అలా ఉన్నప్పుడు తలుపులు వేసుకోవాలంటూ..మెక్రాన్ దంపతులకు ట్రంప్ సూచన

 ఫ్రాన్స్ అధ్యక్షుడు ఇమ్మాన్యుయేల్ మెక్రాన్ దంపతులకు సంబంధించిన వీడియో నెట్టింట వైరల్‌గా మారింది. అందులో ఆయన సతీమణి బ్రిగెట్టా అతడి ముఖంపై కొట్టినట్లు వీడియోలో రికార్డు కాగా.. అది చూసిన ప్రతీ ఒక్కరూ వీరిద్దరి మధ్య గొడవ జరిగిందని భావించారు. అంతేనా త్వరలోనే విడాకులు కూడా తీసుకోబోతున్నారంటూ వార్తలు వచ్చాయి. ఇప్పటికే మెక్రాన్ దంపతులు దీనిపై క్లారిటీ కూడా ఇచ్చినా అంతా అదే నిజం అనుకుంటున్నారు. అయితే తాజాగా దీనిపై అగ్రరాజ్యం అమెరికా అధ్యక్షుడు డొనాల్డ్ ట్రంప్ స్పందించారు. అలాంటివి జరిగేటప్పుడు తలుపులు వేసుకోవాలంటూ సూచించారు.

ఫ్రాన్స్ అధ్యక్షుడు ఇమ్మాన్యుయేల్ మెక్రాన్, బ్రిగెట్టా దంపతుల మధ్య అభిప్రాయ భేదాలు వచ్చాయని ఇటీవలే సోషల్ మీడియాలో పెద్ద ఎత్తున వార్తలు వచ్చాయి. ముఖ్యంగా వీరిద్దరూ కలిసి వియత్నాం పర్యటనకు వెళ్లిన సమయంలో గొడవ జరిగినట్లు తెలిసింది. ముఖ్యంగా విమానం హనోయ్‌లో దిగిన తర్వాత.. ఒక అధికారి తలుపును తెరిచినప్పుడు మెక్రాన్ ఎవరితోనో మాట్లాడుతున్నట్లు కనిపించింది. అంతలోనే ఎర్రని స్లీవ్ డ్రెస్ ధరించిన ఓ మహిళ చేతులు మెక్రాన్ ముఖంపై కొట్టినట్లు కూడా వీడియోలో రికార్డు అయింది. దీంతో ఆయన వెంటనే తలతిప్పుకొని వెనక్కి జరిగారు. అయితే ఇదంతా రికార్డు అవుతున్నట్లు గుర్తించిన మెక్రాన్ ఆ వెంటనే చేతులు ఊపుతూ నవ్వారు.

అయితే ఆ తర్వాత.. అదే రెడ్ కలర్ డ్రెస్సులో మెక్రాన్ సతీమణి బ్రిగెట్టా కనిపించగా.. ఆమెనే అతడిని కొట్టిందని అంతా భావించారు. ముఖ్యంగా ఆ తర్వాత కూడా మెక్రాన్ ఆమె చేయి పట్టుకోవాలని చూడగా.. ఆమె అందుకు అంగీకరించలేదు. దీంతో వీరిద్దరి మధ్య గొడవ జరిగిందని అందరూ భావించారు. ఇందుకు సంబంధించిన ఈ వీడియోలు కూడా నెట్టింట వైరల్ కాగా అంతా అది నిజమేననుకున్నారు. ఈ ఘటనకు ముందే వీరిద్దరి మధ్య అభిప్రాయ భేదాలు వచ్చాయని, విడాకులు తీసుకునే అవకాశం ఉందంటూ వార్తలు రాగా.. ఈ వార్తలకు మరింత బలం ఏర్పడింది. కానీ దీనిపై మెక్రాన్ స్పందించారు.

ఆ సందర్భాన్ని అంతా తప్పుగా అర్థం చేసుకున్నారని అన్నారు. తమ మధ్య గొడవ జరగలేదని.. తానొక టిష్యూ తీసుకుని, ఒకరికి షేక్ హ్యాండ్ ఇచ్చినట్లు చెప్పారు. ఇదే తమ మధ్య జరిగిన సరదా సన్నివేషమని కూడా క్లారిటీ ఇచ్చారు. అలాగే తనకు, తన భార్యకు ఎప్పుడూ ఇలా జరుగుతూనే ఉందని చెప్పుకొచ్చారు. ఇంత జరిగాకా.. అమెరికా అధ్యక్షుడు డొనాల్డ్ ట్రంప్ వీరిద్దరి మధ్య గొడవ జరిగిందంటూ వచ్చిన వీడియోపై స్పందించారు. మఖ్యంగా ఓవల్ కార్యాలయంలో జరిగిన విలేకరుల సమావేశంలో మాట్లాడుతూ.. ఈ విషయంపై తాను నేరుగా మెక్రాన్‌తో మాట్లాడానని చెప్పారు. అంతా బాగానే ఉందని.. కాకపోతే అలాంటి ఘటనలు జరిగినప్పుడు తలుపులు వేసి ఉన్నాయో లేదో ఒకసారి గమనిమంచుకోవాలని సూచించారు.