బట్టలు ఆరక కంపు కొడుతున్నాయా, కొన్ని టిప్స్ పాటిస్తే

ఎండలు విపరీతంగా ఉన్నప్పుడు..ఇంకెన్ని రోజులో ఈ ఉక్కపోత..త్వరగా వర్షాలు పడితే బాగుండు అనిపిస్తుంది. వర్షాకాలం మొదలయ్యాక అప్పుడుండే ఇబ్బందులు అప్పుడుంటాయి. కాస్త బయటకు వెళ్లొస్తే చాలు బట్టలన్నీ తడిసిపోతాయి. ఎంత గొడుగు పెట్టుకున్నా, రెయిన్ కోట్ వేసుకున్నా తడి తగలకుండా అయితే ఉండదు. ఇలా తడిసిపోయిన బట్టలు ఆరబెట్టుకోవడమే అతి పెద్ద ప్రహసనం. వర్షాకాలం అంతా ఇదే ఇబ్బంది తప్పదు. వాతావరణంలో తేమ ఎక్కువగా ఉంటుంది. ఈ కారణంగా దుస్తులు త్వరగా ఆరవు. ఆరకపోవడం వల్ల దుర్వాసన వస్తాయి. ఈ బట్టలు వేసుకుని బయటకు వెళ్లడం చాలా ఇబ్బందిగా అనిపిస్తుంది. అయితే..ఈ సమస్యలు లేకుండా ఉండాలంటే కొన్ని టిప్స్ పాటించాలి. ఎంత వర్షం పడినా, దుస్తులు ఎంత తడిగా ఉన్నా..చిన్న చిన్న చిట్కాలు పాటిస్తే బట్టలు త్వరగా ఆరడంతో పాటు దుర్వాసన కూడా రాదు. ఆ టిప్స్ ఏంటి. ఎలా ఫాలో అవ్వాలో చూద్దాం.

ఇంట్లోనే ఆరేయక తప్పదు

వర్షాకాలంలో బయట బట్టలు ఆరేయడం కుదరదు. అందుకే కచ్చితంగా ఇంట్లోనే ఆరబెట్టుకోవాల్సి ఉంటుంది. ప్రతిసారీ డ్రై వాష్ చేయడం కూడా సాధ్యం కాదు. అయితే..ఇంట్లో బట్టలు ఆరేయడం ఏ మాత్రం మంచిది కాదు. ఉతికిన బట్టల నుంచి నీళ్లు కారుతూ ఉంటాయి. ఇవి ఇంటి గోడల మీద పడతాయి. క్రమంగా చెమ్మ చేరుకుంటుంది. ఫలితంగా గోడలు పాడైపోతాయి. ఇక టైల్స్ పైన ఇలా నీళ్లు పడినా అవి కూడా త్వరగా పాడైపోతాయి. ఈ చెమ్మ ఎక్కువయ్యే కొద్ది బ్యాక్టీరియా కూడా పెరుగుతుంది. అయితే..కొన్ని జాగ్రత్తలు తీసుకుంటే ఇలాంటి ఇబ్బందులు లేకుండానే దుస్తులు ఆరబెట్టవచ్చు.

ఏం చేయాలంటే

బట్టలు ఉతికిన తరవాత ఏదో ఓసారి పిండి అలాగే ఆరేస్తుంటారు. కానీ..దుస్తులు త్వరగా ఆరాలంటే ఇలా అసలు చేయకూడదు. వీలైనన్ని ఎక్కువసార్లు గట్టిగా పిండాలి. దుస్తుల్లో ఉండే నీరంతా బయటకు వెళ్లేలా చూసుకోవాలి. ఇలా అయితే దుస్తుల్లో ఉన్న నీరంతా బయటకు వెళ్లిపోయి త్వరగా ఆరేందుకు అవకాశముంటుంది. అయితే.. ఇదొక్కటి చేస్తే సరిపోదు. దుస్తులు త్వరగా ఆరాలంటే మరో పని కూడా

చేయాలి. కాస్త వెంటిలేషన్ ఉన్న గదిలో దుస్తులు ఆరేయాలి.

