స్కూల్ పిల్లల బ్యాగుల్లో కత్తులు, కండోమ్స్.. నాసిక్ ఘోటిలోని ఓ పాఠశాలలో వింత ఘటన

మహారాష్ట్రలోని నాసిక్ ఘోటిలోని ఓ పాఠశాలలో ఇటీవలే ఉపాధ్యాయులు తనిఖీలు నిర్వహించారు. ముఖ్యంగా 7వ తరగతి నుంచి 10వ తరగతి చదువుతున్న విద్యార్థుల బ్యాగుల్లో సోదాలు చేశారు. ఈక్రమంలోనే ఎవరి ఊహకు అందని వస్తువులు దొరికాయి. ముఖ్యంగా చేతులకు పెట్టుకునే కడియాలతో పాటు కత్తులు, కండోమ్స్ ప్యాకెట్లు లభ్యం అయ్యాయి. ఇవి చూసిన ఉపాధ్యాయులు షాక్ అయ్యారు. అదే విషయాన్ని పాఠశాల ప్రధానోపాధ్యాయుడికి చెప్పగా.. ఆయన కూడా వాటిని చూసి విస్తుపోయారు. అసలు పిల్లలు ఇలాంటివి ఎందుకు తీసుకు వస్తున్నారు, ఏవైనా నేరాలకు పాల్పడుతున్నారా అని తెలుసుకునే ప్రయత్నం చేస్తున్నారు.

ఈ మధ్య కాలంలో తరచుగా ఈ సోదాలు చేస్తున్నామని.. చేసిన ప్రతీ సారి కొందరి బ్యాగుల్లో ఇలాంటివి లభ్యం అవుతున్నాయని పాఠశాల ప్రిన్సిపాల్ వెల్లడించారు. అయితే పిల్లల గోప్యత దృష్ట్యా ఇవి ఎవరి బ్యాగుల్లో దొరికాయో చెప్పడం లేదని.. కానీ వారి తల్లిదండ్రులకు మాత్రం ఈ విషయం గురించి తెలిపామని అన్నారు. పిల్లలు చేస్తున్న నేరాలు, వారి మనసుల్లో దాగిన నేర ప్రవృతి గురించి ఎవరికీ తెలియదని.. వారి బ్యాగులు తనిఖీ చేస్తేనే వారు ఎలాంటి వాళ్లో బయట పడుతుందని వ్యాఖ్యానించారు.

ఇంకా ఈ తనిఖీలు కొనసాగిస్తున్నామని.. ఇలాంటివి తరచుగా చేయడం వల్ల విద్యార్థులు కూడా అలాంటి వస్తువులను వెంట తీసుకు రారని వెల్లడించారు. అయితే తాము చేస్తున్న ఈ సోదాలకు తల్లిదండ్రులు కూడా మద్దతు ఇస్తున్నారని చెప్పారు. ముఖ్యంగా కండోమ్స్, కత్తులు వంటివి దొరికిన బ్యాగుల పిల్లల తల్లిదండ్రులు.. చిన్నారులను సరైన మార్గంలో పెట్టేందుకు చాలా కష్టపడుతున్నారని వివరించారు. అలాగే బడిలోనే ఉపాధ్యాయులు సైతం నిత్యం.. ఏది మంచి, ఏది చెడు అనేదానిపై పిల్లలకు ప్రత్యేక తరగతులు తీసుకుంటున్నట్లు వెల్లడించారు. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది. మీరూ ఓసారి ఆ వీడియో చూసేయండి.