టాయిలెట్ కమోడ్ ఎలా వాడితే అనారోగ్యాలు రాకుండా ఉంటాయో తెలుసా

టాయిలెట్ కి వెళ్తాం. సింపుల్ గా ఫ్లష్ చేసి వచ్చేస్తాం. ఇందులో తప్పేముంది. ఎవరైనా చేసేది ఇదే కదా అనిపిస్తుండొచ్చు. కానీ..ఏమీ కాదులే అని వదిలేస్తున్న కొన్ని అలవాట్ల వల్ల ఎన్నో అనారోగ్యాలు వస్తున్నాయి. ముఖ్యంగా టాయిలెట్ లో చేసే కొన్ని చిన్న చిన్న పొరపాట్లు తెలియకుండానే వ్యాధులకు కారణమవుతున్నాయి. కమోడ్ ని వాడడం నుంచి ఫ్లష్ చేసి బయటకు వచ్చేంత వరకూ కొన్ని జాగ్రత్తలు తీసుకోవాలని చెబుతున్నారు హెల్త్ కోచ్. ముఖ్యంగా బాత్ రూమ్ లో చేస్తున్న 5 పొరపాట్ల గురించి వివరించారు. ఈ అలవాట్లు మానుకోకపోతే ఏయే ఇబ్బందులు వస్తాయో కూడా ఎక్స్ ప్లెయిన్ చేశారు. ఆ పొరపాట్లు ఏంటి. వాటి వల్ల ఎలాంటి నష్టాలు జరుగుతున్నాయి. ఈ వివరాలు చూద్దాం.

కమోడ్ లిడ్ తెరిచి

టాయిలెట్ కి వెళ్లిన తరవాత ఫ్లష్ చేస్తాం. అలాగే బయటకు వెళ్లిపోతాం. అయితే..ఈ విషయంలో చాలా మంది తప్పు చేస్తున్నారని చెబుతున్నారు హెల్త్ కోచ్. కమోడ్ పైన ఓ లిడ్ ఉంటుంది. ఆ మూత తీసి టాయిలెట్ కి వెళ్లి ఫ్లష్ చేస్తారు. కానీ ఎప్పుడైనా సరే. లిడ్ ఓపెన్ చేసి ఉన్నప్పుడు ఫ్లష్ చేయకూడదు. ఇలా చేయడం వల్ల కమోడ్ లోకి వెళ్లిన వ్యర్థాల నుంచి రకరకాల బ్యాక్టీరియా, క్రిములు బయటకు వస్తాయి. బాత్ రూమ్ నిండా వ్యాప్తి చెందుతాయి.

ముఖ్యంగా బాత్ రూమ్ గోడలు, టవల్స్ పై స్ప్రెడ్ అయ్యే ప్రమాదముంటుంది. కొన్ని సార్లు అవి మన శరీరంపైనా వ్యాపిస్తాయి. ఈ క్రిములు రకరకాల అనారోగ్యాలను వెంట తీసుకొస్తాయి. ఇవి 6 అడుగుల వరకూ వ్యాప్తి చెందే ప్రమాదముంది. అందుకే..తప్పనిసరిగా కమోడ్ మూత క్లోజ్ చేసిన తరవాతే ఫ్లష్ చేయాలి. అలా అయితే..ఆ క్రిములు కేవలం కమోడ్ కి మాత్రమే పరిమితమవుతాయి.

టాయిలెట్ పేపర్

టాయిలెట్ పేపర్ యూజ్ చేసే విషయంలోనూ చాలా మంది కొన్ని తప్పులు చేస్తున్నారు. నిజానికి ఈ పేపర్లు మురికినంతా క్లీన్ చేయవు. పైగా వీటికి మురికి అంతా అంటుకుంటుంది. బ్యాక్టీరియా ఫామ్ అవుతుంది. ఇదే బాత్ రూమ్ నిండా వ్యాప్తి చెందుతుంది. పైగా బాత్ రూమ్ దుర్వాసన కూడా వస్తుంది. వాష్ రూమ్స్ ఇలా మురికిగా ఉండడం ఏ మాత్రం మంచిది కాదు. అందుకే టిష్యూ పేపర్స్ ని వాడే బదులుగా నీళ్లు వాడడమే మంచిది. హైజీన్ గా ఉండాలంటే నీళ్లతోనే క్లీన్ చేయాలి. ఇదే సరైన అలవాటు.

