కుమార్తె పెళ్లి.. పుష్పరాజ్‌గా మారి స్టెప్పులేసిన మాజీ సీఎం రవింద్ కేజ్రీవాల్

ఢిల్లీ మాజీ ముఖ్యమంత్రి, ఆమ్ ఆద్మీ పార్టీ అధినేత అరవిందే కేజ్రీవాల్ కుమార్తె హర్షిత కేజ్రీవాల్ వివాహం శుక్రవారం రోజు ఘనంగా జరిగింది. హర్షిత తన స్నేహితుడు సంభవ్ జైన్ చేతనే తన మెడలో మూడు ముళ్లు వేయించుకున్నారు. ఢిల్లీలోని కుపుర్తలా హౌస్‌లో జరిగిన వీరి వివాహానికి పంజాబ్ ముఖ్యమంత్రి భగవంత్ మాన్, ఢిల్లీ మాజీ డిప్యూటీ సీఎం మనీష్ సిసోడియా, ఆప్ నేతలు, అతికొద్ది మంది బంధువులు మాత్రమే హాజరయ్యారు. ఈ సందర్భంగానే అరవింద్ కేజ్రీవాల్ తన భార్య సునీతతో కలిసి పుష్ప-2 సినిమాలోని ఓ పాటకు స్టెప్పులు వేశారు. పంజాబ్ సీఎం సైతం అద్భుతంగా నృత్యం చేశారు. ఇందుకు సంబంధించిన వీడియోలు నెట్టింట తెగ వైరల్ అవుతున్నాయి. ఆ పూర్తి వివరాలు మీకోసం.

ఆప్ అధినేత అరవింద్ కేజ్రీవాల్ కుమార్తె హర్షిత ఐఐటీ ఢిల్లీలో కెమికల్ ఇంజినీరింగ్ చదివారు. అదే సమయంలో సంభవ్ జైన్ సైతం గ్రాడ్యుయేషన్ చేశారు. ఇలా వీరిద్దరి మధ్య పరిచయం ఏర్పడి.. అది కాస్తా స్నేహంగా, ఆపై ప్రేమగా మారాయి. చదువు పూర్తయిన తర్వాత వీరిద్దరూ ఉద్యోగాలు కూడా చేశారు. ముఖ్యంగా హర్షిత కేజ్రీవాల్ గురుగ్రామ్‌లోని ఓ కంపెనీలో అసోసియేట్ కన్సల్టెంట్‌గా, సంభవ్ జైన్ ప్రాజెక్టు మేనేజ్‌మెంట్ కన్సల్టెంట్‌గా బాధ్యతలు నిర్వహిస్తున్నారు. ఇలా చాలా రోజులు ప్రేమాయణం సాగించిన ఈ జంట పెళ్లి చేసుకోవాలని నిర్ణయించుకున్నారు. అలా ఇరుకుటుంబాల పెద్దలకు చెప్పగా వారు కూడా ఒప్పుకున్నారు.

దీంతో వీరిద్దరికీ పెళ్లి చేయాలని నిర్ణయించుకున్న రెండు కుటుంబాలు.. ఏప్రిల్ 17వ తేదీనే వీరిద్దరికీ ఘనంగా నిశ్చితార్థం చేశారు. అతికొద్ది మంది బంధువులు, స్నేహితుల నడుమ.. ఢిల్లీలోని ఓ హోటల్లో రాత్రిపూట నిశ్చితార్థం నిర్వహించారు. ఆ మరుసటి రోజే వీరిద్దరికీ వివాహాన్ని జరిపించారు. శుక్రవారం రోజు ఢిల్లీలోని కుపుర్తలా హౌస్‌లో అంగరంగ వైభవంగా వీరి వివాహం జరిగింది. ఈ పెళ్లికి పంజాబ్ ముఖ్యమంత్రి భగవంత్ మాన్, ఢిల్లీ మాజీ డిప్యూటీ సీఎం మనీష్ సిసోడియా, ఆప్ నేతలు సహా అతితక్కువ స్నేహితులు, బంధువులు హాజరయ్యారు. వీరందరి ముందే సంభవ్ జైన్ హర్షిత మెడలో మూడు ముళ్లు వేశారు.

వివాహం పూర్తయిన తర్వాత అతిథులు, కొత్త దంపతులు సహా అంతా అద్భుతంగా నృత్యాలు చేశారు. ముఖ్యంగా అరవింద్ కేజ్రీవాల్ ఆయన సతీమణి సునీతతో కలిసి పుష్ప-2 సినిమాలోని సూసేటి పాటు హిందీ వెర్షన్‌కు స్టెప్పులు వేశారు. పంజాబ్ సీఎం భగవంత్ మాన్ సైతం అద్భుతంగా డ్యాన్స్ చేయగా.. అంతా తెగ సంబుర పడిపోయారు. ప్రస్తుతం వీరంతా చేసిన డ్యాన్స్ వీడియోలు నెట్టింట తెగ వైరల్ అవుతున్నాయి. వీటిని చూసిన ప్రతీ ఒక్కరూ.. అరవింద్ కేజ్రీవాల్‌ను పుష్పరాజ్‌గా అభివర్ణిస్తున్నారు. ఇదిలా ఉండగా.. సంభవ్ జైన్, హర్షిత కేజ్రీవాల్‌ల వివాహ విందును ఏప్రిల్ 20వ తేదీన ఏర్పాటు చేయబోతున్నారు. దీనికి రాజకీయ, సినీ ప్రముఖులు కూడా హాజరు కాబోతున్నట్లు సమాచారం.