ఐపీఎల్ హిస్టరీలోనే సీఎస్కే ఇంత చెత్తగా ఎప్పుడూ ఆడలేదు.. వరెస్ట్ సీజన్

ఐదుసార్లు ఐపీఎల్ ట్రోఫీలు అందుకున్న టీమ్.. కనీసం ఐదు మ్యాచ్‌లు అయినా గెలవలేకపోయింది. ఎప్పుడూ టాప్‌లో కనిపించే టీమ్ ఇప్పుడు అట్టడుగు నుంచి కదలనే లేదు. ఐపీఎల్ హిస్టరీలోనే వరెస్ట్ పర్ఫార్మెన్స్‌తో పదో స్థానంతో ఐపీఎల్ 2025కి ముగింపు పలికింది చెన్నై సూపర్ కింగ్స్.

చెన్నై సూపర్ కింగ్స్‌కి ఈ సీజన్ ఐపీఎల్ హిస్టరీలోనే గుర్తుండిపోయే సంవత్సరం. గ్రాండ్‌గా సీజన్‌ను ఆరంభించిన సీఎస్కే.. ఆ తర్వాత నుంచి పదో స్థానంలో తిష్టవేసుకుని కదలనే కదల్లేదు. దాదాపు సగం సీజన్ నుంచి సీఎస్కే పాయింట్స్ టేబుల్ లాస్ట్ ప్లేస్‌లోనే ఫిక్స్ అయింది. ఇప్పటి వరకు సీఎస్కే లాస్ట్ ప్లేస్‌తో సీజన్‌ని ముగించడం ఇదే ఫస్ట్ టైమ్.

ఇద్దరు కెప్టెన్లు

ఐపీఎల్ 2025లో చెన్నై సూపర్ కింగ్స్‌కి ఇద్దరు కెప్టెన్లు వ్యవహరించారు. ఐపీఎల్ 2023 టైటిల్ గెలిచిన తర్వాత కెప్టెన్సీకి గుడ్ బై చెప్పిన ఎంఎస్ ధోనీ.. మళ్లీ ఈ సీజన్‌లో సారథ్య పగ్గాలు అందుకున్నాడు. రుతురాజ్ గైక్వాడ్ గాయం కారణంగా ఈ సీజన్ నుంచి బయటకు వెళ్లిపోవడంతో కెప్టెన్‌గా ధోనీ మళ్లీ బాధ్యతలు చేపట్టాడు.

మొదటి ఐదు మ్యాచ్‌లకు రుతురాజ్ కెప్టెన్‌గా వ్యవహరించగా.. కేవలం ఒక మ్యాచ్‌లో గెలిచి, వరుసగా నాలుగు ఓడిపోయింది. ధోనీ కెప్టెన్‌గా బాధ్యతలు తీసుకున్న తర్వాత తొలి మ్యాచ్‌లోనే సీఎస్కే దారుణ ఓటమిని మూటగట్టుకుంది. ధోనీ కెప్టెన్సీలో తొమ్మిది మ్యాచ్‌లు ఆడితే మూడు గెలిచి ఆరు ఓడిపోయింది.

ఈ సీజన్‌లో ఓవరాల్‌గా సీఎస్కే 14 మ్యాచ్‌లు ఆడితే 4 గెలిచి, పది మ్యాచ్‌లు ఓడింది. ఎనిమిది పాయింట్లు, -0.647 రన్‌రేట్‌తో పాయింట్ల పట్టికలో పదో స్థానంలో సీజన్ నుంచి వైదొలిగింది. ఐపీఎల్ 2025 నుంచి ఎలిమినేట్ అయిన తొలి టీమ్ కూడా సీఎస్కేనే కావడం విశేషం.

కూలిపోయిన చెపాక్ రికార్డులు

చెపాక్ స్టేడియంలో సీఎస్కే భద్రపరచుకున్న ఎన్నో ఏళ్ల రికార్డులన్నీ ఈ ఒక్క సీజన్‌తో కూలిపోయాయి. 17 ఏళ్ల తర్వాత ఆర్సీబీ చెపాక్ వేదికగా సీఎస్కేని ఓడించగా.. ఢిల్లీ క్యాపిటల్స్ 15 ఏళ్ల తర్వాత విజయం సాధించింది. సన్‌రైజర్స్ తన హిస్టరీలో సీఎస్కేను చెపాక్‌లో తొలిసారి ఓడించి రికార్డు సృష్టించింది.