పొట్టు పొట్టు కొట్టుకున్న తల్లిదండ్రులు.. బిగుసుకుపోయిన చిన్నారులు

మన దగ్గర వీధుల్లో పొట్టుపొట్టు కొట్టుకునే వారిని తరచుగా చూస్తునే ఉంటాం. మరీ ముఖ్యంగా మంచి నీళ్ల కుళాయి దగ్గర, వైన్ షాపులు, శుభకార్యల వేళ.. ఇలాంటి ఘటనలు ఎక్కువగా వెలుగు చూస్తుంటాయి. ఇక ఇప్పుడైతే బస్సులో సీటు కోసం ఆడవాళ్లు జుట్టు పట్టుకుని కొట్టుకునే వీడియోలు తెగ వైరల్ అవుతున్నాయి. అంతేకాక చిన్న చిన్న కారణాలకే రోడ్డెక్కి కొట్టుకునే యువతలు, మహిళలు.. తాగి తన్నుకునే మందు బాబులకు కొదవే లేదు.

మన దగ్గర అంటే ఇలాంటి ఘటనలు, ఘర్షణలు చాలా సహజం. మరి ఇదే సీన్ అమెరికాలో రిపీట్ అయితే.. ఆశ్చర్యంతో నోరు వెళ్లబెట్టాల్సిందే కదా. అలాంటి పరిస్థితే ఇప్పుడు వచ్చింది. అమెరికాలో ఓ పాఠశాలో చిన్నారుల తల్లిదండ్రులు పిల్లల ముందే పొట్టుపొట్టు కొట్టుకున్నారు. వారిని చూసి పాపం ఆ పిల్లలు గుక్కపట్టి ఏడ్చారు. ఇందుకు సంబంధించిన వీడియో వైరల్ అవుతోంది.ఆ వివరాలు..

ఈ సంఘటన అమెరికాలోని ఆర్కాన్సాస్‌ రాష్ట్రం, వెస్ట్‌ మెంఫిస్ నగరంలో ఉన్న ఫాల్కీ ఎలిమెంటరీ స్కూల్లో వెలుగు చూసింది. మూడు రోజుల క్రితం అనగా.. మే 28న ఫాల్కీ ఎలిమెంటరీ స్కూల్ యాజమాన్యం గ్రాడ్యుయేషన్ వేడుకలు నిర్వహించింది. ఈకార్యక్రమంలో పాల్గొనడం కోసం విద్యార్థులతో పాటుగా వారి తల్లిదండ్రులు కూడా హాజరయ్యారు. కార్యక్రమం మొదలైంది. మరి ఏంజరిగిందో తెలియదు కానీ.. కాసేపటికి.. కొందరు మహిళలు గొడవపడటంప్రారంభించారు.

ఏదో విషయమై వారి మధ్య గొడవ రాజుకుంది. చూస్తుండగానే అది కాస్త పెరిగి పెద్దదై.. ఒకరిపై ఒకరు పిడిగుద్దులు కురిపించుకొనే స్థాయికి వెళ్లింది. కొందరు మగాళ్లు.. ఈ గొడవను ఆపేందుకు ప్రయత్నించారు. అబ్బే వారి వల్ల కాలేదు. ఇక జుట్లు పట్టుకుని కొట్టుకుంటున్న తల్లులను చూసి.. పాపం ఆ పసివాళ్లు దడుచుకున్నారు. ప్లీజ్ మమ్మీ ఆపండి.. మాకు భయం వేస్తుందన్నా.. ఆ లేడీస్ కంట్రోల్ కాలేదు. ఇక ఈ తతంగాన్ని ఎవరో వీడియో తీసి.. సోషల్ మీడియాలో పోస్ట్ చేయడంతో ఇది కాస్త వైరల్ అవుతుంది. దీన్ని చూసిన వారు.. వార్ని మా దగ్గరే అనుకున్నాను.. అమెరికాలో కూడా ఇలాంటి సంఘటనలు జరుగుతాయా.. అంటూ కామెంట్స్ చేస్తున్నారు.

అయితే ఈ ఘటనలో ఎవరికీ గాయాలు కాలేదు. కానీ ఇది స్థానికంగా తీవ్ర చర్చనీయాంశమైంది. వీడియో వైరల్ కావడంతో.. పాఠశాల యాజమాన్యంపై పెద్ద ఎత్తున విమర్శలు వచ్చాయి. అయితే సదరు స్కూల్ సిబ్బంది దీన్ని ఖండించింది. ఇలాంటి ప్రవర్తన ఆమోదయోగ్యం కాదంది. అంతేకాక ఇందుకు బాధ్యులైన వారిపై కచ్చితంగా చర్యలు తీసుకుంటామని స్పష్టం చేసింది.

విద్యార్థులకు రక్షణ కల్పించడమే కాక పాఠశాలలో పని చేసే సిబ్బందికి ఇబ్బందులు ఎదురవ్వకుండ చూడటం.. అలానే స్కూల్లో భద్రత కల్పించడం తమ మొదటి ప్రాధాన్యత అని పాఠశాల యాజమాన్యం స్పష్టం చేసింది. ఈ వ్యవహారంపై పోలీసులకు ఫిర్యాదు చేశామని.. వారి దర్యాప్తుకు పూర్తిగా సహకరిస్తామని ఓ ప్రకటన విడుదల చేసింది. ఏది ఏమైనా ఈవ్యవహారం మాత్రం నెట్టింట వైరల్‌గా మారింది.