ఆ గదిలోనే దుస్తులకు గాలి తగిలేలా హీటర్ పెట్టాలి. హీటర్ అందుబాటులో లేకపోతే ఫ్యాన్ అయినా ఆన్ చేసి ఉంచాలి. అయితే..ఏది వాడినా దుస్తులకు మాత్రం కచ్చితంగా గాలి తగిలేలా చూడాలి. టేబుల్ ఫ్యాన్ వాడినా సరిపోతుంది. ఇలా అయితే ఆ గాలికి త్వరగా ఆరిపోతాయి.

హెయిర్ డ్రైయర్

దుస్తులు ఆరేసినప్పుడు ఓ చిన్న చిట్కా పాటిస్తే త్వరగా ఆరతాయి. ఆరేసి సమయంలో అన్నీ దగ్గర దగ్గరగా ఉండకుండా చూసుకోవాలి. కాస్త దూరంగా ఉండేలా ఆరేయడం మంచిది. ఇలా చేయడం వల్ల అన్నింటికీ గాలి తగిలి త్వరగా ఆరతాయి. లేదంటే ఆ పచ్చిదనం అలాగే ఉండిపోతుంది. ఓ చోట ఆరి మరో చోట తడిగా ఉంటుంది. మరో చిట్కా ఏంటంటే..జుట్టు ఆరబెట్టుకోడానికి కొందరు హెయిర్ డ్రైయర్ వాడుతుంటారు. అయితే.. దుస్తులు ఆరడానికి కూడా దీన్ని వాడుకోవచ్చు. అయితే దుస్తులకు మరీ దగ్గరగా ఉంచి వాడడం మంచిది కాదు. కాస్త దూరంగా పెట్టి ఆన్ చేసి కాసేపు ఉంచితే కాస్తైనా త్వరగా ఆరేందుకు అవకాశముంటుంది.

ఐరన్ చేయడం

ఇది చాలా మంది రెగ్యులర్ గా ఫాలో అయ్యే చిట్కానే. దుస్తులు మరీ చెమ్మగా ఉన్నట్టగా అనిపిస్తే వెంటనే ఐరన్ చేసుకుంటే సరిపోతుంది. ఈ కారణంగా తడి పోవడంతో పాటు బట్టలు దుర్వాసన రావడం కూడా తగ్గుతుంది. ఓవెన్ తోనూ వీటిని సులువుగా ఆరబెట్టవచ్చు. అయితే.. అంతకు ముందు ఓవెన్ ని కనీసం 100 డిగ్రీల వద్ద ఉంచి వేడి చేయాలి. ఆ తరవాత ఆఫ్ చేయాలి. చాలా సేపటి వరకూ ఆ హీట్ అలాగే ఉంటుంది. ఆ తరవాత దుస్తులను ఓ షీట్ పై పెట్టి వాటిని ఓవెన్ లో ఉంచాలి. ఈ వేడికి అవి కాసేపట్లోనే ఆరిపోతాయి. అయితే..పొరపాటున కూడా ఓవెన్ ఆన్ చేసి ఈ పని చేయొద్దు. దుస్తులు మొత్తం కాలిపోయే ప్రమాదముంటుంది. జాగ్రత్తగా ఈ చిట్కా ఫాలో అవ్వాలి. పాలిస్టర్ దుస్తులు మాత్రం పొరపాటున కూడా ఇందులో పెట్టకూడదు.

ఇలా ఉతకాలి

కాస్త తేలికగా ఉన్న దుస్తులు, బరువుగా ఉన్న బట్టలను వేరుగా ఉంచాలి. ఆ తరవాతే వాటిని సపరేట్ గా ఉతకాలి. ఇలా చేయడం వల్ల వాషింగ్ మెషీన్ పై ప్రెజర్ తగ్గుతుంది. పైగా..బట్టలు దుర్వాసన రాకుండా ఎక్కువగా క్లీన్ చేసేందుకు వీలవుతుంది. ఆ తరవాత డ్రై వాష్ పెడితే నీళ్లన్నీ బయటకు వెళ్లిపోతాయి. మెషీన్ నుంచి తీసిన తరవాత మరోసారి గట్టిగా పిండి ఆరేస్తే చాలా త్వరగా ఆరిపోతాయి. దుర్వాసన కూడా రాదు.