అమెరికా వీసా ఇంటర్వ్యూలో భారతీయుడికి చేదు అనుభవం

అమెరికా వీసా ఇంటర్వ్యూలో ఉన్నది ఉన్నట్లు చెప్పడంతో తనకు వీసా తిరస్కరించారంటూ ఓ భారతీయుడు సోషల్ మీడియాలో ఆవేదన వ్యక్తం చేశాడు. నిజాయితీగా సమాధానం చెప్పడమే తన తప్పిదమని అన్నాడు. కేవలం 40 సెకన్ల వ్యవధిలోనే తన వీసా దరఖాస్తును తిరస్కరించారని వివరించాడు. ప్రస్తుతం ఈ పోస్ట్ సోషల్ మీడియాలో వైరల్ గా మారింది.సోషల్ మీడియాలో వెల్లడించిన వివరాల ప్రకారం భారతీయ యువకుడు ఒకరు ఇటీవల అమెరికా వీసా కోసం ఇంటర్వ్యూకు హాజరయ్యాడు. కాన్సులర్ అధికారి అడిగిన ఓ ప్రశ్నకు నిజాయితీగా జవాబు చెప్పాడు. ఆ సమాధానం విన్న వెంటనే సదరు అధికారి ఎలాంటి లోతైన విచారణ లేకుండా, మరే ఇతర ప్రశ్న వేయకుండా తన వీసా దరఖాస్తును తిరస్కరించాడని చెప్పారు. కేవలం 40 సెకన్లలోనే వీసా నిరాకరిస్తున్నట్లు చెప్పారని వాపోయాడు. ఇంత తక్కువ సమయంలో, అదీ తాను నిజాయితీగా బదులిచ్చిన తర్వాత వీసా తిరస్కరించడం పట్ల అతను ఆశ్చర్యం, తీవ్ర నిరాశ వ్యక్తం చేశాడు. తన నిజాయితీ బహుశా ప్రతికూలంగా మారి ఉండవచ్చని అతను అభిప్రాయపడ్డాడు.ఆ యువకుడు ఏ తరహా వీసా కోసం దరఖాస్తు చేసుకున్నాడు.. అధికారి అడిగిన ప్రశ్న, దానికి యువకుడు ఇచ్చిన జవాబు ఏమిటనే వివరాలను అతడు వెల్లడించలేదు. ఈ పోస్ట్ తో అమెరికా వీసా ప్రక్రియల గురించి, ఇంటర్వ్యూల సమయంలో అధికారుల నిర్ణయాధికారం గురించి నెట్టింట చర్చకు దారితీసింది. కొందరు అతనికి మద్దతు తెలుపగా, మరికొందరు వీసా తిరస్కరణకు ఇతర కారణాలు ఉండి ఉండవచ్చని అభిప్రాయపడ్డారు. కాగా, ఈ ఘటనకు సంబంధించి అమెరికా రాయబార కార్యాలయం నుంచి ఎటువంటి అధికారిక స్పందన వెలువడలేదు.