ముందు ఫెయిలయ్యారు.. రీవాల్యుయేషన్ తర్వాత టాపర్‌లు

ఆంధ్రప్రదేశ్‌ పదో తరగతి ఫలితాల్లో ఇద్దరమ్మాయిలకు విచిత్రమైన పరిస్థితి ఎదురైంది. ఐదు సబ్జెక్టుల్లో మంచి మార్కులు సాధించినా.. ఒక సబ్జెక్టులో ఫెయిల్ అయ్యారు. అయితే రీవాల్యుయేషన్ తర్వాత విచిత్రంగా వారికి మార్కులు భారీగా పెరిగాయి. బాపట్ల జిల్లా కొల్లూరు జెడ్పీ హైస్కూల్ విద్యార్థిని ఈమని తేజస్వినికి ఐదు సబ్జెక్టుల్లో 90కి పైగా మార్కులు వచ్చాయి.. కానీ సోషల్‌ సబ్జెక్ట్‌లో మాత్రం 23 మార్కులు రావడంతో ఫెయిల్ అయ్యింది. ఆమె వెంటనే రీవాల్యుయేషన్ చేయించగా ఆమెకు 96 మార్కులు వచ్చాయి.. ఇప్పుడు ఆమె మొత్తం మార్కులు 575కు చేరాయి. మరోవైపు వైఎస్సార్‌ కడప జిల్లా ఎర్రగుంట్లకు చెందిన గంగిరెడ్డి మోక్షిత కూడా పదో తరగతి పరీక్షలు రాసింది. ఆమెకు కూడా అన్ని సబ్జెక్టుల్లో మంచి మార్కులు వచ్చినప్పటికీ సోషల్‌లో మాత్రం 21 మార్కులు రావడంతో ఫెయిల్ అయ్యింది. ఆమె వెంటనే రీవాల్యుయేషన్‌కు దరఖాస్తు చేసుకోగా 84 మార్కులు వచ్చాయి.అయితే తేజస్వినికి రీవాల్యుయేషన్ తర్వాత మంచి మార్కులు వచ్చినప్పటికీ.. ట్రిపుల్ ఐటీకి దరఖాస్తు చేసుకునే అవకాశం కోల్పోయింది. ఈ నెల 20 చివరి తేదీ అని.. ఇప్పుడు ఈ గడువు దాటిపోయిందని తల్లిదండ్రులు ఆందోళన వ్యక్తం చేశారు. ఇప్పుడు వచ్చిన మార్కులతో తేజస్విని ట్రిపుల్ ఐటీ సీటు వచ్చే అవకాశం ఉందని.. దరఖాస్తు చేసుకునేందుకు ప్రత్యేకంగా అవకాశం కల్పించాలని స్కూల్ టీచర్లు కూడా కోరుతున్నారు. తేజస్విని తండ్రి కూలి పనులు చేస్తూ తన కూతురిని చదివిస్తున్నారు.. ఈ పరిస్థితిని అర్థం చేసుకుని అవకాశం కల్పించాలని రిక్వెస్ట్ చేస్తున్నారు.