రోడ్డుపై వెళ్తున్న కారు డిక్కీలోంచి బయటకు వేలాడుతున్న చేయి

మహారాష్ట్ర రాజధాని ముంబైలో సోమవారం రోజు ఈ ఘటన జరిగింది. ముఖ్యంగా సాయంత్రం 6.45 గంటల ప్రాంతంలో రద్దీగా ఉన్న వాషి ప్రాంతంలోని రోడ్డుపై ఓ కారు వెళ్తోంది. అయితే ఆ కారు డిక్కీలోంచి ఓ మనిషి చేయి కిందకు వేలాడుతూ కనిపించింది. విషయం గుర్తించిన స్థానికులు, వాహన దారులంతా తీవ్ర భయాందోళనకు గురయ్యారు. కారు వెనకే పరుగులు పెడుతూ వారిని పట్టుకోవడానికి కూడా ప్రయత్నించారు. మరికొందరు అయితే దాన్ని వీడియోగా తీసి సోషల్ మీడియాలో పెట్టారు. మరికొందరు నేరుగా ఆ వీడియోను, కారు నెంబర్ వివరాలు, వెళ్తున్న రోడ్డు మార్గం అన్నింటికి పోలీసులకు తెలియజేశారు.

దీంతో పోలీసులు హుటాహుటిన రంగంలోకి దిగారు. చేయి వేలాడుతున్న కారును వెంబడించి మరీ పట్టుకున్నారు. ముందుగా కారు ఆపి.. నేరుగా వెనక్కి వచ్చి డిక్కీ తెరిచి చూశారు. అయితే అంతా అనుకున్నట్లుగా డిక్కీలో ఉంది శవం కాదు. ఓ మనిషి. అందులోనూ ఓ కుర్రాడు. నవ్వుతూ, జోకులు చేస్తూనే ఆ వ్యక్తి తన చేయిని డిక్కీలోంచి కిందకు జార విడిచాడు. దీంతో తీవ్ర కోపోద్రిక్తులైన పోలీసులు కారులో ఉన్న ముగ్గురు యువకులను కిందకు దింపి.. తమదైన స్టైల్లో విచారించారు. దీంతో తీవ్రంగా భయపడిపోయిన యువకులు.. తామంతా ఓ రీల్ చిత్రీకరించేందుకే ఇలా చేసినట్లు వెల్లడించారు.

ముఖ్యంగా ఓ ల్యాప్‌టాప్ షాప్ కోసం అందరి దృష్టిని ఆకర్షించే విధంగా రీల్ చిత్రీకరించాలనుకున్నామని.. కానీ అది ఇలా అవుతుందని అస్సలే ఊహించలేదంటూ పోలీసులకు వివరించారు. వారి మాటలు విన్న పోలీసులు విస్తుపోయారు. రీల్ కోసం ఇలాంటి పనులు చేసి ప్రయాణికులను, స్థానిక ప్రజలకు భయపెట్టడం ఏంటంటూ మరింత ఫైర్ అయ్యారు. మరోసారి ఇలాంటి పనులు చేస్తే జైల్లో వేస్తామంటూ హెచ్చరించి ఆపై ముగ్గురు యువకులను వదిలి పెట్టారు. అప్పటికే ఈ వీడియోను పలువురు సోషల్ మీడియాలో పెట్టగా.. నెట్టింట తెగ వైరల్ అవుతోంది. ఈ వీడియో చూసిన ప్రతీ ఒక్కరూ.. చాలా భయమేస్తుంది భయ్యా, ఎవరో శవాన్ని డిక్కీలో పెట్టి తీసుకెళ్తున్నారు, వీడియో తీస్తుంటే మీకు భయం వేయలేదా అంటూ కామెంట్లు చేస్తున్నారు. మరి ఈ వీడియో చూస్తే మీకేమనిపిస్తుందో కామెంట్ల రూపంలో వెల్లడించేయండి.