ఇక్కడ ఎవరైనా ఛాయ్ చేసుకుని తాగొచ్చు

ఢిల్లీ నుంచి గల్లీ దాకా ఎక్కడ చూసినా మనకు ఛాయ్ దుకాణాలు కనిపిస్తాయి. చాలా చోట్ల రాత్రి, పగలు తేడా లేకుండా 24 గంటల పాటు ఛాయ్ దుకాణాలు నడుస్తూనే ఉంటాయి. ఇక ఛాయ్ లవర్స్ అయితే టీ షాప్ చూశారంటే చాలు.. ఏ టైమ్ అయినా.. ఒక కప్పు కడుపులో వేయాల్సిందే. ఇక ఇవాళ అంతర్జాతీయ టీ దినోత్సవం (మే 21 శుక్రవారం) సందర్భంగా.. టీ లవర్స్ ఒక పెద్ద ఫెస్టివల్‌నే సెలబ్రేట్ చేసుకుంటారంటే వినడానికి ఆశ్చర్యంగా ఉన్నా ఇది నిజమే. రోజూ కంటే ఇవాళ ఇంకో టీ ఎక్కువే తాగేస్తారు. అయితే దేశంలోనే ఎక్కడా లేని విధంగా.. ఒక టీ షాప్ గురించి తెలిస్తే మాత్రం మీరు అవాక్కవకుండా ఉండలేరు. ఎందుకంటే ఇది అలాంటి ఇలాంటి టీ షాప్ కాదు. ఈ టీ షాప్ ఓనర్ కేవలం ఉదయాన్నే వచ్చి షాప్ ఓపెన్ చేసి వెళ్లి.. చివరికి రాత్రి వచ్చి దాన్ని మూసివేసి డబ్బులు తీసుకుని వెళ్తాడు. ఇక రోజంతా ఎవరో ఒకరు ఛాయ్ చేయడం.. తాగడం డబ్బులు అక్కడ పెట్టి వెళ్లడం జరుగుతుంది. పశ్చిమ బెంగాల్‌లో ఉన్న ఈ టీ షాప్ గురించి అంతర్జాతీయ టీ దినోత్సవం వేళ సమయం ప్రత్యేక కథనం.

పశ్చిమ బెంగాల్‌లోని శ్రీరాంపూర్‌లో దాదాపు 100 ఏళ్లుగా ఈ టీ స్టాల్ నడుస్తోంది. వంద సంవత్సరాల క్రితం నరేష్ చంద్ర షోమ్ అనే స్వాతంత్ర్య సమరయోధుడు ఈ చిన్న టీ దుకాణాన్ని ప్రారంభించారని తెలుస్తోంది. శ్రీరాంపూర్‌లోని ఛత్రా కాళీ బాబు శ్మశానవాటిక ఎదురుగా ఈ టీ స్టాల్ ఉంది. అయితే ఈ టీ స్టాల్‌ ప్రత్యేకత ఏంటంటే.. ఇక్కడ కస్టమర్లు కేవలం టీ తాగడం మాత్రమే కాదు.. వాళ్లే స్వయంగా తయారు చేసుకుంటారు. ఇలా తయారు చేసుకున్న టీని ఇతరులకు కూడా సర్వ్ చేసుకుంటారు. అంటే ఈ టీ స్టాల్‌ను కస్టమర్‌లే నడుపుతున్నారు.

ఇక ఈ టీ స్టాల్ ఓనర్ అశోక్ చక్రవర్తి ఎప్పుడూ అక్కడ అందుబాటులో ఉండడు. ఉదయాన్నే వచ్చి ఆయన టీ స్టాల్‌ను ఓపెన్ చేసి.. అక్కడి నుంచి వెళ్లిపోతాడు. ఆ తర్వాత రాత్రి 7 గంటలకు వచ్చి మూసేసి వెళ్తాడు. ఇక ఈ టీ స్టాల్‌లో మరో విశేషం ఏంటంటే.. ఛాయ్ తాగిన తర్వాత ఎవరు చూసినా చూడకపోయినా.. అడిగినా అడగకపోయినా.. కస్టమర్లు తమ టీ డబ్బులను క్యాష్‌బాక్స్‌లో వేసి వెళ్తారు. అయితే ఇన్నేళ్లలో ఎప్పుడూ కూడా ఇప్పటివరకు ఎవరూ దొంగిలించడంగానీ.. డబ్బులు చెల్లించకుండా వెళ్లడం జరగలేదని చెబుతున్నారు. ఈ టీ స్టాల్ పూర్తిగా సంప్రదాయం, నమ్మకం అనే రెండు స్తంభాలపైనే గత 100 ఏళ్లుగా నడుస్తోందని పేర్కొంటున్నారు. ఇక ఈ ఛాయ్ దుకాణం చరిత్ర చూసి నెటిజన్లు ప్రశంసల జల్లు కురిపిస్తున్నారు. సెల్ఫ్ సర్వీస్ అనే పదానికి ఈ టీ స్టాల్ నిదర్శనమని కొనియాడుతున్నారు. ఇక టీ స్టాల్ గురించి తెలుసుకుని ఆశ్చర్యం వ్యక్తం చేస్తున్నారు.