తల్లికిచ్చిన మాటకోసం 60 ఏళ్లకి పెళ్లి చేసుకోబోతున్న బీజేపీ నేత

పశ్చిమ బెంగాల్ బీజేపీ మాజీ రాష్ట్ర అధ్యక్షుడు దిలీప్ ఘోష్.. తన తల్లి కోరిక మేరకే 60 ఏళ్ల వయసులో పెళ్లి చేసుకోబోతున్నట్లు తెలిపారు. ముఖ్యంగా బీజేపీ కోసమే పని చేస్తున్న తన సహోద్యోగి రింకు మజుందార్‌ను వివాహం ఆడబోతున్నట్లు వివరించారు. అయితే వివాహ అనంతరం కూడా తాను మునుపటిలాగే క్రియాశీలకంగా రాజకీయాల్లో కొనసాగుతానని చెప్పారు. తన వ్యక్తిగత జీవితం.. రాజకీయ జీవితంపై ఏమాత్రం ప్రభావం చూపదని కూడా దిలీప్ ఘోష్ చెప్పుకొచ్చారు. అయితే ఆమె మీకు ఎప్పటి నుంచి పరిచయం అని మీడియా ప్రతినిధులు అడగ్గా.. 2021లో రింకీ మజుందార్‌ను తొలిసారి కలిశానని చెప్పారు. రోజూ ఉదయం వాకింగ్ చేసేందుకు ఎకో పార్కుకు వెళ్లగా అక్కడే పరిచయం ఏర్పడినట్లు వివరించారు.

అయితే వీరిద్దరూ న్యూ టౌన్‌లోని నివాసంలోనే పెళ్లి చేసుకోబోతున్నారని.. అయితే దీనికి దగ్గరి బంధువులు, అతి తక్కువ మంది అతిథులు మాత్రమే హాజరు కాబోతున్నట్లు సమాచారం. వీరిద్దరూ పెళ్లి చేసుకోబోతున్నట్లు తెలియగానే.. బీజేపీ రాష్ట్ర అధ్యక్షుడు సుకాంత మజుందార్ సహా సీనియర్ బీజేపీ నాయకురాలు ఉదయం న్యూటౌన్‌లోని ఘోష్ నివాసానికి వెళ్లి శుభాకాంక్షలు తెలిపారు. అయితే ఈ వివాహ ప్రతిపాదనను వధువు తరఫు వారే తీసుకు వచ్చారని ఈ జంటతో సన్నిహితంగా ఉండే ఓ బీజేపీ నాయకుడు వివరించారు. ముఖ్యంగా ఈనెల ప్రారంభంలో వీరిద్దరూ కలిసి ఐపీఎల్ మ్యాచ్ చూసేందుకు వెళ్లారని.. అక్కడే పెళ్లి చేసుకోవాలని నిర్ణయించుకున్నట్లు చెప్పుకొచ్చారు.

ఇదిలా ఉండగా.. రింకు మజుందార్‌కు గతంలోనే ఓసారి పెళ్లి జరిగింది. ఓ కుమారుడు కూడా ఉన్నాడు. కానీ దిలీప్ ఘోష్ మాత్రం ఇన్నాళ్లూ పెళ్లి చేసుకోకుండానే ఉండిపోయారు. అయితే అతడితో చాలా కాలం క్రితమే విడిపోగా.. ఇప్పుడు దిలీప్ ఘోష్‌ను పెళ్లి చేసుకోబోతున్నారు. అయితే దీనిపై ఆమె స్పందిస్తూ.. సెప్టెంబర్ మధ్యలో తాను పెళ్లి చేసుకోవాలని నిర్ణయించుకున్నానని.. అప్పుడే ఓ అబ్బాయి కోసం వెతికినట్లు తెలిపారు. అయితే న్యూటౌన్‌లోనే ఉండి, తన రాజకీయ జీవితాన్ని అంగీకరించే వ్యక్తిని మాత్రమే వివాహం ఆడాలనుకున్నానని.. ఈక్రమంలోనే తనకు దిలీప్ ఘోష్ గుర్తొచ్చారని వివరించారు.

అందరు రాజకీయ నాయకుల్లా దిలీప్ ఘోష్ మాటలకు మాత్రమే పరిమితం కాకుండా చేతల్లో మంచి చేసి చూపిస్తారని, చాలా నిజాయితీ పరుడని, బలమైనవాడని తాను నమ్ముతున్నట్లు వెల్లడించారు. అందుకే ఆయనే తనకు కరెక్ట్ అని భావించి పెళ్లి ప్రస్తావన తీసుకెళ్లినట్లు స్పష్టం చేశారు. ఈక్రమంలోనే ఆయన తల్లి కోరిక మేరకు ఒప్పుకోవడంతో.. త్వరలోనే పెళ్లి చేసుకోబోతున్నట్లు ఇటీవలే ఓ ఛానెల్‌కు ఇచ్చిన ఇంటర్వ్యూలో వెల్లడించారు.