వాహనాలపైకి దూసుకెళ్లిన తెలుగు నటుడి కారు.. నలుగురికి తీవ్ర గాయాలు

తమిళనాడు చెన్నైలోని ఎక్కడుతంగల్-చెన్నై ఎయిర్ పోర్ట్ రోడ్డుపై తెలుగు నటుడు, జాతీయ అవార్డు గ్రహీత బాబీ సింహ కారు విమానాశ్రయానికి వెళ్తోంది. అయితే అనుకోకుండా అలందూర్ మెట్రో స్టేషన్ వైపు ఉన్న కత్తిపార ఫ్లైఓవర్ దిగుతుండగా.. కారు అదుపుతప్పి ముందు వెళ్తున్న 6 వాహనాలపైకి దూసుకు వెళ్లింది. దీంతో ముందు వాహనాల్లో ఉన్న నలుగురు వ్యక్తులు తీవ్రంగా గాయపడ్డారు. విషయం గుర్తించిన స్థానికులు వెంటనే వచ్చి క్షతగాత్రులకు సాయం చేశారు. మరోవైపు పోలీసులకు, అంబులెన్సుకు ఫోన్ చేయగా.. వారంతా హుటాహుటిన రంగంలోకి దిగారు.

ఈక్రమంలోనే తీవ్ర గాయాలపాలైన నలుగురు వ్యక్తులను ఆస్పత్రికి తరలించారు. మరోవైపు పోలీసులు ప్రమాదానికి గురైన వాహనాలను పరిశీలించారు. ఈక్రమంలోనే బీభత్సం సృష్టించిన కారు నటుడు బాబీ సింహది అని తేల్చారు. ఆపై ఆ కారు నడిపిన డ్రైవర్ పుష్పరాజ్‌ను అదుపులోకి తీసుకున్నారు. ప్రమాద సమయంలో కారులో బాబీ సింహ లేరని పోలీసులు వెల్లడించారు. అలాగే డ్రైవర్ మద్యం సేవించి కారు నడిపాడని అందువల్లే ప్రమాదం జరిగిందని వివరించారు. అందుకే కారు డ్రైవర్ పుష్పరాజ్‌ను అదుపులోకి తీసుకున్నామని చెప్పారు. కేసు దర్యాప్తు కొనసాగుతోందని స్పష్టం చేశారు.

ప్రస్తుతం 41 ఏళ్ల వయసు కల్గిన బాబీ సింహ ప్రధానంగా తమిళ, తెలుగు చిత్రాల్లో నటించారు. కాదలిల్ సోదప్పువదు యెప్పడి, పిజ్జా చిత్రాల్లో కాసేపు మాత్రమే కనిపించిన ఈయన.. సూదు కవ్వుమ్, నేరం వంటి సినిమాలు చేశారు. ఇవి మాత్రమే కాకుండా చిరంజీవి హీరోగా చేసిన వాల్తేరు వీరయ్య, కమల్ హాసన్ నటించిన భారతీయుడు-2, రవితేజ నటించి డిస్కోరాజా, రజాకార్ వంటి చిత్రాల్లో కీలక పాత్రలు పోషించారు. ఉత్తమ విలన్‌గా విజయ్ అవార్డు, సహాయ పాత్రలో ఉత్తమ నటుడిగా జాతీయ చలనచిత్ర అవార్డు, తమిళంలో ఉత్తమ సహాయ నటుడిగా ఫిల్మ్ ఫేర్ అవార్డును అందుకున్నారు.