అమరవీరుడైన ఆర్మీ జవాన్ కుమార్తె పెళ్లిలో మేనమామగా లోక్‌సభ స్పీకర్

లోక్‌సభ స్పీకర్ ఓం బిర్లా ఆరేళ్ల క్రితం ఇచ్చిన మాటను నిలబెట్టుకున్నారు. పుల్వామా దాడిలో అమరవీరుడు అయిన ఓ ఆర్మీ జవాన్ కుమార్తె పెళ్లికి వెళ్లి మేనమామగా బాధ్యతలు స్వీకరించారు. ముఖ్యంగా వధువు తల్లికి సోదరుడి స్థానంలో ఉండి.. వారి సంప్రదాయం ప్రకారం భాత్ కార్యక్రమాన్ని నిర్వహించారు. ఈక్రమంలోనే సోదరికి అనేక బహుమతులు అందజేశారు. ప్రస్తుతం ఇందుకు సంబంధించిన ఫొటోలు, వీడియోలు నెట్టింట తెగ వైరల్ అవుతుండగా.. ప్రతీ ఒక్కరూ ఓం బిర్లాపై ప్రశంసల వర్షం కురిపిస్తున్నారు. ఆ పూర్తి వివరాలు మీకోసం.

2019 ఫిబ్రవరి 14వ తేదీన జరిగిన పుల్వామా ఉగ్రదాడిలో 40 మంది సెంట్రల్ రిజర్వ్ పోలీస్ ఫోర్స్ (సీఆర్పీఎఫ్) జవాన్లు మరణించిన విషయం అందరికీ తెలిసిందే. జమ్ము కశ్మీర్‌లోని పుల్వామా జిల్లా జమ్ము-శ్రీనగర్ జాతీయ రహదారిపై జవాన్ల వాహనం వెళ్తుండగా.. ఆత్మాహుతి దాడి జరిగింది. ఈ దాడికి తామే బాధ్యత వహిస్తున్నామని పాకిస్థాన్‌కు చెందిన ఉగ్రవాద సంస్థ జైషే మహ్మద్ ప్రకటించింది. అయితే ఈ ఘటనలోనే రాజస్థాన్‌కు చెందిన ఆర్మీ జవాన్ హేమరాజ్ ప్రాణాలు కోల్పోయారు. అయితే ఆయన అంత్యక్రియల సమయంలో లోక్‌సభ స్పీకర్ ఓం బిర్లా వారి కుటుంబానికి అండగా ఉంటానని మాటిచ్చారు.

ముఖ్యంగా ఆయన పిల్లల చదువులు, పెళ్లిళ్లపై బాధ్యత తీసుకుంటానని కూడా చెప్పారు. ఇచ్చిన మాట ప్రకారమే ప్రతీ ఏటా రక్షాబంధన్ రోజు వారి ఇంటికి వెళ్తున్నారు. అమరవీరుడైన జవాన్ భార్య మధుబాలతో రాఖీ కట్టించుకుంటున్నారు. ఇలా ఆరేళ్లుగా సాగుతుండగా.. తాజాగా హేమరాజ్ కుమార్తె 25 ఏళ్ల రీనా పెళ్లి జరిగింది. ఇచ్చిన మాట ప్రకారం లోక్‌సభ స్పీకర్ ఓం బిర్లా ఈ పెళ్లికి హాజరయ్యారు. ముఖ్యంగా వధువుకు మేనమామగా వ్యవహరించి పలు క్రతువులు నిర్వహించారు. రాజస్థాన్ కోటాలోని సంగోడ్ గ్రామంలో జరిగిన ఈ వివాహంలో పాల్గొన్న ఓం బిర్లా.. భాట్ లేదా మైరా అనే సంప్రదాయ వివాహ ఆచారాన్ని జరిపించారు. అయితే ఈయనతో పాటు రాష్ట్ర ఇంధన శాఖ మంత్రి హీరాలాల్ నగర్ కూడా ఉన్నారు.

ముఖ్యంగా వధువు తల్లి మధుబాలకు సంప్రదాయ బహుమతులు అందజేశారు. ఆ తర్వాత ఆమె ఓం బిర్లాను సోదరుడిగా భావించి సంప్రదాయ తిలకం దిద్దారు. ఆపై హారతి కూడా ఇచ్చారు. ప్రస్తుతం ఇందుకు సంబంధించిన ఫొటోలు, వీడియోలను ఓం బిర్లా ఎక్స్ వేధికగా షేర్ చేశారు. ఇది చూసిన ప్రతీ ఒక్కరూ ఆయనపై ప్రశంసల వర్షం కురిపిస్తున్నారు. ఇచ్చిన మాట నిలబెట్టుకున్నారు సార్ అంటూ కామెంట్లు చేస్తున్నారు. బాధ్యతగా మీరు చేసిన ఈ పని.. అమరజవాన్ కు నివాళి అని చెప్పుకొస్తున్నారు. మరి దీన్ని చూస్తే మీకేమనిపిస్తుందో కామెంట్ల రూపంలో వెల్లడించేయండి.