బ్లడ్ క్యాన్సర్‌తో బాధపడుతూనే చదువులో టాప్

ఆ అమ్మాయికి చదువంటే పంచ ప్రాణాలు. తన తలరాతను మార్చేది చదువే అని బలంగా నమ్మింది.అందుకే చిన్నప్పటి నుంచి ఎంతో కష్టపడి చదివింది. ఆమె శ్రమకు తగ్గ ఫలితం వచ్చింది. పదో తరగతి ఫలితాల్లో స్టేట్ ర్యాంకర్‌గా నిలిచింది. స్టేట్ టాప్ వచ్చింది. కుమార్తె సాధించిన విజయం చూసి ఆ తల్లిదండ్రులు గుండెలు సంతోషంతో ఉప్పొంగిపోయాయి. కుటుంబ సభ్యులు, స్కూల్ యాజమాన్యం, పలువురు రాజకీయ నాయకులు సైతం విద్యార్థిని ప్రతిభను మెచ్చుకున్నారు. ఆమె మరెన్నో విజయాలు సాధించాలని దీవించారు.

అయితే ఆ విద్యార్థిని సాధించిన విజయం వెనక పెను విషాదం ఉంది. పట్టుమని 15 ఏళ్లు కూడా లేని బాలిక బ్లడ్ క్యాన్సర్‌తో బాధపడుతుంది. కానీ ఆమెకు చదువంటే ప్రాణం. అందుకే క్యాన్సర్ బాధను సైతం లెక్క చేయక పట్టుదలగా చదవి.. పదో తరగతిలో ఏకంగా స్టేట్ టాపర్‌గా నిలిచింది. కుమార్తె సాధించిన విజయం చూసి తల్లిదండ్రులు సంతోషించినా.. బిడ్డ ప్రాణాలే మాకు ముఖ్యం.. చికిత్సకు భారీగా ఖర్చవుతుంది.. దాతలు ఆదుకోవాలని కోరుతున్నారు.. ఆ వివరాలు..

ఈ సంఘటన ఛత్తీస్‌గఢ్‌లో వెలుగు చూసింది. కొన్ని రోజుల క్రితమే ఛత్తీస్‌గఢ్ పదో తరగతి ఫలితాలు వెల్లడయ్యాయి. వాటిల్లో ఇషికా బాలా అనే విద్యార్థిని స్టేట్ టాపర్‌గా నిలిచింది. అయితే ఆ సంతోషం ఆ సంతోషం వెనక అంతులేని విషాదం దాగి ఉంది. ఇషికా బాలా బ్లడ్‌ క్యాన్సర్‌తో బాధపడుతోంది. ప్రాణాంతక వ్యాధి బారిన పడ్డా సరే.. ఆమె వెనకడుగు వేయలేదు. చదువులో తన ప్రతిభ కనబరిచింది. పట్టుదలతో చదివి పదో తరగతిలో అత్యధిక మార్కులు సాధించి స్టేట్ టాపర్‌గా నిలిచింది.

ఇక తమ కుమార్తె క్యాన్సర్ చికిత్స కోసం ప్రభుత్వం ఆదుకోవాలని ఇషికా కుటుంబసభ్యులు కోరుతున్నారు. కాంకేర్‌ జిల్లాకు చెందిన ఇషికా బ్లడ్‌ క్యాన్సర్‌ చికిత్స తీసుకోవడం వల్ల సంవత్సరం పాటు చదువుకు దూరమైంది. తల్లిదండ్రులు, ఉపాధ్యాయుల ప్రోత్సాహంతో మళ్లీ చదువు మొదలుపెట్టి ఛత్తీస్‌గఢ్‌ సెకండరీ బోర్డు పరీక్షల్లో 99.17 శాతం మార్కులు సాధించి స్టేట్‌ టాపర్‌గా నిలిచింది. ఐఏఎస్‌ కావాలన్నది తన కల అని చెబుతోందిఇషికా.

సామాన్య రైతు అయిన ఇషిక తండ్రి శంకర్‌ ఆమె చికిత్స కోసం ఇప్పటికే రూ.15 లక్షలకు పైగా ఖర్చు చేశారు. ఆమె పరిస్థితి తెలుసుకున్న అధికారులు ప్రధానమంత్రి స్వాస్థ్య సహాయత యోజన కింద ఇషిక ఆరోగ్యం మెరుగుపడటానికి అవసరమైన సహాయం అందేలా చూస్తామని జిల్లా విద్యాశాఖాధికారి అశోక్‌ కుమార్‌ పటేల్‌ తెలిపారు.