యువతి షర్టుకు గుండీలు ఎక్కువున్నాయని నీట్ పరీక్షకు నో

వైద్య విద్య కోర్సుల్లో ప్రేవేశాల కోసం తమిళనాడులో ఆదివారం రోజు నీట్ - యూజీ పరీక్ష నిర్వహించిన విషయం అందరికీ తెలిసిందే. అయితే ఎంతో కష్టపడి చదివిన ఓ అమ్మాయి పరీక్షా కేంద్రానికి అరగంట ముందుగానే చేరుకుంది. ఎలాంటి ఆందోళన లేకుండా లోపలికి వెళ్తే హాయిగా పరీక్ష రాసుకోవచ్చనుకుంది. సమయం రాగానే లోపలికి వెళ్లబోతుండగా.. అక్కడి సిబ్బంది అడ్డుకున్నారు. నీవు వేసుకున్న షర్టుకు ఎక్కువ బటన్లు ఉన్నాయి వెళ్లిపోవాలంటూ చెప్పారు. హాల్ టికెట్, పెన్నులు, సమయానికంటే ముందు రావడం వంటివన్నీ చేసినా తనను పరీక్ష అనుమతించక పోయేసరికి ఆమె కన్నీటి పర్యంతం అయింది.

ఓవైపు ఏడుస్తూనే ప్లీజ్ ప్లీజ్ అంటూ సిబ్బందిని బతిమాలింది. కానీ వారు మాత్రం కనికరించలేదు. లోపలికి అస్సలే రానివ్వమని చెప్పారు. దీంతో కష్టపడి చదివిన చదువంతా వృథా అయిపోతుందేమనని భావించిన ఆ అమ్మాయి తన షర్టు గుండీలు తీయడం ప్రారంభించింది. ఫలితంగా షర్టు చినిపోయింది. అయినా అదేమీ పట్టించుకోకుండా పరీక్ష రాయాలనే ఉద్దేశంతో గుండీలు తీసేందుకు ప్రయత్నాలు చేస్తూనే ఉంది. అయితే దూరం నుంచే ఇదంతా గమనిస్తున్న ఓ మహిళా కానిస్టేబుల్ అమ్మాయికి సాయం చేయాలనకుంది. వెంటనే వచ్చి యువతికి ఓ అద్భుతమైన సలహా ఇచ్చి పరీక్ష రాసేలా చేసింది. క్షణాల్లోనే స్పందించి పరీక్ష రాయేలేమోనని భావించిన అమ్మాయి చేత పరీక్ష ఎలా రాయించిందో మనం ఇప్పుడు తెలుసుకుందాం పదండి.

తమిళనాడులోని తిరుప్పుర్ జిల్లా ఏవీపీ ఆర్ట్స్ అండ్ సైన్స్ కాలేజీ కూడా నీట్ పరీక్షా కేంద్రంగా ఉంది. అయితే అధికారులు విద్యార్థులను పూర్తిగా చెక్ చేస్తూ.. నిషేధిత వస్తువులను లోపలికి తీసుకు వెళ్లనివ్వకుండా జాగ్రత్తలు తీసుకుంటున్నారు. ఇదే సమయంలో కనిమొళి అనే విద్యార్థి పరీక్ష రాసేందుకు వచ్చింది. హాల్ టికెట్, ఫొటో వంటివన్నీ తీసుకుని పరీక్షా కేంద్రానికి అరగంట ముందే రాగా.. ఆమెను సిబ్బందిని పరీక్షించారు. అయితే హాల్ టికెట్, ఫొటో అన్నీ కరెక్టుగానే ఉండగా.. ఆమె వేసుకున్న షర్టుకు మాత్రం ఎక్కువగా గుండీలు ఉన్నాయి. దీంతో సిబ్బంది ఆమెను లోపలికి అనుమతించలేదు.

ఏం చేయాలో పాలుపోక సదరు యువతి కన్నీటి పర్యంతం అయింది. పరీక్ష రాయలేమోనని భయపడుతూనే.. పరిష్కారం గురించి ఆలోచించింది. గుండీలు తీసేస్తే.. పరీక్ష రాయనిస్తారేమోనని భావించి తన షర్టు బటన్లను సైతం తొలగించడానికి సిద్ధం అయింది. ఎంతో కష్ట పడుతూ వాటిని పీకేస్తూ ఉండగా.. షర్టు చినిగింది. అయితే దూరం నుంచే ఇదంతా గమనించిన ఓ మహిళా కానిస్టేబుల్.. వెంటనే కనిమొళి వద్దకు వచ్చింది. ఇలా చేస్తే షర్టు పూర్తిగా చినిగిపోతుంది అలా చేయొద్దని.. పక్కనే బట్టల షాపు ఉంది, నాతో వస్తే డ్రెస్ కొనిస్తానని వివరించింది.

దీంతో కనిమొళికి కాస్త ధైర్యం వచ్చింది. వెంటనే వెళ్లి మహిళా కానిస్టేబుల్ బండి ఎక్కింది. ఆమె కూడా సమయం వృథా కాకుండా దగ్గర్లో ఉన్న దుకాణానికి తీసుకెళ్లి డ్రెస్ ఇప్పించగా.. కనిమొళి అక్కడే డ్రెస్ వేసుకుని మళ్లీ పరీక్షా కేంద్రానికి తిరిగొచ్చింది. సమయానిక దేవతలా వచ్చి మహిళా కానిస్టేబుల్ సాయం చేయగా.. కనిమొళి కళ్లలో నీళ్లు తిరుగుతుండగానే ఆమెకు థాంక్స్ చెప్పింది. మీరు చేసిన సాయం జీవితంలో మర్చిపోలేనంటూ పరీక్ష రాసేందుకు లోపలికి వెళ్లింది. ఈ విషయం గుర్తించిన అక్కడి అభ్యర్థులు, విద్యార్థుల కుటుంబ సభ్యులు సైతం కానిస్టేబుల్ మంచి మనసుకు కృతజ్ఞతలు తెలిపారు.