రాజ్‌నాథ్‌ సింగ్‌తో త్రివిధ దళాధిపతి భేటీ, ఏం జరగనుంది

భారత్‌-పాక్‌ సరిహద్దులో ప్రస్తుతం తీవ్ర ఉద్రిక్త పరిస్థితులు నెలకొన్న విషయం తెలిసిందే. పహల్గామ్ ఉగ్రదాడికి ప్రతీకారం తీర్చుకోవాలని దేశవ్యాప్తంగా డిమాండ్లు, విజ్ఞప్తులు వెల్లువెత్తుతున్నాయి. ఈ విషయంలో కేంద్రంలోని నరేంద్ర మోదీ ప్రభుత్వం ఆచితూచి అడుగులు వేస్తోంది. ఇప్పటికే కేంద్రం 5 కీలక నిర్ణయాలు తీసుకుంది. మరోవైపు.. భారత త్రివిధ దళాలు కూడా ఎలాంటి పరిస్థితినైనా ఎదుర్కొనేందుకు సిద్ధం అని ప్రకటించాయి. ఈ నేపథ్యంలోనే ఎప్పుడు ఏం జరుగుతుందోననే ఉత్కంఠ నెలకొంది. ఇలాంటి పరిస్థితుల్లో ఢిల్లీలో కీలక చర్చలు, భేటీలు జరుగుతుండటం ప్రాధాన్యం సంతరించుకుంది. పాక్ కవ్వింపులకు ఎలాంటి సమాధానం ఇవ్వాలనే దానిపై కీలక నిర్ణయాలకు పూనుకుంటోంది.

ఈ నేపథ్యంలోనే తాజాగా రక్షణ శాఖ మంత్రి రాజ్‌నాథ్‌ సింగ్‌తో చీఫ్‌ ఆఫ్‌ డిఫెన్స్‌ స్టాఫ్‌, త్రివిధ దళాధిపతి జనరల్‌ అనిల్‌ చౌహాన్‌ భేటీ కావడం తీవ్ర చర్చనీయాంశంగా మారింది. పహల్గామ్‌లో జరిగిన ఉగ్రదాడి తర్వాత.. ప్రస్తుతం భద్రతా దళాలు తీసుకుంటున్న చర్యలు, సరిహద్దులో ఇప్పటి పరిస్థితుల గురించి వీరిద్దరూ చర్చించినట్లు తెలుస్తోంది. ఇక బీఎస్‌ఎఫ్‌ డైరెక్టర్‌ జనరల్‌ దిల్జీత్‌ సింగ్ చౌధరీ కూడా నార్త్‌ బ్లాక్‌కు చేరుకోవడంతో మరిన్ని భేటీలు జరగనున్నాయి. సిమ్లా ఒప్పందాన్ని రద్దు చేస్తున్నట్లు తెలిపిన దాయాది దేశం.. సరిహద్దులో పాక్‌ సైన్యం కవ్వింపు చర్యలకు పాల్పడుతున్న వేళ.. ఢిల్లీలో జరుగుతున్న వరుస భేటీలు జరగడం.. ఇప్పుడు తీవ్ర ప్రాధాన్యం సంతరించుకుంటున్నాయి.

పహల్గామ్ ఉగ్రదాడి అనంతరం పాకిస్తాన్‌తో దౌత్య సంబంధాలపై కేంద్ర ప్రభుత్వం కీలక నిర్ణయాలు తీసుకుంది. ఈ చర్యలను జీర్ణించుకోలేని పాక్‌ నేతలు భారత్‌పై తమ అక్కసును వెళ్లగక్కుతున్నారు. ఇక కాల్పుల విరమణ ఒప్పందాన్ని ఉల్లంఘిస్తున్న పాక్‌ సైనికులు.. నియంత్రణ రేఖ వెంబడి దాడులు చేస్తూనే ఉంది. అయితే పాక్ దాడులను భారత సైన్యం సమర్థవంతంగా తిప్పికొడుతోంది. సరిహద్దుల్లో ప్రస్తుతం నెలకొన్న ఉద్రిక్త పరిస్థితుల నేపథ్యంలో పారామిలిటరీ, సైన్యానికి ఇచ్చిన సెలవులు రద్దు చేసింది. సెలవుల్లో వెళ్లిన వారు వెంటనే తిరిగి వచ్చి విధుల్లో చేరాలనే ఆదేశాలు ఇచ్చాయి. మరోవైపు.. జమ్మూ కాశ్మీర్‌లోనూ భారీగా సైన్యాన్ని మోహరించి.. ఎలాంటి దాడులనైనా తిప్పికొట్టేందుకు ఇండియన్ ఆర్మీ సర్వసన్నద్ధం అయింది.