విమానం ఎక్కాలంటే రియల్ ఐడీ తప్పనిసరి,,,,గ్రీన్ కార్డుదారులకు అమెరికా సర్కారు బిగ్ అలర్ట్

విదేశాల నుంచి వెళ్లి అమెరికాలో స్థిరపడి అక్కడే నివసిస్తున్న గ్రీన్ కార్డుదారులకు అక్కడి ప్రభుత్వం పలు సూచనలు చేసింది. ముఖ్యంగా వీరు దేశీయ విమానాల్లో ప్రయాణించాలంటే కచ్చితంగా రియల్ ఐడీని చూపించాల్సి ఉంటుందని చెప్పుకొచ్చింది. పాస్‌పోర్టుతో పాటు రాష్ట్రం జారీ చేసిన డ్రైవింగ్ లైసెన్స్ లేదా ఇతర ఆమోదయోగ్యమైన ఐడీలను వెంట తీసుకు వెళ్లాలని వివరించింది. ఇవేవీ తీసుకు వెళ్లకుండానే వెళ్తే విమానాశ్రయ భద్రతా సిబ్బంది వారిని లోపలికి అనుమతించదని వెల్లడించింది. ఆ పూర్తి వివరాలు మీకోసం.

అగ్రరాజ్యం అమెరికా అధ్యక్షుడిగా డొనాల్డ్ ట్రంప్ రెండోసారి పదవీ బాధ్యతలు చేపట్టినప్పటి నుంచి అనేక కీలక నిర్ణయాలు తీసుకుంటున్నారు. ముఖ్యంగా అక్రమ వలసదారులను తిరిగి స్వదేశాలకు పంపిస్తూ.. అమెరికా ఫస్ట్ నినాదం కోసం తీవ్రంగా కృషి చేస్తున్నారు. ఈక్రమంలోనే తాజాగా మరో కీలక నిర్ణయం తీసుకున్నారు. ఇకపై అమెరికాలో స్థిరపడ్డ ఇతర దేశాల ప్రజలు అంటే గ్రీన్ కార్డుదారులు.. దేశీయంగా విమానాల్లో ప్రయాణించాలంటే పాస్‌పోర్ట్ సహా వారి రియల్ ఐడీని కూడా చూపించాలని ఆదేశాలు జారీ చేశారు.

ముఖ్యంగా అమెరికా డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ ఓ ప్రకటన ద్వారా ఈ విషయాలను వెల్లడించింది. మే 7వ తేదీ నుంచే దీన్ని అమలు చేస్తున్నామని.. కాబట్టి గ్రీన్ కార్డుదారులు అంతా విమానాల్లో ప్రయాణించేందుకు వెళ్లేటప్పుడు రియల్ ఐడీ కార్డులను కూడా వెంట తీసుకెళ్లాలని సూచించింది. రియల్ ఐడీలు అంటే సదరు వ్యక్తికి రాష్ట్రం జారీ చేసిన డ్రైవింగ్ లైసెన్స్ లేదా అక్కడి ప్రభుత్వ ఐడీ కార్డులను విమానాశ్రయంలో చూపించాలి. ఇవి దగ్గర లేకపోయినా, చూపించడంలో విఫలం అయినా.. వారు అదనపు స్క్రీనింగ్‌ను ఎదుర్కోవాల్సి ఉంటుందని పేర్కొంది. ఇదంతా జరగడానికి ఎక్కువ సమయమే పట్టే అవకాశం ఉంటుందని.. ఫలితంగా విమానాలు కూడా మిస్ అయ్యే ఛాన్స్ ఉందని తెలిపింది.

కొన్నిసార్లు రియల్ ఐడీలు లేకపోతే ఎయిర్ పోర్టు సెక్యూరిటీ చెక్ పాయింట్ల వద్దకు కూడా ప్రవేశాన్ని తిరస్కరించే అవకాశం ఉంటుందని అమెరికా హోమ్ ల్యాండ్ సెక్యూరిటీ శాఖ స్పష్టం చేసింది. కాబట్టి గ్రీన్ కార్డుదారులు అందరూ టీఎస్ఏ సైనిక ఐడీ లేదా శాశ్వత నివాసి కార్డ్ వంటి ఇతర ఆమోదయోగ్యమైన గుర్తింపు కార్డులను వెంట ఉంచుకోవాలని తెలిపింది.