పిల్లలు టాయిలెట్ కి వెళ్లే అలవాటు నేర్పించండి

పిల్లలకు ఒక్కో అలవాటు నేర్పించడం పేరెంట్స్ కి పెద్ద టాస్క్. చిన్నప్పటి నుంచి కాస్త నెమ్మదిగా చెప్తుంటే క్రమంగా వాళ్లే అర్థం చేసుకుంటారు. ఓ మూడు నాలుగేళ్లు వచ్చే సరికి బేసిక్ గా కొన్ని వాళ్లకి అర్థమవుతాయి. గ్లాస్ లో నీళ్లు ఇస్తే సొంతగా తాగడం, మెతుకులు అటూ ఇటూ పడేస్తూ అయినా సొంతగా తినడం లాంటివి తెలుస్తాయి. అయితే.. టాయిలెట్ కి వెళ్లడం మాత్రం అంత త్వరగా అర్థం కాదు. వాళ్లలో ఓ భయం ఉంటుంది. నిజానికి పిల్లల పెంపకంలో పాటీ ట్రైనింగ్ అనేది చాలా ముఖ్యం. మూడు సంవత్సరాలు పూర్తైనప్పటి నుంచి ఈ ట్రైనింగ్ మొదలు పెట్టొచ్చు. కొంత మంది త్వరగానే అర్థం చేసుకుని ప్రయత్నిస్తారు.

కానీ కొందరు పిల్లలు మాత్రం మొండికేస్తారు. టాయిలెట్ సీట్ పై కూర్చోడానికే ఇబ్బంది పడతారు. నిజానికి..పాటీ ట్రైనింగ్ కి కనీసం ఆరు నెలల సమయం పడుతుంది. అంతలా ట్రైన్ చేస్తే కానీ వాళ్లు సొంతగా టాయిలెట్ కి వెళ్లడం సాధ్యం కాదు. అంతకు ముందే ఇంట్లో పిల్లలు ఉంటే ఆ తరవాత పుట్టిన పిల్లలు వాళ్లను చూసి తొందరగా గ్రహిస్తారు. కానీ ఫస్ట్ కిడ్ కి మాత్రం పేరెంట్స్ ఇబ్బంది పడాల్సి వస్తుంది. అయితే కొన్ని టిప్స్ ఫాలో అయితే పిల్లలకు టాయిలెట్ అలవాటుని సులువుగా నేర్పించవచ్చు.

పిల్లల మానసిక స్థితిని బట్టి

పాటీ ట్రైనింగ్ ఇచ్చే ముందు పిల్లలు అందుకు మానసికంగా సిద్ధంగా ఉన్నారా, వాళ్ల శరీరం అందుకు సహకరిస్తోందా అన్నది గమనించాలి. సాధారణంగా 12 నుంచి 18 నెలల మధ్యలో పిల్లలకు దీనిపై కొంత అవగాహన వస్తుంది. కానీ..వాళ్లంతట వాళ్లుగా బాత్ రూమ్ లోకి వెళ్లి పాటీకి వెళ్లేందుకు ప్రయత్నించే వరకూ కాస్త ఓపిక పట్టాలి. ఆ పని చేయాలంటే ఇక్కడికి రావాలి అని వాళ్లకు సెన్స్ రావాలి. అప్పుడు పిల్లలకు ట్రైనింగ్ ఇస్తే సులభంగా అర్థం చేసుకుంటారు.

కానీ..వయసు పెరిగిపోతోందని, కచ్చితంగా వెళ్లాల్సిందేనని బలవంతంగా తీసుకెళ్లి కూర్చోబెట్టడం లాంటివి చేస్తే బెదిరిపోతారు. వాళ్లు మానసికంగా సిద్ధంగా ఉన్నారని అర్థమయ్యాక ట్రైనింగ్ ఇవ్వాలి. అప్పుడు ఆటోమెటిక్ గా వాళ్లే ఫలానా చోటకు వెళ్లిపోతారు. అంతే కాదు. పొట్టలో ఆ సెన్సేషన్ వచ్చినప్పుడు ముందే చెప్పి మరీ వెళ్లడానికీ అలవాటు పడతారు. రెండు లేదా మూడేళ్ల వయసు నుంచి ఈ సెన్స్ తెలిసే అవకాశముంటుంది.

