బీజేపీకి ఓటు వేయకపోతే కుక్కలు, గొర్రెలుగా పుడతారు..: బీజేపీ ఎమ్మెల్యే ఉషా ఠాకూర్ వివాదాస్పద వీడియో వైరల్

మధ్య ప్రదేశ్‌కు చెందిన బీజేపీ ఎమ్మెల్యే ఉషా ఠాకూర్ మరోసారి వివాదాస్పద వ్యాఖ్యలు చేసి వార్తల్లో నిలిచారు. ముఖ్యంగా ఓ కార్యక్రమానికి వెళ్లిన ఆమె.. ఓటర్ల గురించి తీవ్ర వ్యాఖ్యలు చేశారు. మద్యం, డబ్బు, బహుమతులు వంటి ప్రలోభాలకు లొంగి ఓట్లను అమ్మకునే వారంతా వచ్చే జన్మలో జంతువులుగా పుడతారని వ్యాఖ్యానించారు. తాను రోజూ దేవుడితో మాట్లాడతానని చెబుతూనే.. ప్రజాస్వామ్య హక్కును అమ్ముకున్నా, ప్రజలకు మంచి చేసే బీజేపీకి ఓటు వేయకపోయినా ఇదే జరుగుతుందంటూ వెల్లడించారు. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది. ఆ పూర్తి వివరాలు మీకోసం.

మధ్య ప్రదేశ్‌లోని మోవ్ అసెంబ్లీ నియోజకవర్గంలోని హసల్ పూర్ గ్రామంలో ఏప్రిల్ 16వ తేదీన జరిగిన ఓ కార్యక్రమానికి.. బీజేపీ ఎమ్మెల్యే, మాజీ మంత్రి ఉషా ఠాకూర్ వెళ్లారు. అక్కడే ప్రజలను ఉద్దేశించి మాట్లాడుతూ.. షాకింగ్ కామెంట్లు చేశారు. బీజేపీ ప్రభుత్వం అమలు చేస్తున్న అనేక పథకాల ద్వారా ప్రతి లబ్ధిదారుల ఖాతాల్లోకి వేల రూపాయలు వెళ్తున్నాయని చెప్పుకొచ్చారు. ఇలా అన్ని రంగాల వారికి కమలం పార్టీ మంచి చేస్తోందని.. రాష్ట్రాభివృద్ధి కోసం వేల కోట్ల రూపాయలు ఖర్చు చేస్తుందని వెల్లడించారు. అయితే ఇదంతా ప్రజలు అర్థం చేసుకుని వచ్చే ఎన్నికల్లో కూడా బీజేపీకే ఓటు వేయాలని సూచించారు.

  అలా కాదని మద్యం, డబ్బు, బహుమతులు వంటి ప్రలోభాలకు లొంగి ఓట్లు అమ్ముకుంటే.. రాష్ట్రాభివృద్ధి గంగలో కలుస్తుందని చెప్పారు. ప్రజంలతా ప్రజాస్వామ్యాన్ని కాపాడాలని.. అందుకోసం బీజేపీకి మాత్రమే ఓటు వేయాలని ఎమ్మెల్యే ఉషా ఠాకూర్ వివరించారు. ఓటు వేసేటప్పుడు ప్రతీ ఓటర్ చిత్తశుద్ధిని కోల్పోవద్దని చెప్పారు. ముఖ్యంగా ప్రలోభాలకు లొంగి ఓటు వేసే వారు వచ్చే జన్మలో కచ్చితంగా ఒంటెలు, గొర్రెలు, మేకలు, కుక్కలు, పిల్లులు, పందులుగా పుడతారని తెలిపారు. ఇది మీ డైరీలో రాసిపెట్టుకోండని కూడా వివరించారు.

ప్రజాస్వామ్యాన్ని అమ్ముకునే వారు మరు జన్మలో కచ్చితంగా జంతువులుగానే జన్మిస్తారని.. తాను ప్రతిరోజూ దేవుడితో మాట్లాడాతానని చెప్పుకొచ్చారు. దేశం, మతం, సంస్కృతికి సేవ చేసే బీజేపీకి మాత్రమే ఓటు వేయాలని పదే పదే వెల్లడించారు. ప్రస్తుతం ఇందుకు సంబంధించిన వీడియో నెట్టింట వైరల్ అవుతుండగా.. పెద్ద ఎత్తున విమర్శలు వస్తున్నాయి. ఓటు ఎవరికి వేయాలనేది పూర్తిగా ఓటర్ల ఇష్టం అని... బీజేపికి ఓటు వేయకపోతే మరు జన్మలో ఎలా జంతువులుగా పుడతారని కామెంట్ల రూపంలో ప్రశ్నిస్తున్నారు. మరి ఈ వీడియో చూస్తే మీకేమనిపిస్తుందో కామెంట్ల రూపంలో వెల్లడించేయండి.