పెళ్లికి బహుమతిగా బాంబు.. ఓపెన్ చేసేలోపే పేలుడు

ఒక మహిళ మీద కోపంతో ఆమె కొడుకును మ్యారేజీ గిఫ్ట్‌గా పార్శిల్‌లో బాంబు పంపి ఇద్దరి మరణానికి కారణమైన వ్యక్తికి ఒడిశాలోని జిల్లా కోర్టు యావజ్జీవ కారాగార శిక్ష విధించింది. 2018 నాటి ఈ కేసులో జిల్లా జడ్జి పంజీలాల్ మెహర్‌ అనే వ్యక్తిని దోషిగా తేల్చి అతనికి శిక్షతో పాటు రూ.1.70 లక్షల జరిమానా విధించింది.

వివరాల్లోకి వెళ్తే.. పంజీలాల్ మెహర్ ఒడిశా భైన్సాలోని జ్యోతి వికాస్ కాలేజీలో లెక్చరర్‌గా పని చేసే వాడు. అదే కాలేజీలో సంయుక్త సాహు అనే మహిళ ప్రిన్సిపల్‌గా విధులు నిర్వర్తించే వారు. అయితే పలు కారణాల వల్ల ఈ ఇద్దరి మధ్య వృత్తిపరమైన తగాదా నెలకొంది. ఆ వైరం కాస్తా పెరుగుతూ వచ్చింది. సంయుక్త సాహుపై ఎలాగైనా ప్రతీకారం తీర్చుకోవాలనుకున్న పంజీలాల్ సరైన సమయం కోసం వేచి ఉన్నాడు. ఈ క్రమంలోనే సంయుక్త సాహు కుమారుడికి పెళ్లి నిశ్చయం అయింది. దీనిని ఆసరాగా చేసుకుని సంయుక్త సాహు కుమారుడిని చంపేసి ఆమెపై ప్రతీకారం తీర్చుకోవాలని కుట్ర పన్నాడు పంజీలాల్ మెహర్.

అందుకోసం మ్యారేజీ గిఫ్ఠ్‌గా పార్శిల్‌ పంపించాడు. అందులో బాంబు అమర్చాడు. ఆ పార్శిల్ ఓపెన్ చేయగానే బాంబు పేలడంతో సంయుక్త సాహు కుమారుడు, పెళ్లి కొడుకు అయిన సౌమ్య శేఖర్ ప్రాణాలు కోల్పోయాడు. అతడితో పాటు ఆయన నానమ్మ కూడా మృతిచెందింది. పెళ్లి కుమార్తెకు కూడా తీవ్ర గాయాలు అయ్యాయి. 2018 ఫిబ్రవరి 23న ఘటన జరిగింది. అప్పట్లో ఈ ఘటన రాష్ట్రవ్యాప్తంగా చర్చనీయాంశంగా మారింది. నవ వధువు, ఆమె కుటుంబ సభ్యుల అభ్యర్థన మేరకు, అప్పటి ముఖ్యమంత్రి నవీన్ పట్నాయక్ ఈ సంఘటనపై దర్యాప్తు చేయాలని క్రైమ్ బ్రాంచ్‌ను ఆదేశించారు. అదే ఏడాది మార్చి 23వ తేదీన క్రైమ్ బ్రాంచ్ పోలీసులు కేసు దర్యాప్తు చేపట్టారు. 2018 ఏప్రిల్‌లో పంజీలాల్ మెహర్‌ను అరెస్టు చేశారు.

అప్పటి నుంచి పంజీలాల్ మెహర్ ప్రతాప్‌గఢ్‌ సబ్‌జైలులో రిమాండ్ ఖైదీగా ఉంటూ విచారణ ఎదుర్కొన్నాడు. తాజాగా స్థానిక బొలాంగిర్ జిల్లా కోర్టు అతడికి ఐపీసీ సెక్షన్లు 302 (హత్య), 307 (హత్యాయత్నం), 201 (నేరానికి సంబంధించిన ఆధారాలను నాశనం చేయడం), అలాగే పేలుడు పదార్థాల చట్టంలోని సెక్షన్లు 3, 4 కింద అతడిని దోషిగా నిర్ధారించి యావజ్జీవ కారాగార శిక్ష విధించింది. దాంతో పాటు రూ. 1.70 లక్షల జరిమానా కట్టాలని ఆదేశించినట్లు ప్రభుత్వ న్యాయవాది చిత్తరంజన్ కనుంగో తెలిపారు.