ఈ అలవాటు కూడా

టాయిలెట్ యూజ్ చేసిన తరవాత సరైన విధంగా క్లీన్ చేసుకోవాలి. అయితే..ఇలా శుభ్రం చేసుకున్న తరవాత చాలా మంది అలాగే తడిగా వదిలేస్తారు. కానీ..ఇది మంచి అలవాటు కాదు. దీని వల్ల ఫంగల్ ఇన్ ఫెక్షన్స్ వచ్చే ప్రమాదముంటుంది. దురద కూడా వస్తుంది. అందుకే..ఎట్టి పరిస్థితుల్లోనూ నీళ్లతో శుభ్రం చేసుకున్న తరవాత తడిగా వదిలేయకూడదు. తప్పనిసరిగా ఆ ఏరియాని డ్రై చేసుకోవాలి. టిష్యూ పేపర్ లేదా ఓ చిన్న టవల్ తో తుడవాలి. అయితే..ఈ టవల్ ని మాత్రం వాడిన ప్రతిసారీ శుభ్రంగా ఉతుక్కోవాలి. ఈ చిన్న అలవాటుతో చాలా వరకూ సమస్యలు తగ్గిపోతాయి.

చేతులు శుభ్రత లేకపోవడం

టాయిలెట్ కి వెళ్లిన తరవాత సబ్బుతో కచ్చితంగా చేతులు శుభ్రంగా కడుక్కోవాలి. ఇది చాలా మంచి అలవాటు. చేతులపై ఉండే బ్యాక్టీరియా, క్రిములను తొలగించుకోవాలంటే ఇలా సబ్బుతో వాష్ చేసుకోవాల్సిందే. అయితే.. కొంత మంది సబ్బుతో కాకుండా కేవలం నీళ్లతో క్లీన్ చేసుకుని అలాగే వదిలేస్తారు. కానీ నీళ్లతో శుభ్రం చేసుకుంటే చేతులపై ఉండే క్రిముల్లో కేవలం 10 శాతం మాత్రమే తొలగిపోతాయి. మిగతావి అలాగే ఉండిపోయి ఆహారం ద్వారా మన శరీరం లోపలికి వెళ్లే ప్రమాదముంటుంది. అందుకే..కచ్చితంగా సబ్బు లేదా హ్యాండ్ వాష్ లిక్విడ్ తో చేతులు శుభ్రం చేసుకోవాలి.

ఒకే టవల్ వాడడం

బాత్ రూమ్ లో చేతులు తుడుచుకునేందుకు చిన్న టవల్స్ వాడుతుంటారు. టాయిలెట్ కి వెళ్లి వచ్చిన ప్రతిసారీ చేతులు ఈ టవల్ కే తుడుస్తారు. ఇది మంచిదే అయినా...ఎక్కువ రోజుల పాటు ఒకే టవల్ వాడడం చాలా ప్రమాదకరం. తడిగా ఉన్న టవల్ పై బ్యాక్టీరియా చాలా సులువుగా ఏర్పడుతుంది. ఎక్కువ రోజుల పాటు అలాగే ఉండిపోతుంది. అందుకే..ఈ టవల్ ని కచ్చితంగా ఎండలో ఉంచాలి. సూర్యరశ్మి తగిలేలా ఉంచితే బ్యాక్టీరియా తొలగిపోతుంది. అంతే కాదు. కనీసం రెండు మూడు రోజులకోసారైనా ఈ టవల్ మార్చి కొత్తది వాడాలి. ఇప్పుడు చెప్పిన ఈ అలవాట్లు మానుకోకపోతే ఇంటిల్లిపాది అనారోగ్యాల బారిన పడే ముప్పు తప్పదు. బాత్ రూమ్ నీట్ గా ఉంటేనే ఆరోగ్యంగా ఉండొచ్చు.