పేలిన గ్యాస్ సిలిండర్.. 5 అంతస్తుల భవనం కూలి 8 మంది దుర్మరణం

రాజస్థాన్‌లోని ఓ బంగారం దుకాణంలో ప్రమాదవశాత్తు గ్యాస్ సిలిండర్ పేలింది. అయితే ఈ దుకాణం ఐదు అంతస్తుల భవనంలో ఉండగా.. పేలుడు ధాటికి భవనం మొత్తం ఒక్కసారిగా కుప్పకూలిపోయింది. దీంతో అందులో ఉన్న వారంతా శిథిలాల కింద పడి చిక్కుకున్నారు. ఇప్పటికే ఈ ఘటనలో 8 మంది మృతి చెందగా.. మరెంతో మంది తీవ్రంగా గాయపడ్డారు. విషయం గుర్తించిన పోలీసులు, రెస్య్కూ బృందాలు సహాయక చర్యలు కొనసాగిస్తూనే ఉన్నారు. ఇంకా శిథిలాల కిందే మరికొంత మంది చిక్కుకుని ఉండగా.. వారిని సురిక్షితంగా బయటకు తీసుకు వచ్చేందుకు విపరీతంగా కష్టపడుతున్నారు.

రాజస్థాన్ బికనేర్‌లోని సోని మార్కెట్‌లో ఓ ఐదు అంతస్తుల భవనం ఉంది. అయితే కింద కొన్ని షెటర్లు ఉండగా.. అందులో బంగారం దుకాణాలను నడిపిస్తున్నారు. పైఅంతస్తుల్లో మాత్రం పలు కుటుంబాలు అద్దెకు ఉంటున్నాయి. అయితే ఎప్పటిలాగే బంగారం దుకాణాదారు.. తన వద్దకు వచ్చిన వారికి ఆభరణాలు చేసిస్తున్నాడు. ముఖ్యంగా ఈరోజు కొందరు రాగా.. వారు తెచ్చిన బంగారాన్ని కరిగించేందుకు తన వద్ద ఉన్న చిన్న గ్యాస్ సిలిండర్‌ను ముట్టించాడు. అలా బంగారాన్ని కరిగిస్తున్న సమయంలోనే ఒక్కసారిగా.. ఆ గ్యాస్ సిలిండర్ పేలింది. దీంతో ఆ ఒక్క దుకాణం మాత్రమే కాక.. ఐదు అంతస్తుల భవనం కుప్పకూలిపోయింది.

ఒక్కసారిగా బిల్డింగ్ మొత్తం పడిపోగా.. స్థానికులంతా పరుగు పరుగున అక్కడకు చేరుకున్నారు. పోలీసులు, అంబులెన్సు సిబ్బందికి సమాచారం అందించి.. శిథిలాల కింద చిక్కుకున్న వారికి సాయం అందించే ప్రయత్నం చేశారు. అయితే ఈ ప్రమాదంలో ఇప్పటి వరకు మొత్తంగా 8 మంది ప్రాణాలు కోల్పోగా.. మరెంతో మంది తీవ్రంగా గాయపడ్డారు. పోలీసులతో పాటు అగ్నిమాపక సిబ్బంది, ఇతర రెస్క్యూ బృందాలు శిథిలాల కింద చిక్కుకున్న వారిని క్షేమంగా బయటకు తీసుకు వచ్చేందుకు కష్ట పడుతున్నారు. అలాగే క్షతగాత్రులను అంబులెన్స్ ద్వారా బీజీఎం ఆస్పత్రికి తరలించారు.

ప్రమాద విషయం తెలుసుకున్న జిల్లా కలెక్టర్ నమ్రతా, ఎస్పీ కవేంద్ర సాగర్‌లు సంఘటనా స్థలానికి చేరుకున్నారు. రక్షణా చర్యలను దగ్గరుండి మరీ పర్యవేక్షించారు. అయితే ప్రాథమిక విచారణలో భాగంగా.. బంగారం దుకాణాదారుడు చిన్న సిలిండర్‌కు బదులుగా.. గృహ వినియోగానికి ఉపయోగించే LPG సిలిండర్‌ను వాడినట్లు గుర్తించారు. దాని వల్లే ఇంత పెద్ద మొత్తంలో ప్రమాదం జరిగిందని భావిస్తున్నారు. ఈ ఘటనలో చనిపోయింది ఎవరు, ఎంత మందికి గాయాలు అయ్యాయి, వారంతా ఎవరనేది ఇంకా తెలియాల్సి ఉంది