బెంగళూరులో ఎయిర్‌ఫోర్స్ వింగ్ కమాండర్‌పై దాడి

భారత వైమానికి దళానికి చెందిన వింగ్ కమాండర్‌పై బెంగళూరులో దాడి జరిగింది. ఆఫీసర్ ఆయన భార్యతో కలిసి కారులో వెళ్తుండగా.. ఎవరో గుర్తు తెలియని వ్యక్తులు బైక్‌పై వారిని వెంబడించారు. ఓచోట ఓవర్ టేక్ చేసి మరీ వారిని అడ్డగించి దాడికి పాల్పడ్డారు. ఈ దాడిలో అధికారి తీవ్రంగా గాయపడగా.. పోలీసులకు ఫిర్యాదు చేసేందుకు వెళ్లారు. అయితే పోలీసులు పట్టించుకోకపోవడంతో.. అధికారి ముఖమంతా రక్తం కారుతుండగానే ఓ వీడియో చేశారు. అందులో తనకు జరిగిన అన్యాయం గురించి వివరించారు. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది. ఆ పూర్తి వివరాలు మీకోసం.

భారత వైమానికి దళానికి చెందిన వింగ్ కమాండర్ బోస్, ఆయన భార్య స్క్వాడ్రన్ లీడర్ మధమితలు సోషల్ మీడియా వేదికగా ఓ వీడియోను విడుదల చేశారు. అందులో బోస్ ముఖం, మెడా, చేతుల నిండి రక్తం కారుతుండగా.. ఆయన పక్కనే కూర్చుని భార్య కారు నడుపుతోంది. అయితే బోస్ కారులో వెళ్తున్న తమని.. గుర్తు తెలియని వ్యక్తులు బైక్‌పై వెంబడించారని ఆ వీడియోలో తెలిపారు. మధ్యలో ఓవర్ టేక్ చేసి అడ్డగించారని.. ఆపై తనతో పాటు తన భార్యను తిట్టడం మొదలు పెట్టారని పేర్కొన్నారు. తమ కారుపై ఉన్న డీఆర్ డీఓ స్టిక్కర్‌ను కూడా చూశారని.. కావాలనే ఇష్టం వచ్చినట్లు దుర్భాషలాడారని వివరించారు.

అయితే భార్యను తిట్టడంతో తట్టుకోలేక కారులోంచి దిగి బయటకు వెళ్లగానే.. ఓ వ్యక్తి తన ముఖంపై దాడి చేసినట్లు బోస్ వెల్లడించారు. దీంతో తీవ్రంగా రక్తస్రావం అయిందని.. ఆ సమయంలోనే తాను వారిపై దాడి చేయకుండా, మిమ్మల్ని కాపాడే వారితో మీరు ఇలాగేనా ప్రవర్తించేది అని గట్టిగా ప్రశ్నించినట్లు చెప్పుకొచ్చారు. కానీ ఆశ్చర్యంగా పక్కనున్న వారంతా తమనే తిట్టారని.. ఓ వ్యక్తి అయితే రాయి తీసుకుని కారు అద్దాలను, తన తలను పగులగొట్టారని స్పష్టం చేశారు. వెంటనే తన భార్య అప్రమత్తమై నేరుగా పోలీస్ స్టేషన్‌కు తీసుకెళ్లిందని చెప్పారు. కానీ అక్కడకు వెళ్లాకా పోలీసులు ఎవరూ తమను పట్టించుకోలేదని.. కర్ణాటకలో ఇలాంటి పరిస్థితులు చూస్తుంటే చాలా ఆశ్చర్యంగా అనిపించదన్నారు.

ధారాపాతంగా రక్తం కారుతుండగానే ఆయన ఈ వీడియో చేసి సోషల్ మీడియాలో పెట్టగా నెట్టింట తెగ వైరల్ అయింది. కొందరు ఈయనకు మద్దతు తెలుపుతుండగా.. మరికొందరు మాత్రం ఈయనే ఏదో తప్పు చేసుంటాడంటూ కామెంట్లు చేస్తున్నారు. లేకపోతే ఇంతగా దాడి చేయరని, పక్కనున్న వాళ్లు కూడా వీరినే తిట్టరని చెబుతున్నారు. అయితే పోలీసులు మాత్రం దీనిపై స్పందిస్తూ.. తమకు ఎలాంటి ఫిర్యాదు అందలేదని, అసలు ఏం జరిగిందో తెలుసుకునేందుకు ప్రయత్నిస్తున్నామని వివరించారు.