్ జర్దారీ దుబాయ్‌లో విమానం దిగబోతు కింద పడిపోయారు. వెంటనే సిబ్బంది అతడిని ఆస్పత్రికి తరలించారు. పరీక్షించిన వైద్యులు కాలు ఫ్రాక్చర్ అయినట్లు తెలిపారు. అంతేకాకుండా కాలుకు కట్టు కట్టి నాలుగు వారాలు విశ్రాంతి కూడా తీసుకోవాలని సూచించారు. దీని ఫలితంగా ఆయన వెళ్లాల్సిన చైనా ట్రిప్ రద్దు అయింది.