భారత్-పాక్ చర్చలు.. ఎలా మాట్లాడుకుంటారు

పహల్గామ్ ఉగ్రదాడి తర్వాత దానికి ప్రతీకారంగా భారత్ ఆపరేషన్ సిందూర్ పేరుతో పాకిస్తాన్, పాక్ ఆక్రమిత కాశ్మీర్‌లోని ఉగ్రవాద స్థావరాలను లక్ష్యంగా మెరుపు దాడులు చేసిన సంగతి తెలిసిందే. దీంతో పాకిస్తాన్ ఆర్మీ సరిహద్దుల్లో కాల్పుల విరమణ ఉల్లంఘనకు పాల్పడటంతోపాటు భారత సరిహద్దు రాష్ట్రాలపై డ్రోన్లు, క్షిపణులు, ఫైటర్ జెట్లతో దాడులకు దిగింది. అయితే పాక్ చేస్తున్న దాడులను భారత త్రివిధ దళాలు సమర్థవంతంగా ఎదుర్కొన్నాయి. ఇందులో భాగంగా పాక్ వైపు భారీగా నష్టం తలెత్తింది. భారత్‌ వైపు కూడా కొందరు సైనికులు అమరులయ్యారు. ఈ నేపథ్యంలోనే అమెరికా మధ్యవర్తిత్వంతో భారత్, పాక్ మధ్య కాల్పుల విరమణ ఒప్పందం జరిగినట్లు స్వయంగా డొనాల్డ్ ట్రంప్ ప్రకటించారు. ఆ తర్వాత రెండు దేశాల అధికారులు కూడా ఈ విషయాన్ని ధృవీకరించారు. అయితే ఈ ఒప్పందాన్ని ఉల్లంఘించి మరీ.. పాక్ వైపు నుంచి కాల్పులు జరగ్గా భారత్ తిప్పికొట్టింది. ఈ క్రమంలోనే సోమవారం మధ్యాహ్నం 12 గంటలకు భారత్, పాక్ డీజీఎమ్ఓ చర్చలు జరగాల్సి ఉండగా.. అవి సాయంత్రానికి వాయిదా పడ్డాయి. హాట్‌లైన్ ద్వారా ఈ చర్చలు జరగనున్నాయి.

రెండు దేశాల మధ్య దౌత్యపరమైన చర్చలను జరిపేందుకు.. ఆ రెండు దేశాలకు సంబంధించిన అధికారులు నేరుగా చర్చించేందుకు ఉపయోగించే సాధనమే ఈ హాట్‌లైన్. ఈ హాట్‌లైన్ అంటే అత్యవసర పరిస్థితుల్లో నేరుగా కమ్యూనికేషన్ కోసం ఏర్పాటు చేసే ప్రత్యేక టెలిఫోన్ లేదా కమ్యూనికేషన్ లింక్. ఇది సాధారణ కాల్‌ మాదిరిగా కాకుండా.. సురక్షితంగా, ఎలాంటి అంతరాయాలు లేకుండా నేరుగా అధికారులు మాట్లాడే విధంగా ఏర్పాటు చేస్తారు. సాధారణంగా రెండు దేశాలకు చెందిన అధికారులు ఈ హాట్‌లైన్ ద్వారా సంభాషణలు సాగించి.. సమస్యకు పరిష్కారం వచ్చేలా మాట్లాడుతారు.

ప్రస్తుతం భారత్, పాకిస్తాన్ మధ్య ఉద్రిక్తతలను తగ్గించేందుకు.. ఈ హాట్‌లైన్‌ను ఉపయోగించి.. భారత సైన్యంలో ఉన్న డైరెక్టర్ జనరల్ ఆఫ్ మిలిటరీ ఆపరేషన్స్ (డీజీఎంఓ), పాకిస్తాన్ సైన్యంలోని డీజీఎంఓ మాట్లాడనున్నారు. ఈ హాట్‌లైన్‌లో మూడో పక్షం జోక్యం లేకుండా సమాచారాన్ని నేరుగా, స్పష్టంగా పంచుకోవడానికి ఉపయోగపడుతుంది.

హాట్‌లైన్‌ అనేది ఎన్‌క్రిప్టెడ్ లైన్‌పై పనిచేస్తుంది. అంటే హాట్‌లైన్‌లో మాట్లాడే మాటలను బయటివాళ్లు ఎవరూ ట్యాప్ చేసే అవకాశం ఉండదు. ఇది సైన్యానికి సంబంధించిన సున్నితమైన, రహస్య సమాచారం చేరవేసేందుకు అత్యంత కీలకంగా పనిచేస్తుంది.

ఫైబర్ ఆప్టిక్ కనెక్షన్లు

అత్యంత వేగంగా ఒక వైపు నుంచి మరోవైపు సమాచారాన్ని మార్పిడి చేసేందుకు హాట్‌లైన్ ఫైబర్ ఆప్టిక్ నెట్‌వర్క్ ఉపయోగపడుతుంది. ఇది హాట్‌లైన్ భద్రతతో పాటు క్లారిటీని కూడా పెంచుతుంది.

బ్యాక్‌అప్ కమ్యూనికేషన్

ప్రాథమిక హాట్ లైన్ పనిచేయని సమయంలో శాటిలైట్ లేదా హై ఫ్రీక్వెన్సీ రేడియో వ్యవస్థలను బ్యాక్‌అప్‌గా ఇందులో ఉంచుతారు.

అత్యవసర కాల్ ఫార్మాట్

హాట్‌లైన్ కాల్స్‌కు ముందుగా ఇనిషియేషన్ ప్రొటోకాల్ ఉంటుంది. రెండు దేశాలకు చెందిన మిలిటరీ అధికారుల మధ్య ఈ కమ్యూనికేషన్ ప్రారంభించడానికి ముందు కొన్ని కోడ్‌లు, సంకేతాలను వాడతారు.

వాకీ-టాకీ లాంటి నెట్‌వర్క్ కాదు

ఇది సాధారణ టెలిఫోన్ కాల్ కాదు. స్పెషల్ మిలిటరీ నెట్‌వర్క్‌లో భాగంగా ఉంది. సాధారణ ప్రజలు ఎవరూ దీన్ని యాక్సెస్ చేయలేరు.