ఈ పని చేస్తే చాలు రూ.5 లక్షలు మీవే

భారతదేశంలోనే అతిపెద్ద రవాణా సంస్థ అయిన భారతీయ రైల్వే.. సరికొత్త ఒరవడికి శ్రీకారం చుట్టింది. నరేంద్ర మోదీ నేతృత్వంలోని కేంద్ర ప్రభుత్వం గత దశాబ్దానికి పైగా కాలంగా దేశంలోని రైల్వేలను మరింత అభివృద్ధి చేసేందుకు ఎన్నో చర్యలు తీసుకుంటోంది. ఇందులో భాగంగానే కొత్త కొత్త రైళ్లను ప్రవేశపెట్టడం.. రైల్వే స్టేషన్ల ఆధునికీకరణ, రైలు మార్గాల విస్తరణ చేస్తూ ప్రయాణికులకు మరింత చేరువ అవుతోంది. ఈ క్రమంలోనే తాజాగా రైల్వే శాఖ ఒక వినూత్నమైన పోటీని నిర్వహించింది. దేశవ్యాప్తంగా ఉన్న రైల్వే స్టేషన్లలో కొత్త డిజిటల్ క్లాక్‌లను ఏర్పాటు చేయాలని నిర్ణయించిన రైల్వే శాఖ.. ఇందుకోసం నేషనల్ లెవల్‌లో డిజైన్ల పోటీని నిర్వహిస్తోంది. ఈ పోటీలో అందరికంటే వినూత్నంగా తమ అద్భుతమైన డిజైన్లతో ఎవరైతే మంచి డిజిటల్ క్లాక్ డిజైన్‌ను తయారు చేస్తారో వారికి ఏకంగా రూ.5 లక్షల నగదు బహుమతిని గెలుచుకునే అవకాశం కల్పించింది.

అయితే ఈ పోటీని 3 కేటగిరీలుగా విభజించారు. ప్రొఫెషనల్స్, కాలేజీ లేదా యూనివర్సిటీ స్టూడెంట్స్, పాఠశాల విద్యార్థులు. రైల్వే ప్లాట్‌ఫారమ్‌లు, రైల్వే స్టేషన్ల లోపల సరిపోయేలా ఒకే విధంగా, ఆకర్షణీయంగా డిజిటల్ గడియారాల డిజైన్‌లను రూపొందించడం కోసం ఈ పోటీని నిర్వహించడానికి ముఖ్య ఉద్దేశమని సంబంధిత వర్గాలు వెల్లడించాయి. ఇక అందరికంటే ఉత్తమమైన డిజైన్‌ను అందించిన విజేతకు రూ.5 లక్షల నగదు బహుమతి లభించనుంది.

అంతేకాకుండా.. ప్రతీ కేటగిరీలోనూ అత్యుత్తమంగా నిలిచిన ఐదుగురు వ్యక్తులకు ఒక్కొక్కరికీ రూ.50 వేల చొప్పున ప్రోత్సాహక బహుమతులు కూడా అందజేయనున్నట్లు రైల్వే శాఖ వర్గాలు తెలిపాయి. దీని వల్ల ఇండియన్ రైల్వే మౌలిక సదుపాయాల్లో సరికొత్త డిజైన్లను ప్రవేశపెట్టడమే కాకుండా.. యువత, నిపుణుల క్రియేటివ్ ఐడియాలోని వెలికితీయడమేనని చెప్పారు.

అయితే ఈ పోటీలో పాల్గొనాల్సిన వ్యక్తులు తమ ఒరిజినల్ డిజైన్‌లను, ఏ విధమైన కాపీరైట్‌ సమస్యలు లేకుండా.. contest.pr@rb.railnet.gov.in అనే ఈ-మెయిల్‌ అడ్రస్‌కు పంపించాలని సూచించారు. ఈనెల 1వ తేదీన ప్రారంభమైన ఈ కాంపిటీషన్ ఈనెల 31వ తేదీ వరకు కొనసాగనుంది. ఆ పోటీలో పాల్గొనే వారు సమర్పించే అన్ని డిజైన్‌లు ఒరిజినల్‌గా ఉండాలని రైల్వే బోర్డు ఎగ్జిక్యూటివ్ డైరెక్టర్ దిలీప్ కుమార్ స్పష్టం చేశారు. స్కూల్, కాలేజీ విద్యార్థులు తమ ఐడీ కార్డులను తమ డిజైన్లతోపాటు పంపించాలని సూచించారు. డిజైన్‌లను ఎలాంటి లోగోలు లేకుండా, హై-క్వాలిటీతో పంపించాల్సి ఉంటుంది. ఒక్కో డిజైన్‌కు దాని ప్రత్యేకతను వివరిస్తూ ఒక చిన్న వివరణను కూడా ఈ-మెయిల్‌లో పంపించాలని తెలిపింది.