కంఫర్ట్ గా ఉంచండి

టాయిలెట్ సీట్ పై కూర్చోవడం పిల్లలకు కాస్త ఇబ్బందిగా అనిపిస్తుండొచ్చు. పైగా పెద్ద వాళ్లు వాడే కమోడ్స్ పెద్దగా ఉంటాయి. వాటిపైన పిల్లలు కూర్చోలేరు. అందుకే అందుకోసం ప్రత్యేకంగా స్టెప్ స్టూల్ లాంటిది తీసుకోవాలి. ఈ స్టూల్ కలర్ కూడా వాళ్లకి నచ్చిందే తీసుకుంటే పిల్లలు తొందరగా అట్రాక్ట్ అవుతారు. లోదుస్తులపైనా రకరకాల బొమ్మలు ఉండేలా చూడాలి. ఇది కూడా పిల్లల్ని ఎంగేజ్ చేస్తుంది. వాళ్ల కోసం ప్రత్యేకంగా తీసుకొచ్చిన టాయిలెట్ సీట్ పై అప్పుడప్పుడూ కూర్చోబెట్టి ఆడిస్తూ ఉండాలి. అలా చేయడం వల్ల వాళ్లకు కూర్చోవడం అలవాటవుతుంది. టాయిలెట్ ట్రైనింగ్ కి సంబంధించిన వీడియోలు అప్పుడప్పుడూ చూపిస్తూ నేర్పించాలి. చూస్తే పిల్లలు చాలా త్వరగా నేర్చుకుంటారు.

తరచూ తీసుకెళ్లాలి

పాటీ వచ్చినా రాకపోయినా అప్పుడప్పుడూ తీసుకెళ్లి నేర్పిస్తుండాలి. మొదట్లో ఇలా అలవాటు చేస్తే క్రమంగా వాళ్లే అర్థం చేసుకుంటారు. ఉదయం లేవగానే టాయిలెట్ సీట్ ని వాడడం అలవాటు చేయాలి. ఆ పనికి సంబంధించి ఏదైనా ఓ పదాన్ని వాళ్లకు అర్థమయ్యేలా పదేపదే చెప్పాలి. పాటీ వెళ్లాల్సిన సమయంలో వాళ్లు అదే పదాన్ని రిపీట్ చేసి వెళ్తారు. ఎలా క్లీన్ చేసుకోవాలి. ఎలా కూర్చోవాలి లాంటివి నేర్పించాలి. దుస్తులు పాడైపోతే వేరేవి తీసుకుని వేసుకోవడాన్నీ అలవాటు చేయాలి. బాత్ రూమ్ లో స్టికర్ ఛార్ట్స్ పెట్టడం, వాళ్లకు ఇష్టమైన బొమ్మలు వెంట తీసుకెళ్లనివ్వడం లాంటి టిప్స్ పాటించాలి. వాళ్లు సరైన విధంగా పాటీకి వెళ్లి వస్తే వాళ్లకు నచ్చిన బొమ్మ ఇవ్వడమో, అప్రిషియేట్ చేయడమో లాంటివి చేస్తే పిల్లలు ఇంకా ఉత్సాహంగా ఉంటారు.

ఇవి కూడా ట్రై చేయండి

టాయిలెట్ కి వెళ్లిన తరవాత ఫ్లష్ చేయడం మరో పెద్ద టాస్క్. చాలా మంది పిల్లలు ఇక్కడే తడబడతారు. అయితే దీన్నో ఫన్ గేమ్ లాగా మార్చి వాళ్లకు అర్థమయ్యేలా వివరించాలి. కొంత మంది తల్లి వస్తే తప్ప లోపలికి వెళ్లరు. ఇంకొందరు తండ్రి ఉంటేనే వెళ్తారు. ఇలా వాళ్లు ఎవరిని ఎంపిక చేసుకుంటున్నారన్నది గమనించాలి. దాన్ని బట్టి పిల్లల వెంట వెళ్లాలి. ఒకవేళ పిల్లలు మలబద్ధకంతో ఇబ్బంది పడుతుంటే వెంటనే డాక్టర్ ని సంప్రదించాలి.

టైమ్ లైన్ పెట్టకండి

కచ్చితంగా ఇన్ని రోజుల్లోనే పిల్లలు నేర్చుకోవాలని టైమ్ లైన్ పెట్టుకోవద్దు. కొంత మంది చాలా ఆలస్యంగా నేర్చుకుంటారు. మీరు చెప్పే విధానం నచ్చకపోయినా, అర్థం కాకపోయినా పిల్లలు వాటిని ఫాలో అవలేరు. అందుకే వాళ్లకి అర్థమయ్యే భాషలో చెప్పాలి. మెల్లగా వాళ్లే అలవాటు చేసుకుంటారు.