విమానం హైజాక్ చేసేందుకు ప్రయాణికుడి యత్నం... సీన్ కట్ చేస్తే శవమై

విమానం గాల్లో ఎగురుతుండగా ఓ ప్రయాణికుడు తన వద్దనున్న కత్తి తీసి తోటి ప్రయాణికులపై బెదిరింపులకు పాల్పడ్డాడు. విమానాన్ని హైజాక్ చేస్తున్నానంటూ దారి మళ్లించమని సిబ్బందికి సూచించాడు. పలువురిపై దాడులకు కూడా పాల్పడ్డాడు. దీంతో విమానంలో ఉన్న వారంతా తీవ్ర భయభ్రాంతులకు గురయ్యారు. పైలెట్లు సైతం విమానాన్ని దారి మళ్లించాలని నిర్ణయించుకున్నారు. కానీ ఈక్రమంలోనే ఓ ఆసక్తికర సంఘటన చోటు చేసుకుంది. ఫలితంగా నిందితుడు అక్కడికక్కడే ప్రాణాలు కోల్పోయాడు. మరి అతడెలా చనిపోయాడో మనం ఇప్పుడు తెలుసుకుందాం పదండి.

ట్రాఫిక్ ఎయిర్‌కు చెందిన ఓ చిన్న విమానం గురువారం రోజు కొరొజాల్ నుంచి శాన్ పెడ్రోకు బయలు దేరింది. ఈ విమానంలో మొత్తంగా 14 మంది ప్రయాణికులు, ఇద్దరి సిబ్బంది ఉన్నారు. అయితే విమానం టేకాఫ్ అయిన కాసేపటికే అందులో ప్రయాణిస్తున్న ఓ వ్యక్తి తన వద్దనున్న కత్తిని బయటకు తీశాడు. తోటి ప్రయాణికులను బెదిరిస్తూ.. విమానాన్ని హైజాక్ చేయబోతున్నట్లు చెప్పాడు. కేవలం చెప్పడమే కాదండోయ్ పలువరిపై కత్తితో దాడికి కూడా పాల్పడ్డాడు. దాదాపు రెండు గంటల పాటు దుండగుడు ఈ చర్యలను కొనసాగించగా.. విమానాన్ని అక్కడక్కడే చక్కర్లు కొట్టించారు. ఇక చేసేదేమీ లేక సిబ్బంది కూడా విమానాన్ని అతడు చెప్పిన చోటుకు తీసుకెళ్లాలలని నిర్ణయించుకున్నారు.

 అయితే హఠాత్తుగా ఓ ప్రయాణికుడు తన వద్దనున్న లైసెన్స్డ్ తుపాకీ తీసి దుండగుడిపై కాల్పులు జరిపాడు. అతడిని చంపాలనే ఉద్దేశంతో కాకుండా ఆపాలని కాల్పులు జరిపినప్పటికీ.. శరీరంలోకి బుల్లెట్లు దూసుకుపోగా నిందితుడు అక్కడికక్కడే కుప్పకూలిపోయాడు. తీవ్రంగా రక్తస్రావం కూడా అయింది. అయితే రక్తపు మడుగులో పడి ఉండడం చూసిన ప్రయాణికులు దగ్గరకు వెళ్లి చూడగా అతడు ప్రాణాలు కోల్పోయినట్లు గుర్తించారు. ముఖ్యంగా విమానం ల్యాండ్ అయిన వెంటనే బెలీజ్ అధికారులు అతడిని అంబులెన్స్ ద్వారా ఆస్పత్రికి తరలించారు. ఈక్రమంలోనే అతడు ఎవరో తెలుసుకునే ప్రయత్నం చేశారు.

హైజాక్‌కు యత్నించి ప్రాణాలు కోల్పోయిన నిందుతుడు అమెరికా వాసి అని... అతడి పేరు అకిన్యేలా సావా టేలర్ అని అధికారులు వెల్లడించారు. అయితే అతడు కత్తిని విమానంలోకి ఎలా తీసుకొచ్చాడనేది మాత్రం ఇంకా తెలియలేదని.. దానిపై దర్యాప్తు సాగిస్తున్నామని వివరించారు. మరోవైపు దుండగుడిపై కాల్పులు జరిపి.. తోటి వారి ప్రాణాలు కాపాడిన ప్రయాణికుడిని హీరోగా అభివర్ణించారు. ఆయన చాకచక్యంగా వ్యవహరించడం వల్లే వారంతా బతికి బయట పడ్డారని పేర్కొన్నారు. అంతేకాకుండా నిందితుడు ఒక్కడే ఇదంతా చేశాడా, అతడి వెనుక మరెవరైనా ఉన్నారా అనే దానిపై కూడా దర్యాప్తు చేస్తున్నామని చెప్పుకొచ్చారు.