అమెరికాలోని 5 లక్షల మంది వలసదారులకు షాక్,,ట్రంప్ నిర్ణయానికి కోర్టు గ్రీన్ సిగ్నల్

అమెరికాలో అక్రమంగా నివసిస్తున్న వలసదారులకు ఇది నిజంగా పిడుగులాంటి వార్త. డొనాల్డ్ ట్రంప్ తీసుకున్న కీలక నిర్ణయాలకు ఇప్పుడు అమెరికా సుప్రీంకోర్టు ఆమోదముద్ర వేసింది. అమెరికాలో ఉంటున్న అక్రమ వలసదారులను దేశం నుంచి బహిష్కరించాలనే ట్రంప్ నిర్ణయానికి తాజాగా కోర్టు మరింత బలం చేకూర్చేలా ఈ తీర్పు వెలువరించింది. అమెరికా సుప్రీంకోర్టు ఇచ్చిన ఈ తీర్పుతో తక్షణమే దాదాపు 50 వేల మంది వలసదారులపై ప్రభావం పడనుందని సంబంధిత వర్గాలు చెబుతున్నాయి. అధికారంలోకి వచ్చినప్పటి నుంచి అక్రమ వలసదారులపై ఉక్కుపాదం మోపుతున్న డొనాల్డ్ ట్రంప్‌కు తాజాగా కోర్టు ఇచ్చిన తీర్పు.. మరింత బలాన్ని చేకూర్చినట్లయింది.

సుప్రీంకోర్టు ఇచ్చిన ఈ తీర్పుతో అమెరికాలో ఉన్న దాదాపు 5.32 లక్షల మంది వలసదారులు దేశం నుంచి బహిష్కరణకు గురయ్యే ప్రమాదం ఉందని సంబంధిత వర్గాలు వెల్లడించాయి. ఇందులో మరీ ముఖ్యంగా క్యూబా, హైతీ, నికరాగ్వా, వెనిజులా వంటి దేశాల నుంచి వచ్చిన వలసదారులపై ఈ ప్రభావం చాలా ఎక్కువగా ఉండబోతోందని పేర్కొన్నాయి. దీంతో అమెరికాలో వీరి భవిష్యత్తు ఇప్పుడు ప్రశ్నార్థకంగా మారిందని చెప్పాయి.

అంతకుముందు.. గతంలో అమెరికా అధ్యక్షుడిగా ఉన్న జో బైడెన్.. సుమారు 3.50 లక్షల మంది వెనిజులా ప్రజలకు ఇమ్మిగ్రేషన్ పెరోల్ హోదాను మంజూరు చేశారు. ఈ ఇమ్మిగ్రేషన్ పెరోల్ కారణంగా వారంతా అమెరికాలో తాత్కాలికంగా నివసించడానికి, పని చేయడానికి అనుమతి లభించింది. అయితే బైడెన్ తీసుకువచ్చిన ఇమ్మిగ్రేషన్ పెరోల్‌ను రద్దు చేయాలని ఇప్పుడు డొనాల్డ్ ట్రంప్ నిర్ణయించగా.. దానికి సుప్రీంకోర్టు కూడా అనుమతి ఇవ్వడంతో మార్గం సుగమం అయింది. దీంతో.. వలసదారులను ఇక అమెరికాలో ఒక్క క్షణం కూడా ఉండేందుకు అంగీకరించమని డొనాల్డ్ ట్రంప్ స్పష్టం చేస్తున్నారు. ఇమ్మిగ్రేషన్ పెరోల్ రద్దుకు సంబంధించి.. యూఎస్ జిల్లా జడ్జి ఇందిరా తల్వానీ ఇచ్చిన ఒక తాత్కాలిక స్టే ఆర్డర్‌ను సుప్రీంకోర్టు కొట్టివేసింది. దీంతో బైడెన్ ఇచ్చిన ఈ ఇమ్మిగ్రేషన్ పెరోల్‌ను రద్దు చేయడానికి ట్రంప్ ప్రభుత్వానికి మార్గం మరింత సుగమం అయింది.

అమెరికా చట్టాల ప్రకారం ఇమ్మిగ్రేషన్ పెరోల్ అంటే.. అత్యవసర మానవతా కారణాల వల్ల లేదా ముఖ్యమైన ప్రజా ప్రయోజనాల కోసం ప్రభుత్వం తాత్కాలికంగా ఇచ్చే అనుమతి. ఈ ఇమ్మిగ్రేషన్ పెరోల్ కింద.. హైతీ, వెనిజులా, క్యూబా, నికరాగ్వా దేశాల నుంచి నెలకు 30 వేల మంది వలసదారులకు 2 ఏళ్ల పాటు అమెరికాలో ఉండడానికి వీలు కల్పించారు. ఇది వారికి అమెరికాలో నివసించడానికి.. చట్టబద్ధంగా పని చేయడానికి అనుమతిని ఇచ్చింది. మాజీ అధ్యక్షుడు జో బైడెన్.. అమెరికా-మెక్సికో సరిహద్దులో అక్రమ వలసలను అరికట్టడానికి తన పాలనా విధానంలో భాగంగా ఈ ఇమ్మిగ్రేషన్ పెరోల్ పద్ధతిని తీసుకువచ్చారు. అయితే ఇప్పుడు సుప్రీంకోర్టు ఇచ్చిన ఈ తీర్పు ట్రంప్ వలస విధానాలకు మరింత బలం చేకూర్చే అవకాశం ఉంది. ఇది అమెరికాలోని లక్షలాది మంది వలసదారుల భవిష్యత్తుపై తీవ్ర ప్రభావం చూపనుంది.