ఈ బ్యాంకులో సీనియర్ సిటిజన్లకు 9.10 శాతం వడ్డీ.

 ఫిక్స్‌డ్ డిపాజిట్లు చేసే వారికి బ్యాంకులు వరుస షాకులు ఇస్తున్నాయి. రిజర్వ్ బ్యాంక్ ఆఫ్ ఇండియా (RBI) వరుసగా రెపో రేటును తగ్గించిన క్రమంలో బ్యాంకులు సైతం వడ్డీ రేట్లను తగ్గించేస్తున్నాయి. చాలా మంది బ్యాంకుల్లో డిపాజిట్ చేసేందుకు వెనకడుగు వేస్తున్నారు. అయితే ఇప్పటికీ కొన్ని బ్యాంకులు అధిక వడ్డీ రేట్లు కల్పిస్తున్నాయి. అందులో ఓ బ్యాంకు రూ. 3 కోట్ల లోపు ఉండే రిటైల్ టర్మ్ డిపాజిట్లపై సీనియర్ సిటిజన్లకు ఏకంగా 9.10 శాతం మేర వడ్డీ రేటు ఆఫర్ చేస్తోంది. మరి అందులో రూ. 5 లక్షలు జమ సినట్లయితే ఎంత వస్తుంది? అనేది ఇప్పుడు తెలుసుకుందాం.

ప్రస్తుతం 60 సంవత్సరాల వయసు దాటిన సీనియర్ సిటిజన్లకు సూర్యోదయ స్మాల్ ఫైనాన్స్ బ్యాంక్ (Suryoday Small Finance Bank) అత్యధికంగా వడ్డీ రేట్లు కల్పిస్తోంది. ప్రస్తుతం 5 సంవత్సరాల టెన్యూర్ డిపాజిట్లపై గరిష్ఠ వడ్డీ రేటు 9.10 శాతంగా ఇస్తోంది. ఆ తర్వాత యూనిటీ స్మాల్ ఫైనాన్స్ బ్యాంక్ 8.65 శాతం వడ్డీ ఆఫర్ చేస్తుండగా.. నార్త్ ఈస్ట్ స్మాల్ ఫైనాన్స్ బ్యాంక్ 8.50 శాతం వడ్డీ అందిస్తోంది. ఉత్కర్ష్ స్మాల్ ఫైనాన్స్ బ్యాంక్ 8.25 శఆతం మేర వడ్డీ ఆఫర్ చేస్తోంది. జన స్మాల్ ఫైనాన్స్ బ్యాంక్ 5 సంవత్సరాల డిపాజిట్లపై 8.20 శాతం వడ్డీ ఇస్తోంది. సవరించిన వడ్డీ రేట్లు మే 21, 2025కి అమలులోకి వచ్చాయి.

రూ.5 లక్షలు జమ చేసినట్లయితే ఎంతొస్తుంది?

సీనియర్ సిటిజన్లు అధిక వడ్డీ రేట్లు కావాలనుకుంటే సూర్యోదయ స్మాల్ ఫైనాన్స్ బ్యాంకు బెస్ట్ ఆప్షన్ అని చెప్పవచ్చు. 5 సంవత్సరాల మెచ్యూరిటీ టెన్యూర్ గల డిపాజిట్లపై 60 సంవత్సరాలు పైబడిన వారు రూ. 5 లక్షలు జమ చేశారు అనుకుందాం. అప్పుడు వడ్డీ రేటు 9.10 శాతంతో లెక్కించాలి. ఆన్‌ లైన్‌లో లభించే ఫిక్స్‌డ్ డిపాజిట్ కాలిక్యులేటర్ ద్వారా తెలుసుకోవచ్చు. రూ. 5 లక్షలపై వడ్డీ రూ. 2,24,500 వరకు వస్తుంది. అంటే మెచ్యూరిటీ తర్వాత అసలు, వడ్డీ కలిపితే రూ. 7,24,500 అందుతాయి.

అయితే, వడ్డీ రేట్లతో పాటు బ్యాంకులు విధించే ఇతర ఛార్జీల గురించి తెలుసుకోవాలి. లేదంటే నష్టపోవాల్సి వస్తుంది. బ్యాంకులు కొన్ని అదనపు ఛార్జీలు విధిస్తుంటాయి. ప్రీమెచ్యూర్ చేసుకుంటే వడ్డీ రేటులో కోతపెడుతుంటాయి. బ్యాంకులో డిపాజిట్ చేసే సమయంలోనే అన్ని వివరాలు తెలుసుకుని డబ్బులు జమ చేయాలి.